លោកស្រី ទេព កូលាប នាំអំណោយចែកជូនដល់ស្ត្រីជាប់ឃុំ នៅមណ្ឌលអប់រំកែប្រែទី២
08-March-2016 | ដោយ មែន កំសត់
ភ្នំពេញ៖ លោកស្រី ទេព កូលាប សាកលវិទ្យាធិការ នៃសាកលវិទ្យាល័យ ភ្នំពេញអន្តរជាតិ (PPIU) និងជាប្រធានកិត្តិយស កាកបាទក្រហមកម្ពុជា ប្រចាំសាកលវិទ្យល័យនេះផ្ទាល់ បានពាំនាំអំណោយជាច្រើន ទៅចែកជូនដល់ស្ត្រី ដែលកំពុងជាប់ឃុំ នៅមណ្ឌលអប់រំកែប្រែទី២(គុកព្រៃស) ប្រមាណ៥៥០នាក់ ក្នុងឱកាសទិវា សិទ្ធិនារីអន្តរជាតិ៨មីនា ខួបលើកទី១០៥ ឆ្នាំ២០១៦នេះ ដើម្បីជួយសម្រួលដល់ការលំបាក របស់បងប្អូនស្ត្រី ដែលកំពុងជាប់ឃុំ និងជាការបង្ហាញពីទឹកចិត្តស្រឡាញ់ ផ្ដល់កម្លាំងចិត្ត បង្កើនភាពស្និទ្ធស្នាល និងជាការគិតគូពីសុខទុក្ខដល់ពួកគេ ដែលជារៀងរាល់ឆ្នាំ លោកស្រី ទេព កូលាប តែងតែជួបសំណេះសំណាល ជាមួយស្ត្រីជាប់ឃុំទាំងនោះជាហូរហែ ។
ក្នុងឱកាសពាំនាំអំណោយ ចែកជូនដល់ស្ត្រីជាប់ឃុំ នៅព្រឹកថ្ងៃទី០៧ ខែមិនា ឆ្នាំ២០១៦នេះ ក៏មានការអញ្ជើញ ចូលរួមពីសំណាក់លោក គឹម សារិន អគ្គនាយកស្ដីទី នៃអគ្គនាយកដ្ឋានពន្ធនាគារ ក្រសួងមហាផ្ទៃ លោកប្រធានមណ្ឌលអប់រំកែប្រែទី២ មន្ត្រីពន្ធនាគារ ព្រមទាំងស្ត្រីជាប់ឃុំឃាំង ប្រមាណជាង៥០០នាក់ ។
លោក គឹម សារិន អគ្គនាយកស្ដីទី នៃអគ្គនាយកដ្ឋានពន្ធនាគារ ក្រសួងមហាផ្ទៃ បានមានប្រសាសន៍ថា មណ្ឌលអប់រំកែប្រែទី២ ជាមណ្ឌលកែប្រែដែលគ្រប់គ្រង ដោយផ្ទាល់ពីអគ្គនាយកដ្ឋានពន្ធនាគារ ក្រសួងមហាផ្ទៃ និងគ្រប់គ្រងជនជាប់ឃុំ ជា២ប្រភេទ មានដូចជា ជនជាប់ឃុំជាអនិតិជន និងជនជាប់ឃុំជាស្ត្រី ដោយមានអាគារឃុំឃាំង ទាំងអស់ចំនួន៣អាគារ ស្មើនឹង១៥បន្ទប់ ហើយបច្ចុប្បន្នជនជាប់ឃុំឃាំង ទាំងអស់មានចំនួន ៨២០នាក់ ស្រី៥៥០ នាក់ ប្រុស២៧០នាក់ ក្នុងនោះ ស្ត្រីមានផ្ទៃពោះ ៩នាក់ និងកូនតាមម្ដាយ ៧នាក់។
លោកបន្តថា អ្នកជាប់ឃុំទាំងអស់ សុទ្ធតែទទួលបាននូវជំនាញ ផ្សេងៗគ្នា ដោយការងារអប់រំកែប្រែ និងការបណ្ដុះបណ្ដាលវិជ្ជាជិវៈ មានជាច្រើនថ្នាក់ និងបានបញ្ចេញទណ្ឌិតជាស្ត្រីធ្វើការងារសិប្បកម្ម ដេរកំទេចក្រណាត់ ដាំដំណាំ សំអាងការ សំណង់ ចិញ្ចឹមត្រី និងការងារកសិកម្ម ជាច្រើនទៀត។ ក្នុងនាមលោកជាអគ្គនាយកពន្ធនាគារ លោកសូមថ្លែងអំណរគុណ យ៉ាងជ្រាលជ្រៅ ចំពោះលោកស្រី ទេព កូលាប សាកលវិទ្យាធិការ នៃសាកលវិទ្យាល័យ ភ្នំពេញអន្តរជាតិ និងសហការីទាំងអស់ ដែលបានអញ្ជើញមកសំណេះសំណាល និងចែកអំណោយ ក្នុងឱកាសទិវាសិទ្ធិនារីអន្តរជាតិ ដោយពុំមានការរើសអើង អ្វីទាំងអស់ ។
ក្នុងឱកាសនោះ លោកស្រី ទេព កូលាប សាកលវិទ្យាធិការ នៃសាកលវិទ្យាល័យ ភ្នំពេញអន្តរជាតិ ក៏បានផ្ដាំផ្ញើសួរសុខទុក្ខ និងផ្ដល់កម្លាំងចិត្តដល់ស្ត្រីជាប់ឃុំទាំងអស់ ឲ្យចេះតស៊ូ ក្នុងជីវិត កុំអស់សង្ឃឹម ត្រូវចេះតស៊ូរៀនជំនាញ ចេះស្រឡាញ់ខ្លួនឯង និងអ្នកនៅជុំវិញខ្លួន ផ្ដល់អំពើល្អឲ្យខ្លួនឯង និងអ្នកដទៃ ហើយសង្ឃឹមថា ពេលបានរួចទោសចេញទៅវិញ នឹងនាំគ្នាសាងតែអំពើល្អ ចេះកែប្រែកំហុសរបស់ខ្លួន ក្លាយជាពលរដ្ឋល្អក្នុងសង្គមជាតិ។
លោកស្រីសាកលវិទ្យាធិការរូបនេះ បានសង្កត់ធ្ងន់ថា៖ លោកស្រីនឹងសង្ឃឹមថា បងប្អូនស្ត្រីទាំងអស់ ដែលកំពុងជាប់ឃុំ នៅទីនេះនឹងមានសុខភាពល្អ បានរួចទោសមានសេរីភាព ក្នុងពេលឆាប់ៗនេះ ។ ក្នុងពេលនេះ ទោះបីជាអំណោយមាន លក្ខណៈតិចតួចក្ដី តែក៏ជាការបង្ហាញឲ្យឃើញ ពីការយកចិត្តទុកដាក់ ផ្ដល់នូវក្ដីអាណិតស្រឡាញ់ នៅក្នុងថ្ងៃជាពិសេសនេះ ។តម្លៃ និងគុណធម៌របស់មនុស្សយើងជាស្ត្រី ត្រូវចេះឲ្យតម្លៃខ្លួនឯង មិនចាំបាច់បុរសជាអ្នកឲ្យតម្លៃយើងនោះទេ ។
លោកស្រីចង់ឲ្យស្ត្រីជាប់ឃុំទាំងអស់ ត្រូវចេះឲ្យតម្លៃខ្លួនឯង ធ្វើអ្វីជាអំពើល្អ បើយើងចង់បានអំពើល្អ លុះត្រាតែយើងធ្វើអំពើល្អជាមួយអ្នកដទៃ ទើបអំពើល្អនោះ ត្រឡប់មកយើងវិញ ។
សូមបញ្ជាក់ថា អំណោយដែលបានចែជូនដល់ស្ត្រីជាប់ឃុំ ប្រមាណ៥៥០ នាក់ ក្នុងឱកាសនោះ មានដូចជា ទឹកត្រី ទឹកស៊ីអ៊ីវ មី ទឹកដោះគោ សំឡីអនាម័យ និងថវិកា មួយចំនួនទៀត ៕
ចំនួនអ្នកទស្សនា
- ថ្ងៃនេះ4291
- ម្សិលមិញ10901
- សប្តាហ៍នេះ19671
- ខែនេះ41551
- ឆ្នាំនេះ41551
- សរុប20484007