ACUនឹងប្រជុំវិភាគលើពាក្យបណ្តឹងប្រឆាំងមន្ត្រីជាន់ខ្ពស់គ.ជ.បចំនួន៤រូប
05-June-2016 | ដោយ មែន កំសត់
ភ្នំពេញ៖ អង្គភាពប្រឆាំងអំពើពុករលួយ(ACU)នឹងធ្វើការប្រជុំវិភាគលើ ពាក្យបណ្តឹងរបស់សមាគមជ័យលាភីបញ្ញាជនកម្ពុជាដែលបានប្តឹងប្រធាន គ.ជ.ប , អនុប្រធាន , អគ្គលខាធិការររង និងអ្នកនាំពាក្យគ.ជ.ប ពាក់ព័ន្ធការឃុបឃិតគ្នាប្រព្រឹត្តអំពើពុករលួយ នៅថ្ងៃទី០៦ ខែមិថុនា ឆ្នាំ២០១៦ ដោយកិច្ចប្រជុំវិភាគនេះ គឺមានការអញ្ជើញតំណាងដើមបណ្តឹងចំនួន៣រូបចូលរួមផងដែរ។ ចំណែកភាគី គ.ជ.ប មិនត្រូវបានអញ្ជើញចូលរួមនោះទេ។នេះបើតាមការអោយដឹងរបស់លោក ទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ កាលពីព្រឹកថ្ងៃទី០៤ ខែមិថុនា។
លោកទេសរដ្ឋមន្ត្រី បានមានប្រសាសន៍ប្រាប់រស្មីកម្ពុជាថា “យើងបានទទួលពាក្យបណ្តឹងហើយ យើងនឹងដាក់ប្រជុំនៅក្នុងកិច្ចប្រជុំ នៅថ្ងៃទីច័ន្ទ ទី៦ មិថុនា ហើយខាងអង្គការប្រហែលជាមាន៣នាក់ មកចូលរួមស្តាប់ការវិភាគរបស់យើង”។
ចំណែកលោកហង្ស ពុទ្ធា អ្នកនាំពាក្យ គ.ជ.ប បានមានប្រសាសន៍ថា ខាងគ.ជ.ប គ្មានការព្រួយបារម្ភអ្វីទេចំពោះការប្តឹងប្រធានមន្ត្រីគ.ជ.ប ហើយអ្វីដែល គ.ជ.ប ធ្វើកន្លងមក គឺស្របតាមច្បាប់ ស្របតាមនីតិវិធីនិងស្របតាមបទដ្ឋានគតិយុត្តិទាំងឡាយ។
នៅក្នុងពាក្យបណ្តឹងរបស់លោក រស់ សារ៉ុម កាលពីថ្ងៃទី០២ ខែមិថុនា ប្រធានសមាគមជ័យលាភីបញ្ញាជនកម្ពុជាបានជម្រាបជូនលោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយថា សមាគមបានឃ្លាំមើលយ៉ាងដិតដល់ចំពោះការអនុវត្តច្បាប់របស់សមាជិក គ.ជ.ប ទាំង៩រូប ចាប់តាំងពីថ្ងៃប្រកាសចូលកាន់តតំណែងក្នុងខែមេសា ឆ្នាំ២០១៥ សមាគមសង្កេតឃើញថា សមាជិក គ.ជ.ប ទាំង៩រូប ជាពិសេសប្រធាន អនុប្រធាន អ្នកនាំពាក្យ និងអគ្គលខាធិការរង បានឃុបឃិតគ្នាប្រព្រឹត្តអំពើពុករលួយយ៉ាងធ្ងន់ធ្ងរ ក្នុងការតែងតាំងមន្ត្រីរាជការ ចាប់ពីថ្នាក់នាយកដ្ឋាន រហូតដល់អនុការិយាល័យ ក្នុងអគ្គលខាធិការដ្ឋាន នៃគណៈកម្មាធិការជាតិរៀបចំការបោះឆ្នោតបច្ចុប្បន្ន និងបានសូមឲ្យអង្គភាពប្រឆាំងអំពើពុករលួយ ស៊ើបអង្កត និងស្រាវជ្រាវចាត់វិធានការលើករណីនេះ៕
ចំនួនអ្នកទស្សនា
- ថ្ងៃនេះ5511
- ម្សិលមិញ3441
- សប្តាហ៍នេះ8961
- ខែនេះ81701
- ឆ្នាំនេះ558601
- សរុប21001057