សាលារាជធានីភ្នំពេញ៖ អ្នកផលិតនិងអ្នកលក់ស្រាខុសបច្ចេកទេស ត្រូវមានទោស
08-January-2016 | ដោយ មួយឡា
ភ្នំពេញ៖ ម្ចាស់សិប្បកម្មនិងម្ចាស់អាជីវកម្ម ដែលលក់និងផលិតស្រាខុសបច្ចេកទេស នឹងត្រូវដាក់ទោសទណ្ឌទៅតាមច្បាប់។ នេះបើតាមការអះអាងរបស់មន្ត្រីសាលារាជធានីភ្នំពេញ ។
លោក ប៊ុន សេរី អភិបាលរងរាជធានីភ្នំពេញ ថាអាជ្ញាធរ បានចាប់ផ្តើមពង្រឹងការគ្រប់គ្រងកន្លែងផលិតស្រាស និងស្រាកែច្នៃគ្រប់ប្រភេទ ដែលកំពុងដាក់លក់នៅលើទីផ្សារ ក្នុងរាជធានីភ្នំពេញ។ ការចាត់វិធានការនេះ គឺដើម្បីការពារសុខភាពអ្នកបរិភោគ ស្របពេលដែលមានអ្នកស្លាប់ដោយសារពុលស្រាកាន់តែមានចំនួនកើនឡើង។
លោក ប៊ុន សេរី បន្ថែមថា អ្នកលក់ និងអ្នកផលិតស្រា មិនស្របតាមបច្ចេកទេស ដូចជាបន្ថែមជាតិ អេតាណុល និងថ្នាំពុលអង់ទ្រីន ដែលបង្កផលប៉ះពាល់ដល់សុខភាពប្រជាពលរដ្ឋ ត្រូវបានហាមឃាត់។ ហើយប្រសិនបើម្ចាស់សិប្បកម្មឬម្ចាស់អាជីវកម្មនៅតែប្រព្រឹត្ត នឹងត្រូវទទួលទោសទៅតាមច្បាប់។
អភិបាលរងរូបនេះបន្តថា សាលាក្រុង នឹងបង្កើតឱ្យមានគណៈកម្មការចម្រុះមួយ ដើម្បីត្រួតពិនិត្យគុណភាព រួមទាំងជំរុញឱ្យម្ចាស់សិប្បកម្មទាំងនោះ វេចខ្ចប់ មានស្លាក សញ្ញាបញ្ជាក់ប្រភពផលិតផលឱ្យបានត្រឹមត្រូវ ដើម្បីផ្ដល់ព័ត៌មានច្បាស់លាស់ សម្រាប់ការទប់ស្កាត់ឲ្យបានទាន់ពេលវេលានៅពេលមានផ្ទុះការពុលស្រាកើតឡើង។ លោកថា ថ្នាក់ដឹកនាំរាជធានីភ្នំពេញបានដាក់ផែនការឱ្យអាជ្ញាធរខណ្ឌ ទាំង១២ ចុះស្រង់ស្ថិតិ ទីតាំងសិប្បកម្មផលិតស្រា នៅក្នុងមូលដ្ឋាន ដើម្បីឈានទៅការគ្រប់គ្រង គុណភាពនិងសង្វាក់ផលិតកម្មដើម្បីបញ្ជៀសការប៉ះពាល់ដល់ សុខភារបស់ប្រជាពលរដ្ឋ៕
ប្រភព៖ AKP , thmeythmey
ចំនួនអ្នកទស្សនា
- ថ្ងៃនេះ7141
- ម្សិលមិញ10901
- សប្តាហ៍នេះ22521
- ខែនេះ44401
- ឆ្នាំនេះ44401
- សរុប20486857