ឯកឧត្ដម ហ៊ុន ណេងបានលើកឡើងថា «សាមគ្គី ជាកត្តាជ័យជំនះ»
01-May-2016 | ដោយ មែន កំសត់
កំពង់ចាម ៖ ឯកឧត្ដម ហ៊ុន ណេងសមាជិកគណៈកម្មាធិការកណ្ដាល គណបក្សប្រជាជនកម្ពុជា សមាជិកគណៈកម្មាធិការអចិន្ត្រៃយ៍រដ្ឋសភា អនុប្រធានគណៈកម្មាធិការថ្នាក់កណ្ដាលចុះជួយខេត្តកំពង់ចាម បានស្នើទៅដល់សមាជិកគណៈកម្មាធិការគណបក្សគ្រប់លំដាប់ថ្នាក់ និងអាជ្ញាធរ សមត្ថកិច្ចគ្រប់លំដាប់ថ្នាក់ត្រូវឈរលើ«សាមគ្គី ជាកត្តាជ័យជំនះ»។
មានប្រសាសន៍បែបនេះ គឺបានធ្វើឡើង នៅក្នុងឱកាស ដែលឯកឧត្ដមអញ្ជើញជាអធិបតីក្នុងកិច្ចប្រជុំបូកសរុបសកម្មភាពការងារ គណបក្ស និងក្រុមការងារចុះជួយស្រុកស្ទឹងត្រង់ប្រចាំត្រីមាសទី១ និងលើកទិសដៅត្រីមាសទី២ ឆ្នាំ២០១៦ កាលពីព្រឹកថ្ងៃទី៣០ ខែមេសា ឆ្នាំ២០១៦នេះ ។
ឯកឧត្ដមមានប្រសាសន៍លើកឡើងទៀតថា ក្នុងត្រីមាសទី១ កន្លងទៅនេះ គណៈកម្មាធិការគណបក្សគ្រប់ថ្នាក់ និងក្រុមការងារគណបក្ស បានផ្តោតការយកចិត្តទុកដាក់ជាសំខាន់ លើការងារបង្កបង្កើនសកម្មភាពចិញ្ចឹមចលនាមហាជន ក្នុងគោលដៅគ្រប់គ្រង និងពង្រឹងគុណភាព សមាជិការបក្សដែលមានស្រាប់ បន្ទាប់ពីយើងបានធ្វើបច្ចុប្បន្នភាព សមាជិកបក្សចប់សព្វគ្រប់ហើយនោះ ។ ទន្ទឹមនឹងនោះ យើងបានខិតខំជំរុញការកសាង និងពង្រីកសមាជិកគណបក្សថ្មីបន្ថែមទៀត ។ ជាមួយគ្នានោះដែរ អាជ្ញាធរ និងភ្នាក់ងារមានសមត្ថកិច្ចគ្រប់ថ្នាក់ បានបំពេញភារកិច្ចប្រកបដោយការទទួលខុសត្រូវ ធ្វើឲ្យការផ្ដល់សេវាសាធារណៈ ជូនដល់ប្រជាពលរដ្ឋកាន់តែត្រូវបានកែលម្អ ការពង្រឹងច្បាប់ និងការអនុវត្តគោលនយោបាយភូមិ ឃុំមានសុវត្ថិភាព កាន់តែមានភាពល្អប្រសើរ ធ្វើឲ្យប្រជាជនកាន់តែមានជំនឿទុកចិត្តមកលើគណបក្សយើង ។
ឯកឧត្ដម ហ៊ុន ណេង ក៏បានវាយតម្លៃនូវសកម្មភាព ដែលបានអនុវត្តយ៉ាងសកម្ម នូវរាល់ទិសដៅភារកិច្ច ដែលគណបក្សបានប្រគល់ជូនប្រកបដោយស្មារតីទទួលខុសត្រូវខ្ពស់ និងជាលទ្ធផលដែលគណបក្ស ក៏ដូចជាក្រុមការងារសម្រេចបាន រយៈពេល ១ត្រីមាស កន្លងទៅ ដោយសារតែការជួយឧបត្ថម្ភគាំទ្រទាំងស្មារតី និងសម្ភារៈពីសំណាក់ឯកឧត្ដម លោកឧកញ៉ា លោក លោកស្រីទាំងអស់ ដែលបានបង្កលទ្ធភាពសម្រាប់ចិញ្ចឹមចលនា និងការឃោសនាអប់រំ នយោបាយសតិអារម្មណ៍ ធ្វើឲ្យប្រជាជន មហាជនមានជំនឿទុកចិត្ត និងគាំទ្រ ចំពោះគណៈបក្សប្រជាជន និងរាជរដ្ឋាភិបាល ។
ដោយឡែក ដើម្បីឈរលើមូលដ្ឋានក្ដាប់ជាប់នូវតួនាទីភារកិច្ចរួម ក្នុងគោលដៅយុទ្ធសាស្ត្ររបស់គណបក្ស ឯកឧត្ដម សមាជិកគណៈកម្មាធិការកណ្ដាល បានជំរុញដល់គណបក្សគ្រប់ថ្នាក់ និងគួរគប្បីយកចិត្តទុកដាក់អនុវត្ត ជាបន្ទាន់ចំពោះមុខ ជាពិសេស លើការអនុវត្តយុទ្ធសាស្ត្រផ្នែកកិច្ចការនយោបាយសន្តិសុខសណ្ដាប់ធ្នាប់ សង្គម សេដ្ឋកិច្ច ដោយរក្សាសន្តិភាព ស្ថិរភាពនយោបាយ សន្តិសុខសណ្ដាប់ធ្នាប់សង្គម ឲ្យបានរឹងមាំលើមូលដ្ឋានបន្តខិតខំលើកកម្ពស់សមត្ថភាព ការទទួលខុសត្រូវរបស់កម្លាំង ក្នុងការបំពេញភារកិច្ច ពង្រឹងការគោរពច្បាប់ ការចូលរួមរបស់ប្រជាពលរដ្ឋ និងការអនុវត្តគោលនយោបាយភូមិ ឃុំមានសុវត្ថិភាព ។
លើសពីនេះទៅទៀត ក៏ត្រូវគិតគូរ និងយកចិត្តទុកដាក់ អំពីជីវភាពរស់នៅរបស់ប្រជាពលរដ្ឋ ជាពិសេស ក្នុងមូលដ្ឋានមួយចំនួន ដែលអាចនឹងប្រឈមទៅនឹងខ្វះខាតទឹក និងការត្រៀមបង្ការជាមុនទៅលើគ្រោះមហន្តរាយផ្សេងៗ ស្របទៅតាមអនុសាសន៍របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការដាក់ចេញនូវគោលការណ៍ចែកចាយទឹកជូនប្រជាពលរដ្ឋឲ្យបាន ទាន់ពេលវេលា ។ដូចគ្នានោះដែរ សមាជិកគណៈកម្មាធិការគណបក្ស និងអាជ្ញាធរ សមត្ថកិច្ចគ្រប់លំដាប់ថ្នាក់ ក៏ត្រូវខិតខំយកចិត្តទុកដាក់ ក្នុងការផ្ដល់សេវាសាធារណៈ ជូនដល់ប្រជាពលរដ្ឋ ឲ្យបានកាន់តែប្រសើរថែមទៀត ។
សូមបញ្ជាក់ដែរ កិច្ចប្រជុំបូកសរុបសកម្មភាពការងារគណបក្ស និងក្រុមការងារចុះជួយស្រុកស្ទឹងត្រង់ប្រចាំត្រីមាសទី១ និងលើកទិសដៅត្រីមាសទី២ ឆ្នាំ២០១៦ បានដំណើរការតាមរបៀបវារៈ ១ព្រឹក តាមរយៈ ការអានរបាយការណ៍បូកសរុបការងារគណបក្ស និងសកម្មភាពក្រុមការងារចុះជួយស្រុកប្រចាំត្រីមាសទី១ និងទិសដៅត្រីមាសទី២ ព្រមទាំង កិច្ចពិភាក្សានានា របស់សមាជិក សមាជិកា នៃអង្គប្រជុំ ទាក់ទងទៅនឹងសភាពការណ៍គ្រប់ផ្នែក នៅក្នុងមូលដ្ឋាន ៕
ចំនួនអ្នកទស្សនា
- ថ្ងៃនេះ8171
- ម្សិលមិញ10901
- សប្តាហ៍នេះ23551
- ខែនេះ45431
- ឆ្នាំនេះ45431
- សរុប20487887