Video និងដំណើររឿង ករណីកូនប្រសារចិត្តតិរច្ឆាន កាប់សម្លាប់ប្រពន្ធ កូន ឪពុកម្តាយ យ៉ាងឃោរឃៅ នៅខេត្តកំពង់ចាម
01-December-2015 | ដោយ ពល រាជសី
កំពង់ចាម ៖ ហេតុការណ៍ដ៏ព្រៃផ្សៃមួយបានកើតឡើង ដោយសារកូនប្រសារតិរច្ឆានម្នាក់បានកាប់សម្លាប់ ប្រពន្ធ កូនរបស់ខ្លួន និងម្ដាយក្មេក សរុប ៤នាក់ បណ្តាលឲ្យស្លាប់យ៉ាងអាណោចអាធ័មជាទីបំផុត និងឪពុកក្មេករងរបួសធ្ងន់ ។
ហេតុការណ៍នេះបានកើតឡើងកាលពីវេលាម៉ោង២៣:០៩នាទី ថ្ងៃទី៣០ ខែវិច្ឆិកា ឆ្នាំ២០១៥ នៅចំណុចភូមិពែងមាសជើង ឃុំស្ពឺ ស្រុកចំការលើ ខេត្តកំពង់ចាម។
សមត្ថកិច្ចបានឲ្យដឹងថា ជនសង្ស័យឈ្មោះ អេង ធី អាយុ៤៧ឆ្នាំ មានស្រុកកំណើតនៅភូមិគ ឃុំពោធិ៍រំចាក ស្រុកព្រៃកប្បាស ខេត្តតាកែវ បានមកយកប្រពន្ធនៅភូមិឃុំកើតហេតុខាងលើ និងបានសង់លំនៅដ្ឋាននៅក្បែរផ្ទះម្ដាយបង្កើតរបស់ប្រពន្ធ។
សមត្ថកិច្ចបន្តថា ជារឿយៗជននេះឲ្យតែស្រវឹង និងរករឿងឈ្លោះប្រកែកជាមួយប្រពន្ធរបស់ខ្លួន។ រហូតនៅថ្ងៃកើតហេតុនោះ បន្ទាប់ពីផឹកស៊ីស្រវឹងបុរសជាជនសង្ស័យបានមកដល់ផ្ទះរួចឈ្លោះប្រកែកជាមួយប្រពន្ធរបស់ខ្លួនឈ្មោះ ចន្ទី សុភានី អាយុ៤៥ឆ្នាំ។ ភ្លាមៗនោះឈ្មោះ ចន្ទី សុភានី ក៏បាននាំកូនទៅដេកផ្ទះម្ដាយបង្កើត ដែលមានរបងជាប់គ្នា។ ដោយខឹងសារកំហឹង ជនសង្ស័យក៏ប្រមូលខោអាវដុតចោលនៅក្នុងផ្ទះរបស់ខ្លួន ប៉ុន្តែត្រូវឪពុកក្មេកឈ្មោះ ស្វាយ សាខន អាយុ៦៩ឆ្នាំ និងឈ្មោះ ភឿន ភេទប្រុស នៅផ្ទះទល់មុខគ្នាចេញមកដងទឹកទៅពន្លត់ភ្លើង។
ឃើញបែបនេះ ជនសង្ស័យជាកូនប្រសារផ្ទុះកំហឹងក៏ បានទាញកាំបិតស្ទុះទៅកាប់ឪពុកក្មេក ដែលកំពុងតែជួយបណ្ដាលឲ្យរងរបួសយ៉ាងធ្ងន់ធ្ងរដួលសន្លប់នៅនឹងកន្លែង។ ចំណែកឈ្មោះ ភឿន ក៏ត្រូវជនសង្ស័យដេញកាប់ដែរ តែរត់គេចខ្លួនទាន់ពេល។
បន្ទាប់មកបុរសជាជនសង្ស័យនោះ ក៏បានដើសំដៅទៅផ្ទះឪពុកក្មេក និងបានកាប់ម្ដាយក្មេកចំក ព្រមទាំងបានកាប់ប្រពន្ធរបស់ខ្លួន និងកូន២នាក់ ដែលដេកនៅទីនោះ បណ្តាលឲ្យស្លាប់ទាំង ៤នាក់ យ៉ាងព្រៃផ្សៃបំផុត។
ក្រោយធ្វើសកម្មភាពរួច ជនសង្ស័យបានយកវត្ថុតាងកាំបិតរត់គេចខ្លួនបាត់ស្រមោល។ ចំណែកឪពុកក្មេក ដែលរងរបួសធ្ងន់នោះ ត្រូវបានបញ្ជូនមកមន្ទីរពេទ្យបង្អែកស្រុកចំការលើ និងបញ្ជូនបន្តទៅមន្ទីរពេទ្យបង្អែកខេត្តកំពង់ចាម។
សមត្ថកិច្ចបញ្ជាក់ថា ជនរងគ្រោះទី១.ឈ្មោះ ម៉ៅ យាង ភេទស្រី អាយុ៦៤ឆ្នាំ ត្រូវជាម្ដាយក្មេក, ទី២.ឈ្មោះ ចន្ទី សុភានី ភេទស្រី អាយុ៤៥ឆ្នាំ ត្រូវជាប្រពន្ធ, ទី៣.ឈ្មោះ ធី ស៊ាងហ៊ី ភេទស្រី អាយុ៦ឆ្នាំ ត្រូវជាកូនបង្កើតជនដៃដល់ និងទី៤.ឈ្មោះ ធី សីហា ភេទប្រុស អាយុ៤ឆ្នាំ ត្រូវជាកូនបង្កើតជនដៃដល់។
សពទាំង៤នាក់ ក្រោយពីសមត្ថកិច្ចធ្វើការត្រួតពិនិត្យរួច ក៏ប្រគល់ឲ្យសាច់ញាតិធ្វើបុណ្យតាមប្រពៃណី។
ចំពោះករណីនេះ នគរបាលកំពុងដុតដៃដុតជើងយ៉ាងខ្លាំងក្នុងការស្រាវជ្រាវ ស៊ើបអង្កេតចាប់ខ្លួនជនដៃដល់ ។ ដោយឡែក សមត្ថកិច្ចក៏បានបញ្ជាក់ដែរថា បើបងប្អូនណាបានឃើញជនដៃដល់ សូមជួយផ្ដល់ដំណឹងឲ្យសមត្ថកិច្ចជាបន្ទាន់ សមត្ថកិច្ចនឹងមានរង្វាន់លើកទឹកចិត្ត ៕
Video ពីកោះសន្តិភាព
ចំនួនអ្នកទស្សនា
- ថ្ងៃនេះ1791
- ម្សិលមិញ3321
- សប្តាហ៍នេះ13651
- ខែនេះ33721
- ឆ្នាំនេះ369981
- សរុប19597427