នាយឧត្តមសេនីយ៍ សុខ ផល បញ្ជាក្រុមការងារឲ្យចុះជួយកុមារីដែលចង់រៀនតែគ្មានលទ្ធភាព នៅស្រុកបាណន់
28-January-2016 | ដោយ មួយឡា
បាត់ដំបង៖ នាយឧត្តមសេនីយ៍ សុខ ផល អគ្គនាយក នៃអគ្គនាយកដ្ឋានអន្តោប្រវេសន៍និង ជាប្រធានក្រុមការងារចុះជួយស្រុកបាណន់ បានបញ្ជាក្រុមការងាររបស់លោកចុះទៅសួរនាំ និងផ្គត់ផ្គង់ដល់កុមារី ហួច ឡៃហៀក ដែលមានចិត្តចង់រៀន តែខ្វះលទ្ធភាពនៅឃុំភ្នំសំពៅ ស្រុកបាណន់ បានរៀនសូត្ររហូតដល់ចប់ចុងចប់ដើម។
ឧត្តមសេនីយ៍ត្រី សាន ហាក់ ស្នងការរងនគរបាលខេត្តបាត់ដំបង អនុប្រធានថ្នាក់ជាតិចុះជួយស្រុកបាណន់ និងជាប្រធានក្រុមការងារចុះជួយឃុំភ្នំសំពៅ បានដឹកនាំក្រុមការងារចុះពិនិត្យមើលដល់មូលដ្ឋាន នៅសាលារៀនជួបជាមួយក្មេងស្រីនិង អ្នកគ្រូ លោកគ្រូ ក្នុងសាលា ព្រមទាំងចុះដល់ផ្ទះស្នាក់នៅរបស់ក្មេងស្រីផ្ទាល់ ទាំងជីតាខាងឪពុកនិងខាងម្តាយដើម្បីឲ្យអស់លោកសមាជិកក្រុមប្រឹក្សាស្រុក ឃុំ លោកមេភូមិ ពិសេសលោកមេប៉ុស្តិ៍រដ្ឋបាលឃុំភ្នំសំពៅ ចាត់ចែងឯកសារ មានដូចជាសំបុត្រកំណើតសៀវភៅស្នាក់នៅ។
លោកឧត្តមសេនីយ៍ត្រី សាន ហាក់ បានចុះទៅជួបជីតាខាងឪពុក និងបានជម្រាបថាឲ្យក្មេងស្រីម្នាក់នេះក្នុងចំណោមបងប្អូន៣នាក់មកស្នាក់នៅជុំគ្នាជាមួយជីតាខាងឪពុកវិញ និងបានសម្រួលឲ្យរៀនសូត្រដូចគេឯងតាមបំណងប្រាថ្នារបស់នាងផង។
លោកឧត្តមសេនីយ៍ត្រី សាន ហាក់ ក៏បានថ្លែងអំណរគុណលោគ្រូ អ្នកគ្រូបានយកចិត្តទុកដាក់ដល់ក្មេង និង ផ្តាំផ្ញើដល់លោកគ្រូ អ្នកគ្រូ នៅក្នុងសាលាបឋមសិក្សាកំប៉ូវទាំងអស់ ឲ្យជួយមើលការខុសត្រូវបន្តទៀត ។
ឧត្តមសេនីយ៍ត្រី សាន ហាក់ បានបញ្ជាក់ថា ដំណើរចុះសួរសុខទុក្ខនារសៀលថ្ងៃទី២៧ ខែមករា ឆ្នាំ២០១៦នេះ ដើម្បីសិក្សា ក្នុងគោលបំណងស្រាវជ្រាវឯកសារពាក់ព័ន្ធនិងពិនិត្យស្ថានភាព ជីវភាពរស់នៅគ្រួសាររបស់ក្មេងជាក់ស្តែង ដើម្បីងាយស្រួលដល់ក្រុមការងារតាមជួយឧបត្ថម្ភ ផ្គត់ផ្គង់ ទាំងជីវភាពនិងការរៀនសូត្រ ឲ្យក្មេងមានចំណេះដឹងបានយូរអង្វែងរហូតដល់ទីបញ្ចប់។
សូមបញ្ជាក់ថាកុមារី ហួច ឡៃហៀក ហៅ ហួច ស្រីវិ រស់នៅក្នុងភូមិកំប៉ូវត្បូង ឃុំភ្នំសំពៅ ខេត្តបាត់ដំបង។ នាងមានបងប្អូនចំនួន ៣នាក់ រាល់ថ្ងៃមិនទទួលបានភាពកក់ក្តៅ ឬការមើលថែទាំពីឪពុក-ម្តាយនោះឡើយ ដោយសារតែជីវភាពបានធ្វើឲ្យឪពុក-ម្តាយរបស់នាងធ្វើចំណាកស្រុកទៅធ្វើការនៅប្រទេសថៃទាំងពីរនាក់។ កុមារី ហួច ឡៃហៀក និងប្អូនៗពីរនាក់ទៀតត្រូវរស់ជាមួយជីតាវ័យចំណាស់ក្នុងស្ថានភាពលំបាករកព្រឹកខ្វះល្ងាច រកល្ងាចខ្វះព្រឹក។
ព្រោះតែស្ថានភាពគ្រួសារនេះ បានធ្វើឲ្យកុមារី ហួច ឡៃហៀក និង ប្អូនៗ របស់នាងគ្មានឱកាសទៅទទួលការអប់រំដូចក្មេងដទៃនោះឡើយ។ តែអំណោយផលពីធម្មជាតិផ្នែកបញ្ញាស្មារតី បានជំរុញឲ្យកុមារីរូបនេះចង់រៀនចង់ទទួលបានចំណេះដឹង និងតែងតែ ដើរលើចម្ងាយផ្លូវប្រមាណ ១គីឡូម៉ែត្រ ទៅលួចមើលគេរៀនជារៀងរាល់ថ្ងៃ៕ ដោយ មែន កំសត់
ចំនួនអ្នកទស្សនា
- ថ្ងៃនេះ6321
- ម្សិលមិញ12561
- សប្តាហ៍នេះ34271
- ខែនេះ56151
- ឆ្នាំនេះ56151
- សរុប20498607