វេទិកា​សេដ្ឋកិច្ច​ទេសចរណ៍​សកល​លើក​ទី​៤៖ “​ការកាត់បន្ថយ​រយៈ​ចម្ងាយ​តាមរយៈ​ការតភ្ជាប់​”

16-October-2015 | ដោយ ខ្លុយខ្មែរ-ID-1

ចិន​៖ ឯកឧត្តម ថោង ខុន រដ្ឋមន្ត្រី​ក្រសួងទេសចរណ៍ បាន​ចូលរួម​ជា​វាគ្មិន​នៅក្នុង​កិច្ចពិភាក្សា​ទល់មុខ​គ្នា​រវាង​រដ្ឋមន្ត្រី​ទេសចរណ៍ អ្នក​កសាង​គោលនយោបាយ​ទេសចរណ៍ និង​ផ្នែក​ឯកជន​ក្នុង​វិស័យ​ទេសចរណ៍ នៅក្នុង​វេទិកា​សេដ្ឋកិច្ច​ទេសចរណ៍​សកល​លើក​ទី​៤ ក្រោម​ប្រធានបទ “​ការកាត់បន្ថយ​រយៈ​ចម្ងាយ​តាមរយៈ​ការតភ្ជាប់​” នៅ​ថ្ងៃទី​១៣ ខែតុលា ឆ្នាំ​២០១៥ នៅ​ទីក្រុង​ម៉ា​កាវ សាធារណៈរដ្ឋ​ប្រជា​មា​និ​ចិន ក្រោម​វត្តមាន​ឯកឧត្តម តា​លិ​ប រី​ហ្វៃ អគ្គលេខាធិការ​អង្គការ​ទេសចរណ៍​ពិភពលោក និង​សម្របសម្រួល​ដោយ លោកស្រី Anita Mendiratta នៃ​ទូរទស្សន៍ CNN​។​

​ឯកឧត្តម​រដ្ឋមន្ត្រីក្រសួង​ទេសចរណ៍ បាន​ចូលរួម​នូវ​ទស្សនទាន​មួយចំនួន​ពាក់ព័ន្ធ​ទៅនឹង​ប្រធានបទ​ខាងលើ ដើម្បី​ជំរុញ​សន្ទុះ​កំណើន​ទេសចរ​នៅតាម​បណ្តោយ​វិថី​សូត្រ (Silk Road) ស្រប​ជាមួយនឹង​ការលើកឡើង​របស់ ឯកឧត្តម តា​លិ​ប រី​ហ្វៃ អគ្គលេខាធិការ​អង្គការ​ទេសចរណ៍​ពិភពលោក ក្នុងការ​ជំរុញ​ការអនុវត្ត​គោលនយោបាយ​វិថី​សូត្រ គឺ​ត្រូវ​យកចិត្តទុកដាក់​លើ​ការសម្រួល​បែបបទ​ធ្វើដំណើរ (​ការលើកលែង​ទិដ្ឋាការ ការប្រើប្រាស់ E-Visa និង​សេរីភាព​ក្នុងការ​ហោះហើរ (Fifth Freedom)​។ ព្រមជាមួយ​នោះ ឯកឧត្តម​ក៏ ស្នើ​ឲ្យ​គិតគូ​អំពី​បញ្ហា​រៀនសូត្រ​ភាសា​ដើម្បី​ទំនាក់ទំនង (Communication Languages) ដែល​ក្រៅពី​រៀន​ភាសា​អង់គ្លេស ត្រូវ​រៀន​ភាសា​ចិន​ផងដែរ នៅក្នុង​បណ្តោយ​ប្រទេស​វិថី​សូត្រ​។​

​ដើម្បី​ចាប់យក​កាល្លានុវត្តន៍​ភាព​នៃ​ដែល​កើតចេញពី​ការដាក់ចេញ​នូវ​គោលនយោបាយ និង​កិច្ចសហប្រតិបត្តិការ​ជា​យុទ្ធសាស្ត្រ​នៃ​ក្របខណ្ឌ​វិថី​សូត្រ (Silk Road) ឯកឧត្តម​រដ្ឋមន្ត្រី បាន​លើក​ជា​គោល​គំនិត​ចម្បង​២ ផ្តើមចេញពី​ដាក់ចេញ​សេចក្តីប្រកាស​សៀមរាប​ស្តីពី​ទេសចរណ៍ និង​វប្បធម៌ នៃ​សន្និសីទ​ពិភពលោក​ស្តីពី​ទេសចរណ៍ និង​វប្បធម៌​លើក​ទី​១ (​កាលពី​ខែកុម្ភៈ ឆ្នាំ​២០១៥ នៅ​សៀមរាប អង្គរ ព្រះរាជាណាចក្រ​កម្ពុជា​) ដើម្បី​ជា​ប្រយោជន៍​រួម​នៃ​ប្រទេស​តាម​បណ្តោយ​វិថី​សូត្រ​នេះ ពិសេស​គឺ​ដើម្បី​ជំរុញ​កំណើន​ទេសចរណ៍វប្បធម៌ តាមរយៈ​ការបង្កើន​ឧត្តមភាព​ប្រកួតប្រជែង (Competitive Advantages) និង​និរន្តរភាព​នៃ​ការអភិវឌ្ឍ (Sustainability)​។​

​ដើម្បី​បង្កើន​ឧត្តមភាព​ប្រកួតប្រជែង​កាន់តែខ្លាំង ឯកឧត្តម​រដ្ឋមន្ត្រី​បានស្នើ​ឲ្យ​ប្រទេស​នៅតាម​បណ្តោយ​វិថី​សូត្រ ខិតខំ​រួមគ្នា​បង្កើត​ផលិតផល​ទេសចរណ៍វប្បធម៌​គំរូ (Model Tourism Product) ដែលជា​ចំណុច​ស្នូល​ក្នុងការ​ទាក់ទាញ​ទេសចរ​ពី​ពិភពលោក​ជាមួយ​ផលិតផល​ប្រកបដោយ​ភាព​ច្នៃប្រឌិត មានការ​គិតគូរ​ដល់​កិច្ចការពារបរិស្ថាន​។

​តើ​ធ្វើយ៉ាងណា​ដើម្បី​ឲ្យ​មាន​ផលិតផល​ល្អ​គឺ​ត្រូវមាន​ការវិនិយោគ (​តាមរយៈ​ផ្នែក​ឯកជន​) ដែលមាន​ការគិតគូរ​ដល់​ទស្សនទាន បៃតង និង​ស្អាត (Green and Clean) ប្រកបដោយ​ភាព​ច្នៃប្រឌិត (Innovative and creative) និង​ការចូលរួម​ដល់​ទំនួល​ខុសត្រូវ​ផ្នែក​សង្គម (Social Corporate Responsibility)​។ ការវិនិយោគ​ត្រូវមាន​មាន​មូលធន ធនធាន និង​ជំនាញ​ច្បាស់លាស់​។

​អ្វី​ជា​លក្ខណៈពិសេស​ជំរុញ​ឲ្យ​មានការ​វិនិយោគ​នៅតាម​ប្រទេស​ស្ថិតនៅ​បណ្តោយ​វិថី​សូត្រ​នេះ គឺ​ដោយសារ​គំនិត​ផ្តួចផ្តើម​គោលនយោបាយ​វិថី​សូត្រ​នេះ​មាន​មូលនិធិ​ផ្ទាល់​ចំនួន ៤០​ពាន់​លាន​ដុល្លា និង​ធនាគារ​វិនិយោគ​ហេដ្ឋារចនាសម្ព័ន្ធ (AIIB) ដែលមាន​ទឹកប្រាក់ ១០០ ពាន់​លាន​ដុល្លា ដែល​ឯកឧត្តម​រដ្ឋមន្ត្រី​បាន​លើក​គំនិត​ផ្តួចផ្តើម​បង្កើត​ឲ្យ​មាន​មូលនិធិ​ទ្រទ្រង់​ការអនុវត្ត​យុទ្ធសាស្ត្រ​វិថី​សូត្រ​ផងដែរ​។

​ព្រម​ជាមួយនេះ ឯកឧត្តម​រដ្ឋមន្ត្រី​បាន​លើកឡើងថា​នៅពេល​មាន​ផលិតផល​ហើយ ចាំបាច់​ត្រូវ​រួមគ្នា​បង្កើន​ការ​ការផ្សព្វផ្សាយ​។ តើ​ផ្សព្វផ្សាយ​បែបណា​? ក្នុងន័យនេះ ឯកឧត្តម​រដ្ឋមន្ត្រី​បានស្នើ​ថា​គួរ​បង្កើត​ឲ្យ​មាន​កម្មវិធី Silk Road នៅក្នុង​កម្មវិធី​ទូរទស្សន៍​នានា ដើម្បី​រួមគ្នា​ផ្សព្វផ្សាយ​សក្តានុពល​ទេសចរណ៍​វិថី​សូត្រ ទទ្ទឹម​នឹង​ការផ្សព្វផ្សាយ​តាម​ប្រព័ន្ធ​ទំនាក់ទំនង​សង្គម (Social Media) ។​

​តើ​ធ្វើយ៉ាងណា​ដើម្បី​ធានា​និរន្តរភាព​នៃ​ការអភិវឌ្ឍ​ទេសចរណ៍​តាម​បណ្តោយ​វិថី​សូត្រ​? ឆ្លើយតប​នឹង​ចំណុច​នេះ ឯកឧត្តម​រដ្ឋមន្ត្រី បាន​គូសបញ្ជាក់ថា​រាល់​ការអភិវឌ្ឍ​ត្រូវ​ផ្តល់​ប្រយោជន៍​ជា​អតិបរមា​ដល់​ប្រជាពលរដ្ឋ​មូលដ្ឋាន ដែល​ត្រូវ​បង្កើន​ការបណ្តុះបណ្តាល​ធនធាន​មនុស្ស​ជំនាញ (Human Capital Development) ដល់​អ្នកពាក់ព័ន្ធ (​ដែល​នឹង​ទទួលផល​ពី​វិស័យ​ទេសចរណ៍​)​។ ក្នុងន័យនេះ គឺ​ត្រូវ​ជំរុញ​ឲ្យ​មានការ​បណ្តុះបណ្តាល​វិជ្ជាជីវៈ​នេះ​តែម្តង (​ជំនាញ Green and Clean) តាមរយៈ​មូលនិធិ Silk Road ដែល​រួមចំណែក​ដល់​ការបង្កើត​សាលា​វិជ្ជាជីវៈ​ទេសចរណ៍ (​ដោយ​បន្ថែម​កម្មវិធីសិក្សា​ពី​វិថី​សូត្រ​) ។

​ក្នុងនោះ អង្គ​វេទិកា​ទាំងមូល​មានការ​ចាប់អារម្មណ៍​ចំពោះ​ការលើកឡើង​អំពី​ការអភិវឌ្ឍ​ទេសចរណ៍​សហគមន៍​នៅតាម​គោលដៅ​ទេសចរណ៍​ដោយ​ភ្ជាប់​ជាមួយ​វិថី​សូត្រ ដើម្បី​ឲ្យ​ផលប្រយោជន៍​បាន​ដល់​សហគមន៍ ផ្ទាល់​។ រីឯ​ការកាត់បន្ថយ​ភាពក្រីក្រ ដែល​ចាំបាច់​ត្រូវ​ជួយ​ដល់​ប្រជាពលរដ្ឋ​មូលដ្ឋាន​នៅតាម​គោលដៅ​ទេសចរណ៍វប្បធម៌​នានា គឺ​ជួយ​បណ្តុះបណ្តាល​ប្រជាជន​មូលដ្ឋាន​ក្នុងការ​រៀបចំផ្ទះ​ស្នាក់ (Homestay) ក​សិ​ទេសចរណ៍​៕

​ប្រភព​៖ ទំព័រ​ក្រសួងទេសចរណ៍​

ចំនួនអ្នកទស្សនា

    19474667

  • ថ្ងៃនេះ221
  • ម្សិលមិញ2971
  • សប្តាហ៍នេះ11371
  • ខែនេះ69811
  • ឆ្នាំនេះ247221
  • សរុប19474667