គណៈអភិបាលខេត្តពោធិ៍សាត់ប្រារព្ធពិធីសន្និបាតបូកសរុបលទ្ធផលការងារប្រចាំឆ្នាំ២០១៥ និងលើកទិសដៅ បន្តឆ្នាំ២០១៦
01-February-2016 | ដោយ ម៉ែន កំសត់
ពោធិ៍សាត់៖ នាព្រឹកថ្ងៃទី០១ខែកុម្ភៈឆ្នាំ២០១៦នៅសាលប្រជុំសាលា ខេត្តពោធិ៍សាត់បានប្រារព្ធពិធីសន្និបាតបូកសរុបលទ្ធផលការងារប្រចាំឆ្នាំ២០១៥ និងលើកទិសដៅការងារសម្រាប់អនុវត្តន៍បន្តឆ្នាំ២០១៦របស់រដ្ឋបាលខេត្តពោធិ៍សាត់ ក្រោមអធិបតីភាព ឯកឧត្តម ខូយសុខាប្រធានក្រុមប្រឹក្សាខេត្តនិងឯកឧត្តម បណ្ឌិត ម៉ៅ ធនិន អភិបាលនៃគណៈអភិបាលខេត្តពោធិ៍សាត់។
ពិធីនេះមានការចូលរួមពី ឯកឧត្តម លោកជំទាវ ជាអភិបាលរងខេត្ត កងកម្លាំងប្រដាប់អាវុធទាំងបី (ស្នងការនគរបាល អាវុធហត្ថ បញ្ជាការសឹករង) មន្ទីរអង្គភាពជុំវិញខេត្ត លោកអភិបាល ក្រុង-ស្រុក ប្រធានក្រុមប្រឹក្សាក្រុងស្រុក និង មេឃុំ-ចៅសង្កាត់ ព្រមទាំងនាយប៉ុស្តិ៍នគរបាលរដ្ឋបាលឃុំ សង្កាត់ទូទាំងខេត្តចូលរួមផងដែរ។
ជាកិច្ចចាប់ផ្ដើមលោកនាយករដ្ឋបាលសាលា ខេត្តពោធិ៍សាត់បានអាននូវរបាយការណ៍ស្ដីពីការងារបូកសរុបលទ្ធផលរដ្ឋបាលដែនដី ក្នុងខេត្ត ប្រចាំឆ្នាំ២០១៥ ដោយផ្ដោតលើការងារសន្តិសុខសណ្ដាប់ធ្នាប់សាធារណៈ ការងារអភិវឌ្ឍន៍ ការបំរើសេវាសាធារណៈជូនប្រជាពលរដ្ឋ និងសកម្មភាពរបស់ថ្នាក់ដឹកនាំជាតិចុះមូលដ្ឋាន និងបញ្ហាប្រឈមក៏ដូចជាសំណូមពរ ជូនអង្គសន្និបាតស្ដាប់រួចមក នាឱកាសនោះឯកឧត្តម ខូយសុខាប្រធានក្រុមប្រឹក្សាខេត្តខេត្តពោធិ៍សាត់ ក៏បានមានមតិ ទៅកាន់អង្គសន្និបាតថា ឯកឧត្តម សូមកោតសរសើរចំពោះការចូលរួមកិច្ចប្រតិបត្តិការរបស់អាជ្ញាធរ គ្រប់លំដាប់ថ្នាក់ ដែលខិតខំប្រឹងប្រែងក្នុងការបង្ក្រាបរាល់បទល្មើសមិនឲ្យកើតមានជា ទ្រង់ទ្រាយធំ ថ្វីត្បិតតែវានៅមានបន្តិចបន្តួច តែយើងត្រូវរួមគ្នា បង្ក្រាបនិងស្រាវជ្រាវ ស្វែងរកមុខសញ្ញា ឈានដល់ការចាប់ខ្លួនយកមកផ្ដន្ទាទោស ឯកឧត្តមក៏បានសំណូមពរ ដល់អង្គសន្និបាត ពិសេសអាជ្ញាធរ ស្រុកក្រុង ឃុំសង្កាត់ ត្រូវបន្តការផ្សព្វផ្សាយគោលនយោបាយភូមិឃុំមានសុវត្ថិភាព ធ្វើការបង្ក្រាបល្បែងស៊ីសងគ្រប់ប្រភេទ មិនឲ្យកើតមាននៅមូលដ្ឋាន ហើយបន្តការបំផុសចលនាប្រជាពលរដ្ឋគោរពច្បាប់ចរាចរណ៍ផ្លូវគោកថ្មី ហើយឲ្យម្ចាស់យានយន្តត្រូវរួសរាន់បំពេញឯកសារឲ្យបានគ្រប់គ្រាន់ ជៀសវាងរងនូវការផាកពិន័យ នាថ្ងៃទី១៥ ខែមីនា ឆ្នាំ២០១៦ខាងមុខនេះ ។
បន្ទាប់មកឯកឧត្តម បណ្ឌិត ម៉ៅ ធនិន អភិបាលនៃគណៈអភិបាលខេត្តពោធិ៍សាត់ក៏បានជំរុញឲ្យគ្រប់រដ្ឋបាលស្រុកក្រុង ឃុំសង្កាត់មេត្តារៀបចំបង្កើតនូវបច្ចេកវិទ្យាព័ត៌មានដូចជា (ហ្វេសបុក វ័តសអាប់ឡាញឃ៍) ជាដើម ដើម្បីតាមដាននូវរាល់ព័ត៌មានរបស់ថ្នាក់ជាតិ ថ្នាក់ក្រោមជាតិ ហើយស្រុកក្រុង ឃុំសង្កាត់ មានភាពងាយស្រួលផ្ញើព័ត៌មានទាន់សភាពការណ៍ បានមុននិងរៀបចំឯកសាររបាយការណ៍ជាផ្លូវការតាមក្រោយ។
បន្ទាប់មកឯកឧត្តមអភិបាលខេត្ត ក៏បានថ្លែងនូវអំណរគុណចំពោះសមាជិកសមាជិកា នៃអង្គសន្និបាត ដែលចំណាយពេលចូលរួមក្នុងកិច្ចប្រជុំនាពេលនេះ ប្រកបដោយការទទួលខុសត្រូវខ្ពស់៕
ចំនួនអ្នកទស្សនា
- ថ្ងៃនេះ8201
- ម្សិលមិញ10901
- សប្តាហ៍នេះ23581
- ខែនេះ45461
- ឆ្នាំនេះ45461
- សរុប20487917