លោកកឹម សុខា នៅតែមិនចូលបំភ្លឺនៅតុលាការ
11-May-2016 | ដោយ មែន កំសត់
ភ្នំពេញ ៖ លោកកឹម សុខា ប្រធានស្តីទីគណបក្សសង្គ្រោះជាតិ នឹងមិនចូលធ្វើការឆ្លើយបំភ្លឺនៅសាលាដំបូងរាជធានីភ្នំពេញ នាព្រឹកថ្ងៃទី១១ ខែឧសភា ឆ្នាំ២០១៦នេះទេ ទាក់ទងបណ្តឹងរបស់កញ្ញា ធី សុវណ្ណថា ប្តឹងពីបទបរិហាកេរ្តិ៍តាមរយៈខ្សែអាត់សំឡេងសន្ទនាដែលត្រូវបាន បង្ហោះនៅលើបណ្តាញសង្គមហ្វេសប៊ុក និងលើសារព័ត៌មានមួយចំនួន។
ការមិនចូលបបង្ហាញខ្លួនទៅឆ្លើយបំភ្លឺរបស់លោកកឹម សុខា នៅថ្ងៃទី១១ ខែឧសភា ឆ្នាំ២០១៦ ត្រូវបានអ្នកនាំពាក្យសាលាដំបូងរាជធានីភ្នំពេញ បញ្ជាក់ថា នៅមិនទាន់មានចំណាត់ការយ៉ាងណានៅឡើយទេ។
ក្នុងពេល ជាមួយគ្នា ព្រះអង្គម្ចាស់ ស៊ីសុវត្ថិ ធម្មិកោ មន្ត្រីជាន់ខ្ពស់គណបក្សសង្គ្រោះជាតិ បានសរសេរផ្សព្វផ្សាយនៅលើបណ្តាញសង្គមហ្វេសប៊ុកថា “លោកប្រធានស្តីទី កឹម សុខា បានសម្រេចចិត្ត ធ្វើពលីកម្ម ប្រឈមនឹងការព្រមាន ហើយសុខចិត្តអោយគេចាប់ខ្លួនលោកដើម្បីផ្តល់កំលាំងចិត្តឲ្យយើង ទាំងអស់គ្នានៅខាងក្រៅ។ ហេតុដូច្នេះ ដើម្បីផ្តល់សេចក្តីកក់ក្តៅជូនលោកវិញ យើងត្រូវតែរួបរួមគ្នា ប្តេជ្ញាចិត្តបន្តបេសកកម្មពិសិដ្ឋរបស់លោក រៀងរាល់ថ្ងៃជាមិនខាន ដើម្បីទាមទារ សិទ្ធិសេរីភាព និងប្រជាធិតេយ្យពេញលេញជូនប្រជាពលរដ្ឋខ្មែរ ហើយការពារបូរណភាពទឹកដី និងឯករាជ្យភាពជាតិយើង”។
ចំណែកលោក លី សុផាណា អ្នកនាំពាក្យសាលាដំបូងរាជធានីភ្នំពេញ បានថ្លែងប្រាប់រស្មីកម្ពុជា កាលពីរសៀលថ្ងៃទី១០ ខែឧសភា ថា“នៅថ្ងៃទី១១ ខែឧសភា យើងនឹងបានឃើញថា លោកកឹម សុខា ចូលឆ្លើយបំភ្លឺនៅសាលាដំបូងរាជធានីភ្នំពេញ ឬក៏មិនចូល បានច្បាស់”ដោយលោកបានបញ្ជាក់ថា ចំពោះចំណាត់ការយ៉ាងណានោះ ចាំលោកជម្រាបជូនព័ត៍មានតាមក្រោយទៀត។
លោកលី សុផាណាបាននិយាយដូច្នេះថា “ស្អែកនឹង (១១ ឧសភា) យើងនឹងឃើញថា គាត់ចូល ឬមិនចូល បានច្បាស់ ហើយនៅពេលនេះចំពោះចំណាត់ការយ៉ាងម៉េចៗ ចាំខ្ញុំជម្រាបជូនព័ត៍មានតាមក្រោយទៀត”។
ដោយឡែក ឯកឧត្តម ឱម យ៉ិនទៀង ប្រធានអង្គភាពប្រឆាំងអំពើពុករលួយ បានលើកឡើងថាអ្នកមានអភ័យឯកសិទ្ធិទាំងអស់មិនអាចប្រឆាំងវិធានការ របស់រដ្ឋាភិបាលឬនគរបាលយុត្តិធម៌នោះទេ។ លោកពន្យល់ថាប្រសិនបើតុលាការចោទប្រកាន់អ្នកមានអភ័យឯកសិទ្ធិទាល់តែ មានការព្យួរអភ័យឯកសិទ្ធិ។
តែលោកបញ្ជាក់បន្ថែមថាប្រសិនបើ ករណីមិនចូលតាមការកោះហៅរបស់តុលាការ លោក កឹម សុខា អាចនឹងត្រូវចាប់ខ្លួនដោយថានេះជាបទល្មើសជាក់ស្តែង។
ឯកឧត្តម ឱម យ៉ិនទៀង មានប្រសាសន៍ថា “លិខិតដែលយើងឃើញថាព្រះរាជអាជ្ញាកោះហៅលោកកឹម សុខា មក លោក កឹម សុខា គាត់មកតាមការកំណត់។ មកដល់គាត់ប្រាប់ថាខ្ញុំតំណាងរាស្ត្រ ខ្ញុំមានអភ័យឯកសិទ្ធិ ខ្ញុំជឿថាព្រះរាជ្ញាថា លោកអាចឆ្លើយសំណួរនេះទេ បើគាត់មិនឆ្លើយក៏អត់ដឹងធ្វើអីគាត់ដែរ គឺគាត់ត្រូវត្រឡប់ទៅវិញ តែគាត់ប្រឆាំងការទៅ សូមជម្រាបថាគាត់បង្កើតបទល្មើសជាក់ស្តែង អារឿងធំមិនគិតទៅជាបង្កើតរឿងមួយធំជាងហ្នឹងទៅទៀត អញ្ចឹងគេមិនចាប់អារឿងគាត់អី សញ្ចារកម្មអីទេ គេចាប់រឿងអាបទល្មើសថ្មី ភ្លាមៗនេះ”។
គួររំលឹកថា កាលពីពេលកន្លងទៅថ្មីៗនេះ លោកកឹម សុខា និងអ្នកតំណាងរាស្ដ្រ២រូបទៀត របស់គណបក្សសង្គ្រោះជាតិត្រូវបានតុលាការរាជធានីភ្នំពេញកោះហៅឲ្យចូល ខ្លួនបំភ្លឺ ករណីបរិហារកេរ្តិ៍កញ្ញា ធី សុវណ្ណថា និងករណីរឿងរ៉ាវផ្លូវភេទរវាងលោក កឹម សុខា និងកញ្ញាស្រីមុំ។ បន្ទាប់ពីមានការកោះហៅពីតុលាការ ក្រុមអ្នកតំណាងរាស្ដ្ររបស់គណបក្សសង្គ្រោះជាតិ ក៏បានចេញសេចក្ដីថ្លែងការរួមមួយដោយបានបដិសេធមិនចូលខ្លួនតាម ការកោះហៅរបស់តុលាការនោះទេ ដោយលើកហេតុផលថា ការចេញដីកាកោះហៅរបស់តុលាការជាការរំលោភអភ័យឯកសិទ្ធិសភារបស់ តំណាងរាស្ដ្រ៕
ចំនួនអ្នកទស្សនា
- ថ្ងៃនេះ7401
- ម្សិលមិញ12561
- សប្តាហ៍នេះ35351
- ខែនេះ57231
- ឆ្នាំនេះ57231
- សរុប20499687