មន្ត្រីកាំកុងត្រូលខេត្តកណ្តាល ចុះត្រួតពិនិត្យចំណីអាហារ នៅផ្សារគគីរ
28-January-2016 | ដោយ ម៉ែន កំសត់
កណ្តាល៖ ខណៈដែល ពិធីបុណ្យចូលឆ្នាំចិន ក៏ដូចជាចូលឆ្នាំខ្មែរខិតជិតចូលមកដល់នោះ សាខាកាំកុងត្រូលខេត្តកណ្តាល ដឹកនាំដោយលោក អ៊ូ ម៉ាន់រិន តាមបញ្ជាផ្ទាល់ពី ឯកឧត្តម ម៉ក់ ពេជ្ជរិទ្ធ ប្រតិភូរាជរដ្ឋាភិបាល ទទួលបន្ទុកអគ្គនាយកដ្ឋានកាំកុងត្រូល បានចុះធ្វើការត្រួតពិនិត្យទំនិញ និងចំណីអាហារខូចគុណភាពនៅផ្សារគគីរ ក៏ដូចជាផ្សារមួយចំនួនទៀតនៅទូទាំងខេត្ត។
ក្នុងការចុះត្រួតពិនិត្យចំណីអាហារ គ្រឿងកំប៉ុងកាលពីព្រឹកមិញនៅផ្សារគគីរ គេបានរកឃើញមានសារធាតុថ្នាំ ដែលត្រូវគេលាយដាក់ក្នុងស្ករ នៅចំណុចតូបលេខ១៥៥ ហើយក៏ត្រូវណែនាំឲ្យម្ចាស់តូបបញ្ឈប់មិនឲ្យយកមកលក់បន្តទៀត។
ជាមួយគ្នានេះ លោក អ៊ូ ម៉ាន់រិន ក៏បានធ្វើការណែនាំដល់បងប្អូនអាជីវករលក់ដូរនៅក្នុងផ្សារគគីរ ចំពោះការដាក់តាំងលក់ផលិតផល ដោយហាមដាច់ខាតមិនឲ្យយកគ្រឿងកំប៉ុងដែលកំពិត យកមកដាក់តាំងលក់ ព្រោះវានាំឲ្យប៉ះពាល់ដល់សុខភាពប្រជាពលរដ្ឋ។ ក្នុងនោះបងប្អូនក្រុមអាជីវករ ក៏គួរតែពិនិត្យកាលបរិច្ឆេទនៅលើកំប៉ុងឲ្យបានត្រឹមត្រូវ និងមិនត្រូវដាក់តាំងលក់ផលិតផលកំប៉ុងដែលហួសកាលបរិច្ឆេទប្រើប្រាស់ឡើយ។ ដោយឡែកចំពោះបងប្អូនលក់ដូរចំណីអាហារវិញ គឺត្រូវធ្វើគម្របគ្របឲ្យជិត ជៀសវាងចំណីអាហារគ្មានគុណភាព៕
ចំនួនអ្នកទស្សនា
- ថ្ងៃនេះ3421
- ម្សិលមិញ12561
- សប្តាហ៍នេះ31371
- ខែនេះ53251
- ឆ្នាំនេះ53251
- សរុប20495707