ឯកឧត្តម ឃួង ស្រេងរៀបចំពិធីប្រកាសសុពលភាពសមាជិកក្រុមបក្សសង្កាត់ គោករកា
28-February-2016 | ដោយ មែន កំសត់
ភ្នំពេញ៖ នៅទីស្នាក់ការ គណបក្ស ប្រជាជនកម្ពុជា សង្កាត់ គោករកា នាព្រឹកថ្ងៃទី២៧ ខែកុម្ភៈ ឆ្នាំ២០១៦ បានរៀបចំពិធី ចុះសួរសុខទុក្ខ ស្វែងយល់អំពីតំរូវការ សំណូមពរ របស់បងប្អូន និងប្រកាសសុពលភាពសមាជិកក្រុមបក្ស ដែលទើបធ្វើបច្ចុប្បន្នភាពរួច ។
កិច្ចសំណេះសំណាលនេះមានវត្តមានចូលរួម ពីលោក លោក ស្រីជា ក្រុមការងារថ្នាក់គណៈពង្រឹងខណ្ឌ គណៈកម្មាធិការ បក្ស ខណ្ឌ សង្កាត់ ប្រធានសាខាបក្ស អនុប្រធានសាខាបក្សភូមិ និងប្រធានក្រុមបក្ស សរុបចំនួន៤១៦នាក់ ស្ថិត ក្រោមអធិបតីភាព ឯកឧត្តម ឃួង ស្រេង អនុប្រធានគណៈកម្មាធិការ បក្សរាជធានីភ្នំពេញ និងជាប្រធានក្រុមការងារចុះជួយខណ្ឌ ព្រែកព្នៅ។
ក្រោយពីស្ដាប់របាយការណ៍របស់បណ្ដា ខណ្ឌ សង្កាត់ ដែលបានលើកឡើង នូវបទពិសោធន៍ និងបញ្ហាប្រឈមមួយចំនួន ដែលកើតមាន និងជាតម្រូវការចាំបាច់នៅមូលដ្ឋានចំពោះមុខដែលយើងត្រូវរួមគ្នាដោះស្រាយ នៅក្នុងឱកាសនោះឯកឧត្តម ឃួង ស្រេង បានមានមតិ សំណេះសំណាល និងបានពាំនាំ នូវការសាកសួរសុខទុក្ខពីសំណាក់ក្រុមការងារ បក្ស គ្រប់លំដាប់ថ្នាក់ ទៅកាន់បងប្អូន ដែលជា ប្រធាន បក្សសង្កាត់ សាខាភូមិ និងប្រធានក្រុម ហើយឯកឧត្តម បានបានធ្វើការស្នើសុំយ៉ាងទទូត ថា៖ ក្នុងនាមយើងជាមន្ត្រីត្រូវ បម្រើ ការងារសេវាជូនប្រជាពលរដ្ឋ ត្រូវតែមិនភ្លេច អំពីតួនាទី ភារកិច្ច របស់ក្រុមបក្ស ដែលត្រូវពង្រឹង និងត្រៀមខ្លួនមុនជាស្រេចនៅមុន ថ្ងៃបោះឆ្នោតមកដល់ ដើម្បីបង្ហាញអោយឃើញអំពី សាមគ្គីភាព ជំនឿ និងសង្ឃឹមយ៉ាងមុតមាំ មកលើមហាគ្រួសារខ្មែរ ដែលជ្រកក្រោមម្លប់នៃដំបូលតែមួយ គឺ« គណបក្សប្រជាជនកម្ពុជា» តាមនយោបាយដឹកនាំប្រកបដោយ គតិបណ្ឌិត របស់សម្ដេចតេជោ ហ៊ុន សែន នាយករដ្ឋមន្ត្រីជាប្រមុខដឹកនាំ ។
ឯកឧត្តមក៏បានបន្តផងដែរ ថា ៖ចំពោះថ្នាក់ដឹកនាំសង្កាត់ ភូមិ ត្រូវបន្តការយក ចិត្តទុកដាក់ លើការបម្រើសេវា រដ្ឋបាលនានា ជូនប្រជាពលរដ្ឋ ឲ្យបានល្អប្រសើរ ដោះស្រាយនូវទុក្ខលំបាក និងតម្រូវការចម្បង ថែរក្សា ការពារសន្តិសុខសណ្ដាប់ធ្នាប់ អនុវត្តន៍គោលនយោបាយភូមិ សង្កាត់មានសុវត្ថិភាព ចូលរួម អភិវឌ្ឍន៍គ្រប់សកម្មភាពដែលបម្រើដល់មូលដ្ឋាន មានផែនការ សកម្មភាព ចុះ ប្រជុំពង្រឹងស្មារតីដល់សមាជិកក្រុម សាខា និងប្រជាពលរដ្ឋ សំណេះសំណាល សាកសួរ ព័ត៌មាន សំដៅអប់រំ ស្មារតី អារម្មណ៍ អូសទាញ ដើម្បីឲ្យមានជំនឿទុកចិត្តមកលើ អាជ្ញាធរ និងបក្សយើង ហើយត្រូវខិតខំសាងតែសកម្មភាពល្អ មិនគាបសង្កត់ ក្នុងនាមជាមន្ត្រីល្អក្នុងមូលដ្ឋាននិង មានប្រជាប្រីយភាព ភាពទាក់ទាញពីប្រជាពលរដ្ឋ។
ក្រុមការងារ ថ្នាក់រាជធានី ខណ្ឌ សង្កាត់ ភូមិ មានទឹកចិត្តសប្បាយរីករាយក្រៃលែង ភ្លេចអស់នូវភាពនឿយហត់ ដោយសារស្នាមញញឹម របស់បងប្អូនជា មេក្រុម និងសមាជិកដែលបានចូលរួមជួបជុំនាពេល នេះ ហើយសូមបញ្ជាក់ផងដែរថា ៖ នេះជាលើកទី៣ហើយ បន្ទាប់ពីនៅសង្កាត់ពញាពន់ និងសង្កាត់ ពន្សាំង ក្នុងមូលដ្ឋានខណ្ឌព្រែកព្នៅ ដែលបានរៀបចំពិធីចុះជួបសំណេះសំណាលជាមួយបងប្អូន ក្រុមការងារបក្ស និងបានដឹងនូវរាល់បញ្ហាប្រឈម ទុក្ខលំបាកនៅក្នុងមូលដ្ឋាន ហើយយើងនិងរួមគ្នាដោះស្រាយបន្តទៀត ដើម្បីឈានទទួលបានភាពជោគជ័យឲ្យខានតែបាន នូវការបោះឆ្នោត ឆ្នាំ២០១៧ និង២០១៨នាពេលខាងមុខនេះ។
បន្ទាប់មក ឯកឧត្តមប្រធានក្រុមការងារ និងបានប្រកាសទទួលស្គាល់ រចនាសម្ព័ន្ធ បច្ចុប្បន្នភាព ក្រុមបក្ស សមាជិក ក្រុមបក្សនៅតាមសាខាភូមិ ក្នុងសង្កាត់គោករកា ខណ្ឌព្រែកព្នៅចាប់ពីពេលនេះតទៅ និង បានថ្លែងនូវអំណរគុណចំពោះវត្តមាន បក្សគ្រប់លំដាប់ថ្នាក់ដែលបានចូលរួម ក្នុងកិច្ចប្រជុំនេះប្រកបដោយភាពរីករាយ និងក្រៃលែងបំផុត៕
ចំនួនអ្នកទស្សនា
- ថ្ងៃនេះ9801
- ម្សិលមិញ10901
- សប្តាហ៍នេះ25181
- ខែនេះ47061
- ឆ្នាំនេះ47061
- សរុប20489517