ឯកឧត្តម ស្បោង សារ៉ាត់ ប្រធានក្រុមប្រឹក្សាខេត្តព្រៃវែង អញ្ជើញចូលរួមកិច្ចប្រជុំវេទិកាពិគ្រោះយោបល់
25-December-2015 | ដោយ មួយឡា
ព្រៃវែង៖ នាព្រឹកថ្ងៃទី២៤ ខែធ្នូ ឆ្នាំ២០១៥ នៅបរិវេណសាលាស្រុក ស៊ីធរកណ្ដាល មានប្រារព្ធពិធីបើកកិច្ចប្រជុំពិគ្រោះយោបល់ក្រុមប្រឹក្សាខេត្ត ក្រោមអធិបតីភាពឯកឧត្តម ស្បោង សារ៉ាត់ ប្រធានក្រុមប្រឹក្សាខេត្តព្រៃវែង ព្រមទាំងមានការចូលរួមពីសំណាក់ គណៈអភិបាលខេត្ត មន្ត្រីសាលាខេត្ត មន្ទីរអង្គភាពជុំវិញខេត្ត ស្នងការនគរបាលខេត្ត អាវុធហត្ថខេត្ត គណៈអភិបាលស្រុកក្រុមប្រឹក្សាស្រុក អធិការនគរបាលស្រុក អាវុធហត្ថស្រុក ប្រធានការិយាល័យជុំវិញស្រុក ក្រុមប្រឹក្សាឃុំ មេភូមិ និងប្រជាពលរដ្ឋចូលរួមសរុបប្រមាណ ២២៦នាក់។
លោក ម៉ន នីបណ្ឌិត អភិបាលស្រុកស៊ីធរកណ្ដាល បានឡើងធ្វើរបាយការណ៍ស្ដីពីការអនុវត្តការងាររបស់អាជ្ញាធរស្រុករយៈពេល១ឆ្នាំ រួមមានការងាររដ្ឋបាលដែនដី ការងារសន្តិសុខសណ្ដាប់ធ្នាប់ ការបំរើសេវាសាធារណៈ និងការងារអភិវឌ្ឍន៍ ការដោះស្រាយជីវភាពរស់នៅរបស់ប្រជាពលរដ្ឋនៅក្នុងស្រុកស៊ីធរកណ្ដាល ជូនគណៈអធិបតីសមាជិកសមាជិកានៃអង្គវេទិកា ។
ឯកឧត្តម ស្បោង សារ៉ាត់ ប្រធានក្រុមប្រឹក្សាខេត្តបានជំរាបជូនអំពីគាលបំណងនៃវេទិកាពិគ្រោះយោបល់រវាងក្រុមប្រឹក្សាខេត្តនិងប្រជាពលរដ្ឋ ឯកឧត្តមបានបញ្ជាក់ថា ផ្អែកតាមយុទ្ធសាស្ត្ររបស់ថ្នាក់ជាតិក្រសួងដែលពាក់ព័ន្ធត្រូវមានផែនការចុះប្រជុំនៅមូលដ្ឋានក្នុង១ឆ្នាំ៤ដងទៅតាមសភាពជាក់ស្ដែង ។
កិច្ចប្រជុំមូលដ្ឋាននេះមានសារសំខាន់ណាស់គឺយើងបានទទួលព័ត៌មានពីអ្នកចូលរួមទុក្ខលំបាកសេចក្ដីត្រូវការ និងភាពអសកម្មទាំងឡាយរបស់មន្ត្រីនៅថ្នាក់ក្រោមជាតិ ពោលគឺបងប្អូនហ៊ាននិយាយការពិតលើការងារដែលពាក់ព័ន្ធដើម្បីស្វែងរកដំណោះស្រាយ និងកែតំរូវអោយស្របតាមអនុសាស៍ដ៏ខ្ពង់ខ្ពស់របស់រាជរដ្ឋាភិបាល ក្នុងន័យថា “ងូតទឹក ដុះក្អែល សំអាតកាយ” “ឆ្លុះកញ្ជក់បើមានមេរោគ ត្រូវព្យាបាលសង្គ្រោះបន្ទាន់”។
បន្ទាប់មកលោក ម៉ន នីបណ្ឌិត អភិបាលស្រុកបានបញ្ជាក់បន្ថែមអំពីបងប្អូនអ្នកចូលរួមមានការលើកឡើងនៅចំងល់ដែលពាក់ព័ន្ធ ជៀសវាងសួរខុសប្រធានបទ ហើយសំនួរឬសំណើដែលគណៈអធិបតីមន្ទីរជំនាញដោះស្រាយមិនបាន ក្រុមការងារនឹងរៀបចំធ្វើរបាយការណ៍បន្តទៅថ្នាក់ជាតិ។
ក្រោយមកមានតំណាងប្រជាពលរដ្ឋបានលើកសំណូមពរដល់សមត្ថកិច្ច មេត្តាបង្កើនការយកចិត្តទុកដាក់លើការងារសន្តិសុខ ដោយពិនិត្យឃើញថ្មីៗនេះ មានករណីលួច ឆក់ ប្លន់ សំលាប់អាជីវករ ករណីគ្រឿងញៀនចេញសកម្មភាពនៅតាមបណ្ដាខេត្តច្រើនណាស់។
បងប្អូនមួយចំនួនបានកោតសរសើរដល់លោកអភិបាលស្រុកដ៏វ័យក្មេង ត្បិតតែលោកចូលកាន់តំណែងបានរយៈពេលតែជាង១ខែ លោកបានដឹកនាំការងារបានល្អប្រសើរ និងចុះសាកសួរសុក្ខទុកប្រជាពលរដ្ឋនៅមូលដ្ឋានមិនប្រកាន់និន្នាការអ្វីឡើយ ថែមទាំងបានអភិវឌ្ឍការងារនៅក្នុងស្រុកប្រកបដោយអភិបាលកិច្ចល្អ គណនេយ្យភាព តម្លាភាព សក្តិសមជាអ្នកដឹកនាំគំរូនៅមូលដ្ឋាន។
ក្រោយពីបានសាកសួរនិងបកស្រាយពីការងារពាក់ព័ន្ធរួចមក តំណាងប្រជាពលរដ្ឋមូលដ្ឋានបានស្នើសុំអោយមានវេទិកានេះជារៀងរាល់ឆ្នាំដើម្បីអោយពួកគាត់បានយល់ដឹងការងាររបស់ថ្នាក់ដឹកនាំនិងបានលើកនូវរាល់សំណូមពរជូន ទោះបីជាការឆ្លើយតបនៅមានកំរិតក៏ដោយ។
ឯកឧត្តម ស្បោង សារ៉ាត់ ប្រធានក្រុមប្រឹក្សាខេត្តបានលើកឡើងនិងគាំទ្រចំពោះការស្នើសុំរបស់បងប្អូន ហើយបងប្អូនហ៊ាននិយាយត្រង់នូវចំណុចខ្វះខាតរបស់មន្ត្រីការងារអសកម្មទាំងឡាយ រាល់សំណូមពរទាំងឡាយក្រុមការនឹងយកបញ្ចូលក្នុងរបាយការណ៍ប្រជុំនិងធ្វើការផ្ដល់ព័ត៌មានត្រលប់មកតាមរយៈសាលាស្រុកឃុំអោយបានជ្រួតជ្រាប។
ឯកឧត្តមក៏បានថ្លែងអំណរគុណចំពោះលោក លោកស្រីដែលបានចូលរួមវេទិកាពិគ្រោះយោបល់រវាងក្រុមប្រឹក្សាខេត្តនាថ្ងៃនេះ សបញ្ជាក់អោយឃើញថាថ្នាក់ដឹកនាំនិងប្រជាពលរដ្ឋគឺនៅជិតគ្នា មិនឃ្លាតគ្នា ហ៊ាននិយាយត្រង់នូវរាល់ចំណុចខ្វះខាតដើម្បីអោយថ្នាក់លើធ្វើការកែតំរូវនិងមានភាពស៊ីជំរៅ ទទួលបានប្រជាប្រិយភាពនៅមូលដ្ឋាន៕ ដោយ មែន កំសត់
ចំនួនអ្នកទស្សនា
- ថ្ងៃនេះ7431
- ម្សិលមិញ10901
- សប្តាហ៍នេះ22811
- ខែនេះ44691
- ឆ្នាំនេះ44691
- សរុប20487147