ភ្ញៀវទេសចរ​បរទេស​មក​ទស្សនា​រមណីយដ្ឋាន​អង្គរ រយៈពេល​ដប់​ខែ​ឆ្នាំ​២០១៥ កើន​ជាង​ឆ្នាំមុន​

06-November-2015 | ដោយ ពល រាជសី

​ភ្នំពេញ​៖ អាជ្ញាធរ​ជាតិ អ​ប្សា​រា បានឱ្យដឹងថា រយៈពេល​១០​ខែ ឆ្នាំ​២០១៥​នេះ ចំនួន​ភ្ញៀវទេសចរ​ដែល​ចូលមក​ទស្សនា​រមណីយ​ដ្ឋា​ន​អង្គរ មាន​ចំនួន​១.៦៧៧.៣៥២​នាក់ បើ​ធៀប​នឹង​ឆ្នាំ​២០១៤ កើនឡើង​ប្រមាណ ២,០៥​ភាគរយ​។ រីឯ​ប្រាក់ចំណូល​ដែល​បានមកពី​ការលក់​សំបុត្រ​ជូន​ភ្ញៀវទេសចរ​បរទេស​ក្នុង​រយៈពេល​១០​ខែ ឆ្នាំ​២០១៥ មាន​ចំនួន​៤៧.៦៨១.០៨០​ដុល្លារ​អាម៉េរិក​កើន ឡើង​ប្រមាណ ០,៦២​ភាគរយ ធៀប​នឹង​ឆ្នាំ​២០១៤​។​

​យោងតាម​សេចក្តីប្រកាស​ព័ត៌មាន​របស់​អាជ្ញាធរ​ជាតិ អ​ប្សា​រា​កាលពី​ថ្ងៃទី​៣​វិច្ឆិកា​នេះ​គឺ​បាន​ឲ្យ​ដឹងថា​សម្រាប់​ខែតុលា ចំនួន​ភ្ញៀវទេសចរ​ដែល​ចូលមក​ទស្សនា​រមណីយ​ដ្ឋា​ន​អង្គរ មាន​ចំនួន​១៥៣.៣០៨​នាក់ ធៀប​នឹង​ខែតុលា ឆ្នាំ​២០១៤ មាន​កំណើន​៤,០៩​ភាគរយ ។ ប្រាក់ចំណូល​ដែល​បានមកពី​ការលក់​សំបុត្រ​ជូន​ជនបរទេស​ចូល ទស្សនា​អង្គរ ក្នុង​ខែតុលា ឆ្នាំ​២០១៥ មាន​ចំនួន ៤.៣៨១.០៤០​ដុល្លារ​អាម៉េរិក កើនឡើង​ប្រមាណ​៤,៥២​ភាគរយ ធៀប​នឹង​ខែតុលា ឆ្នាំ​២០១៤ ។​

​ម្យ៉ាងទៀត​អាជ្ញាធរ​ជាតិ​អប្សរា បានកំណត់​ម៉ោង​ចូល​ទស្សនា​ប្រាសាទ​នានា នៅ​រមណីយដ្ឋាន ប្រវត្តិសាស្ត្រ​អង្គរ ដល់​គ្រប់​ក្រសួង មន្ទីរ ស្ថាប័ន​ជាតិ​-​អន្តរជាតិ សមាគម​ទីភ្នាក់ងារ​ទេសចរណ៍ សមាគម​មគ្គុទ្ទេសក៍ ទេសចរណ៍ មគ្គុទ្ទេសក៍​ទេសចរណ៍​សមាគម សណ្ឋាគារ ក្រុមហ៊ុន​ទេស ចរណ៍ សមាគម​ដឹកជញ្ជូន​ភ្ញៀវទេសចរ អ្នក​ដឹកជញ្ជូន​ភ្ញៀវទេសចរ​ជាតិ​-​អន្តរជាតិ និង​សាធារណ ជន​ទាំងអស់ ចាប់ពី​ថ្ងៃទី​០១ ខែមករា ឆ្នាំ​២០១៦​តទៅ​នឹងមាន​ការកំណត់​ពេលវេលា ដើម្បី​សម្រួល ដល់​ការ​ទស្សនា​ក៏ដូចជា​ធានា​សណ្តាប់ធ្នាប់ សុវត្ថិភាព​ប្រាសាទ​និង​ភ្ញៀវទេសចរ​។​

​អាជ្ញាធរ​ជាតិ​អប្សរា បានកំណត់​ពី​ពេលវេលា​សម្រាប់​ការចូល​ទស្សនា​ប្រាសាទ​នានា​ដូច​ខាង ក្រោម​៖ ភ្ញៀវ​អាច​ចូល​ទស្សនា​ប្រាសាទអង្គរវត្ត និង​ស្រះស្រង់ ចាប់ពី​ម៉ោង ៥:០០​នាទី​ព្រឹក​ដល់ ម៉ោង ៥:៣០​នាទី​ល្ងាច , ប្រាសាទភ្នំបាខែង និង​ប្រាសាទប្រែរូប ចាប់ពី​ម៉ោង ៥:០០​នាទី​ព្រឹក​ដល់ ម៉ោង ៧:០០​នាទី​ល្ងាច និង​ប្រាសាទ​ផ្សេងទៀត ចាប់​បើក​ទស្សនា​ពី​ម៉ោង ៧:៣០​នាទី​ព្រឹក ដល់ ម៉ោង ៥:៣០​នាទី​ល្ងាច​៕​

ចំនួនអ្នកទស្សនា

    19476857

  • ថ្ងៃនេះ2411
  • ម្សិលមិញ2971
  • សប្តាហ៍នេះ13561
  • ខែនេះ72001
  • ឆ្នាំនេះ249411
  • សរុប19476857