ឯកឧត្តម នេត សាវឿន ជំរុញឲ្យក្រុមការងារពង្រឹង ពង្រីក និងចងក្រងក្រុមបក្សដោយគុណភាព
09-March-2016 | ដោយ មែន កំសត់
ព្រៃវែង៖ នៅក្នុងកិច្ចប្រជុំផ្សព្វផ្សាយសភាពការណ៍ថ្មី និងទិសដៅការងារគណបក្សក្នុងស្រុកកញ្ជ្រៀច នាថ្ងៃទី៨ ខែមីនា ឆ្នាំ២០១៦ នៅទីស្នាក់ការគណបក្ស ប្រជាជនកម្ពុជាស្រុកកញ្ជ្រៀច ឯកឧត្តម នេត សាវឿន បានថ្លែងថា ៖ដើម្បីឲ្យការបោះឆ្នោតជ្រើសរើសក្រុមប្រឹក្សា ឃុំ-សង្កាត់ អាណត្តិទី៤ ឆ្នាំ២០១៧ និងការបោះឆ្នោតសកល ឆ្នាំ២០១៨ ខាងមុខទទួលបានជោគជ័យ និងកើនអសនៈ ក្រុមការងារត្រូវរៀបចំយន្តការឲ្យបានច្បាស់លាស់ និងធ្វើផែនការបច្ចុប្បន្នភាពសមាជិកបក្ស ដើម្បីក្តាប់ឲ្យបានពីចំនួនសមាជិកណាខ្លះដែលមានវត្តមាននៅក្នុងមូលដ្ឋាន និងសមាជិកណាខ្លះដែលធ្វើចំណាក់ស្រុក។
ឯកឧត្តម នេត សាវឿន សមាជិកអចិន្ត្រៃយ៍គណៈកម្មាធិការកណ្តាល គណបក្សប្រជាជនកម្ពុជា និងជាប្រធានក្រុមការងារថ្នាក់ជាតិចុះជួយស្រុកស្វាយអន្ទរ និងស្រុកកញ្ជ្រៀច បានជំរុញឲ្យបណ្តាក្រុមការងារចុះជួយឃុំ ប្រធានគណបក្សឃុំ និងប្រធានសាខាបក្សភូមិ ត្រូវពង្រឹង ពង្រីក និងចងក្រងក្រុមបក្សដោយគុណភាព ដើម្បីងាយស្រួលគ្រប់គ្រង និងក្តាប់ការប្រែប្រួលសមាជិក។
ឯកឧត្តម នេត សាវឿន បានបន្តថា «ក្រុមការងារឃុំ និងសាខាបក្សភូមិត្រូវពិនិត្យសៀវភៅក្រុមបក្សចុងក្រោយ រួចប្រគល់ឲ្យក្រុមប្រតិបត្តិការ ដើម្បីធ្វើកិច្ចការងារនេះ ជាពិសេសចុះតាមខ្នងផ្ទះដើម្បីពិនិត្យផ្ទៀងផ្ទាត់វត្តមាន មរណភាពសមាជិក ការផ្លាស់ប្តូរទីលំនៅ និងក្តាប់ឲ្យបានពីយុវជនដែលគ្រប់អាយុត្រូវអប់រំ បញ្ចូលជាសមាជិកថ្មីរបស់គណបក្ស»។ជាមួយគ្នានោះ ឯកឧត្តម នេត សាវឿន ក៏បានជំរុញឲ្យមន្ត្រីទាំងអស់ ជាពិសេសសមាជិកក្រុមការងារចុះជួយឃុំ និងមន្ត្រីបក្ស ត្រូវខិតខំបំពេញការងារទៅតាមតួនាទីរៀងៗខ្លួន ដើម្បីបម្រើសំណូមពរ និងសេចក្តីត្រូវការរបស់ប្រជាពលរដ្ឋ ពិសេសនៅពេលប្រជាពលរដ្ឋជួបការលំបាក ហើយត្រូវរួមគ្នាខិតខំដោះស្រាយបញ្ហា ទឹក ភ្លើង ផ្លូវថ្នល់ ឲ្យបានគ្រប់ឃុំ និងរួមសាមគ្គីគ្នាការពារសមិទ្ធផលទាំងឡាយ របស់គណបក្សប្រជាជនឲ្យបានស្ថិតស្ថេរគង់វង្ស។
ក្នុងឱកាសនោះដែរឯកឧត្តម នេត សាវឿន ក៏បានឧបត្ថម្ភថវិកាដល់គណបក្សស្រុកកញ្ជ្រៀចចំនួន៥០ម៉ឺនរៀល គណបក្សឃុំទាំង៨ក្នុងស្រុកកញ្ជ្រៀច ក្នុងមួយឃុំ ៥០ម៉ឺនរៀល និងបានប្រកាសផ្តល់អាហារូបករណ៍ ថ្នាក់បរិញ្ញាបត្រ បរិញ្ញាបត្ររង១០០ភាគរយ ចំនួន១០០នាក់ នៅសាកលវិទ្យាល័យបញ្ញាជាតិ និង១០០ភាគរយ ចំនួន៥នាក់៧០ភាគរយ ចំនួន៣០នាក់ នៅសាកលវិទ្យាល័យមេគង្គកម្ពុជា សម្រាប់ឆ្នាំសិក្សា ២០១៦-២០១៧ ដល់យុវជនគណបក្សស្រុកកញ្ជ្រៀច៕
ចំនួនអ្នកទស្សនា
- ថ្ងៃនេះ4991
- ម្សិលមិញ12561
- សប្តាហ៍នេះ32941
- ខែនេះ54821
- ឆ្នាំនេះ54821
- សរុប20497277