លោក ប៊ិន ស៊ីនាថ ជួបសំណេះសំណាលជាមួយប្រជាពលរដ្ឋក្រីក្រ នៅភូមិគោកព្រេជ សង្កាត់សំរោងក្រោម

27-December-2015 | ដោយ ប៊ុនឆាយ

ភ្នំពេញ៖ នាព្រឹកថ្ងៃទី ២៧ ខែធ្នូ ឆ្នាំ ២០១៥ នៅភូមិសាស្ត្រ ភូមិគោកព្រេជ សង្កាត់សំរោងក្រោម ខណ្ឌពោធិ៍សែនជ័យ បានប្រារព្ធពិធីសំណេះសំណាលជាមួយប្រជាពលរដ្ឋក្រីក្រ ចំនួន ៦ គ្រួសារ។

ពិធីសំណេះសំណាល មានការអញ្ជើញចូលរួមពីប្រធានក្រុមចំនួន ១០រូប មកពីភូមិគោកព្រេជ និងប្រជាពលរដ្ឋទីទ័លក្រចំនួន ១២នាក់ មកពី ៦គ្រួសារ លោកយ៉ាន់ យ៉ន ប្រធានភូមិ លោក ចេង ចិន ចៅសង្កាត់រង លោក ពេញ ហួរ អនុប្រធានក្រុមការងារ ក្រោមអធិបតីភាពលោក ប៊ិន ស៊ីនាថ ប្រធានក្រុមការងារចុះជួយសង្កាត់សំរោងក្រោម។

នាឱកាសនោះដែរ លោក ប៊ិន ស៊ីនាថ ប្រធានក្រុមការងារ បានមានមតិសំណេះសំណាលទៅកាន់បងប្អូនប្រជាពលរដ្ឋដែលមានជីវភាពទីទ័លក្រ និងអ្នកចូលរួមពោរពេញទៅដោយបរិយាកាសរីករាយស្និទ្ធស្នាល និងកក់ក្ដៅជាទីបំផុត។

លោកប្រធានក្រុមការងារក៏បានបញ្ជាក់ផងដែរថា ដោយអនុវត្តតាមគោលនយោបាយរបស់គណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រមុខដឹកនាំ តែងតែគិតគូរអំពីសុខទុក្ខ ជីវភាពរស់នៅរបស់បងប្អូនប្រជាពលរដ្ឋ ជានិច្ចកាល។ លើសពីនេះទៅទៀត ដើម្បីសម្រួលដល់តម្រូវការក្នុងជីវភាព ជាចំបងនោះ ក្រុមការងារយើងបាននាំមកនូវសម្ភារៈ និងថវិកា មួយចំនួន ជូនដល់ក្រុមគ្រួសារនីមួយៗដែលបានចូលរួម។ ថ្វីត្បិតសំភារៈថវិកានេះមានចំនួនតិចតួចយ៉ាងណាក៏ដោយ ក៏អាចសំរាលនិងជួយសំរួលដោះស្រាយជីវភាពបានមួយកំរិតដែរ។

ជាចុងបញ្ចប់ លោកក៏បានមានប្រសាសន៍ ផ្តាំផ្ញើ និងថ្លែងអំណរគុណដល់បងប្អូនដែលបានឆ្លៀតពេលវេលា យ៉ាងមមាញឹកពីការច្រូតកាត់ប្រមូលផល មកចូលរួមជួបជុំក្នុងឱកាសនេះ និងជូនពរឲ្យបងប្អូនទាំងអស់មានសុខភាពល្អ សុខសប្បាយក្នុងក្រុមគ្រួសារ។ដោយ សៀម ហ៊ុន