អភិបាលខេត្តព្រះវិហារ អំពាវនាវឲ្យអង្គការសង្គមស៊ីវិល និងពលរដ្ឋនៅឃុំប្រមេរ វិលទៅលំនៅដ្ឋានដោះស្រាយបញ្ចប់បញ្ហាដីធ្លី
30-December-2015 | ដោយ មួយឡា
ព្រះវិហារ៖ ឯកឧត្តម អ៊ុំ ម៉ារ៉ា អភិបាលខេត្តព្រះវិហារ បានថ្លែងអំពាវនាវដល់អង្គការសង្គមស៊ីវិលទាំងឡាយជាពិសេសប្រជាពលរដ្ឋផ្ទាល់ នៅឃុំប្រមេរប្រមាណពី២០ទៅ៣០នាក់បង្ហាញឆន្ទះពិតប្រាកដ វិលទៅលំនៅដ្ឋានវិញ ដើម្បីដោះស្រាយបញ្ចប់បញ្ហាដីធ្លីដែលបានកើតឡើង រហូតដល់ពួកគាត់មកតវ៉ា នៅមុខសាលាខេត្តដោយមិនព្រមត្រឡប់ទៅវិញបើទោះបីខាងអាជ្ញាធរខេត្ត និងមន្ត្រីពាក់ព័ន្ធបានចូលរួមដោះស្រាយជូនជាបន្តបន្ទាប់ក៏ដោយនោះ ។
បន្ថែមលើបញ្ហានេះ សាលាខេត្តព្រះវិហារ នៅថ្ងៃទី២៨ ខែធ្នូ ឆ្នាំ២០១៥បានចេញលិខិតជូនដំណឹងមួយដែលទើបទទួលបាននៅព្រឹកថ្ងៃនេះបានឲ្យដឹងថា៖ នៅព្រឹកថ្ងៃទី២៨ ខែធ្នូ ប្រជាពលរដ្ឋប្រមាណ៣០នាក់ នៅឃុំប្រមេរ ស្រុកត្បែងមានជ័យ បានឡើងមកតវ៉ានៅមុខសាលាខេត្តដោយមានផលប៉ះពាល់ជាមួយក្រុមហ៊ុនវិនិយោគដាំអំពៅផលិតស្ករស ឡាន ហ្វេង ។
សាលាខេត្តព្រះវិហារ មានការសោកស្តាយយ៉ាងខ្លាំង ចំពោះការឡើងមកតវ៉ាទាមទារដីធ្លីរបស់បងប្អូនប្រជាពលរដ្ឋ ដែលកន្លងមករដ្ឋបាលខេត្តរួមជាមួយមន្ទីរជំនាញបានខិតខំ ដោះស្រាយទំនាស់ដីធ្លីរបស់ប្រជាពលរដ្ឋឃុំប្រមេរនិងក្រុមហ៊ុនវិនិយោគ ហើយយន្តការដោះស្រាយនេះ ត្រូវបានគណៈកម្មការទី១របស់រដ្ឋសភា និងព្រឹទ្ធសភាវាយតម្លៃនិងទទួលស្គាល់ការប្រឹងប្រែងរបស់រដ្ឋបាលខេត្តទៀតផង។
ជុំវិញបញ្ហាដីធ្លីនេះ អភិបាលរងខេត្តព្រះវិហារ លោក សុខ ហៃ បានប្រាប់ឲ្យដឹងនៅព្រឹកថ្ងៃទី៣០ ខែធ្នូ ឆ្នាំ២០១៥នេះថា ជម្លោះដីធ្លីរវាងប្រជាពលរដ្ឋនៅឃុំប្រមេរ និងក្រុមហ៊ុនវិនិយោគខាងលើនេះ បានកើតឡើងនៅអំឡុងឆ្នាំ២០១២។
លោកបានបញ្ជាក់ថា ប្រជាពលរដ្ឋប្រមាណតែ២០ទៅ៣០នាក់ ប៉ុណ្ណោះបានឡើងមកតវ៉ានៅមុខសាលាខេត្ត ហើយដេកចាំនៅទីនោះបើទោះបីអាជ្ញាធរខេត្តប្រាប់ឲ្យពួកគាត់ត្រឡប់ទៅវិញ ដើម្បីដោះស្រាយក៏ពួកគាត់មិនទៅដែរ មិនដឹងថា ពួកគាត់ចង់បានអីទៀត។
លោក សុខ ហៃ អភិបាលរងខេត្ត បានរំលឹកថា កន្លងទៅប្រជាពលរដ្ឋទាំងនេះសុំឲ្យអាជ្ញាធរចេញដីការក្សាការពារលើដីសហគមន៍ ដែលមានផ្ទៃក្រឡា ជិត៣ម៉ឺនហិចតាដែលត្រូវគ្របដណ្តប់ផ្ទៃដី ឃុំប្រមេរទាំងមូល ប៉ះចូលដីស្រុកឆែបប្រមាណជិត៥ពាន់ហិចតា ប៉ះពាល់ដីឯកជន ប៉ះពាល់ដីវិនិយោគរបស់ក្រុមហ៊ុនដែលបានបង្កើតផលិតស្ករស ហើយដំណើរការនៅខែមិនា ឆ្នាំ២០១៦នេះ នឹងប៉ះពាល់ព្រៃអភិរក្ស ព្រះរការទៀតផង ដែលរដ្ឋបាលខេត្តបានប្រជុំជាមួយមន្ត្រីពាក់ព័ន្ធ និងសង្គមស៊ីវិល កន្លងមកហើយឯកភាពមិនយល់ព្រមនោះឡើយ ។
អភិបាលរងខេត្តរូបនេះ បានបញ្ជាក់ទៀតថា នាពេលកន្លងទៅខាងក្រុមការងារបានចុះវាស់ដីធ្លីជូនពួកគាត់ ហើយប្រជាពលរដ្ឋខ្លះ មានផ្ទៃដីដាំដុះអាស្រ័យផលប្រមាណកន្លះហិចតា ពេលនោះក្រុមការងារសម្រេចវាស់ជូនបន្ថែម២ហិចតាតែពួកគាត់ទាមទាររហូតដល់ ៥ហិចតា ទៅ១០ហិចតា ដែលយើងមិនអាចធ្វើជូនបានទើបធ្វើឲ្យមានការតវ៉ាជាបន្តបន្ទាប់យ៉ាងដូច្នេះ៕ ដោយ មែន កំសត់
ចំនួនអ្នកទស្សនា
- ថ្ងៃនេះ3591
- ម្សិលមិញ12561
- សប្តាហ៍នេះ31541
- ខែនេះ53421
- ឆ្នាំនេះ53421
- សរុប20495877