លោកជំទាវ ឃួន សុដាវី៖ រាជរដ្ឋាភិបាលកំពុងយកចិត្តទុកដាក់ និងចេញវិធានការជាក់លាក់ ដើម្បីលើកកំពស់សមភាពយេនឌ័រ
07-March-2016 | ដោយ មែន កំសត់
កណ្តាល៖ លោកជំទាវ ឃួន សុដាវី សមាជិការដ្ឋសភា និងជាប្រធានក្រុមការងារគណៈពង្រឹង ស្រុកលើកដែកខេត្តកណ្តាល បានលើកឡើងថា ការមិនយកចិត្តទុកដាក់ជម្រុញថែម ទៀតលើការវិនិយោគលើសមភាពយេនឌ័រ ពង្រឹងភាពអង់អាចដល់ស្ត្រី និងក្មេងស្រី វានាំឲ្យខាតប្រយោជន៍គ្រួសារ និងខាតប្រយោជន៍ដល់សង្គម។
ការលើកឡើងរបស់លោកជំទាវ ឃួន សុដារី បែបនេះធ្វើឡើងខណៈជួបសំណេះសំណាល ជាមួយតំណាងនារីទូទាំងស្រុកលើកដែក ខេត្តកណ្តាល ដែលបានជួបជុំធ្វើពិធីអបអរសាទរទិវានារីអន្តរជាតិ ៨មីនា ឆ្នាំ២០១៦ នាព្រឹកថ្ងៃទី០៦ ខែមីនានេះ ។
លោកជំទាវលើកឡើងថា៖ បើយើងសម្រេចបានសមភាពយេនឌ័រ ដែលធ្វើឲ្យស្ត្រី និងបុរស ជាដៃគូស្មើភាពក្នុងការងារឈានទៅកំរិតសមភាពយេនឌ័រ៥០ លើ៥០ នោះធ្វើឲ្យការកសាងសេដ្ឋកិច្ចគ្រួសារ និងសង្គម សម្រេចបាននូវកំណើនសេដ្ឋកិច្ច ឆាប់រហ័សប្រកបដោយសមធម៌ និងចីរភាព។ សមាជិករដ្ឋសភាមណ្ឌលកណ្តាលរូបនេះបានបន្តទៀតថា បញ្ហាលើកកំពស់សិទ្ធិស្ត្រី កន្លងមកនេះរដ្ឋសភា និងរាជរដ្ឋាភិបាលកម្ពុជា បានអនុម័តច្បាប់នានា និងកំពុងយកចិត្តទុកដាក់ ដាក់ចេញនូវវិធានការជាក់លាក់ជាច្រើន ដើម្បីលើកកម្ពស់សមភាពយេនឌ័រ នេះដោយបានចាត់ទុកស្ត្រី គឺជាឆ្អឹងខ្នងនៃសេដ្ឋកិច្ច និងសង្គមជាតិ ប៉ុន្តែការងារនេះទាមទារឲ្យយើងទាំងអស់គ្នា ចូលរួមវិនិយោគលើសមភាពយែនឌ័រ ទើបសម្រេចបាននូវលទ្ធផលសមភាពយេនឌ័រ ៥០លើ៥០។
លោកជំទាវ បន្ថែមថា ៖លទ្ធផលល្អបានមកពីការខិតខំរបស់រដ្ឋាភិបាល ដឹកនាំដោយសម្តេចតេជោ បច្ចុប្បន្ននេះបង្កើនបានចំនួនស្ត្រីចូលរួម គ្រប់ការងារ ក្នុងសង្គមទាំងក្នុងស្ថាប័នរដ្ឋ ទាំងថ្នាក់ជាតិ រហូតដល់ថ្នាក់ក្រោមជាតិ និងក្នុងវិស័យឯកជន។
ជាមួយគ្នានោះ បានបង្កើនភាពអង់អាចដល់ស្ត្រីឲ្យចូលរួមធ្វើសេចក្តីសម្រេច ព្រមទាំងបន្តជម្រុញឲ្យគ្រប់ស្ថាប័ន ត្រូវបង្កលក្ខណៈជ្រើសរើសប្រឡង មន្ត្រីរាជការឲ្យចូលបម្រើការងារត្រូវមានស្ត្រី ២០-៥០ភាគរយ មិនតែប៉ុណ្ណោះរាជរដ្ឋាភិបាលបានពន្យារអាយុមន្ត្រីដែលជាស្ត្រីចូលនិវត្តន៍ ដល់អាយុ៦០ឆ្នាំ។ លោកស្រីបានបញ្ជាក់ថា ការអប់រំស្ត្រីវ័យក្មេង គឺជាឧបករណ៍ដ៏មានឥទ្ធិពលបំផុតសម្រាប់ការលើកកំពស់សិទ្ធiអំណាចស្ត្រី ទៅថ្ងៃអនាគត។
សូមជំរាបថា នាពេលកន្លងមកមានស្ត្រីជាមេផ្ទះ និងក្មេងស្រីមួយចំនួនក្នុងប្រទេសកម្ពុចា ជួបបញ្ហាប្រឈមនៅឡើយទេ ដូចជាការរំលោភបំពានផ្លូវភេទ អំពើហិង្សាលើស្ត្រី ការជួញដូរផ្លូវភេទ ការបោកបញ្ឆោត ការរើសអើង ភាពក្រីក្រ និងសុខភាពទន់ខ្សោយជាដើម ដែលទាមទារមានការចូលរួមឲ្យមានការចូលរួមលើកកំពស់សិទ្ធិស្ត្រី និងតំលៃគ្រួសារខ្មែរនៅគ្រប់ថ្នាក់ គ្រប់ផ្នែកក្នុងសង្គម។ ក្នុងឱកាសនោះ លោកជំទាវ បានជូនវត្ថុអនុស្សាវរីយ៍ ដល់តំណាងនារីស្រុកលើកដែក ក្នុងពិធីអបអរសាទរនារីអន្តរជាតិ ៨មីនា ឆ្នាំ២០១៦ ម្នាក់ៗ សំពត់សឹង១ និងថវិកា៤ ម៉ឺនរៀល៕
ចំនួនអ្នកទស្សនា
- ថ្ងៃនេះ9081
- ម្សិលមិញ10901
- សប្តាហ៍នេះ24461
- ខែនេះ46341
- ឆ្នាំនេះ46341
- សរុប20488797