សមត្ថកិច្ចនគរបាលខណ្ឌសែនសុខ ចុះប្រតិបត្តិការបង្ក្រាបបទល្មើសគ្រឿងញៀន និងល្បែងស៊ីសង
18-January-2016 | ដោយ មួយឡា
ភ្នំពេញ៖ នៅថ្ងៃទី១៧ ខែមករា ឆ្នាំ២០១៦ អធិការដ្ឋាននគរបាលខណ្ឌសែនសុខបានដឹកនាំកំលាំង ចុះប្រតិបត្តិការបង្ក្រាបបទល្មើសគ្រឿងញៀន និងល្បែងស៊ីសងនៅក្នុងខណ្ឌសែនសុខរាជធានីភ្នំពេញ។
ចំពោះកិច្ចប្រតិបត្តិការចុះបង្ក្រាបនេះ កម្លាំងសមត្ថកិច្ចខណ្ឌសែនសុខបានធ្វើការឃាត់ខ្លួននិងដកហូតវត្ថុតាងជាច្រើន គួរឲ្យកត់សំគាល់ គឺនៅវេលាម៉ោង១៣និង២០នាទី រសៀលថ្ងៃទី១៧ ខែមករា ឆ្នាំ២០១៦ កម្លាំងអធិការដ្ឋានបានចុះបង្ក្រាបនៅចំណុចផ្លូវរ៉ាដា សង្កាត់ភ្នំពេញថ្មី ឃាត់ខ្លួនជនសង្ស័យបានចំនួន ០៣នាក់ក្នុងករណី ល្បែងស៊ីសងខុសច្បាប់(បៀរ)។
ជនសង្ស័យ ទី១ឈ្មោះ ចាន់ វ៉ាន់ដេត ភេទប្រុសអាយុ២៨ឆ្នាំ មុខរបរជាងផ្សារទ្រុងរថយន្ត ទី២ឈ្មោះ តែម បូរ៉ា ភេទប្រុសអាយុ៣៥ឆ្នាំ មុខរបរលក់កាសែត និងទី៣ឈ្មោះ ឃាំ សុវណ្ណ ភេទប្រុស អាយុ៣២ឆ្នាំ ជនសង្ស័យទាំង០៣ស្នាក់នៅក្នុងភូមិទំនប់សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ចំណែកឯសម្ភារៈដកហូតបានមានដូចជាបៀរ០១ហ៊ូ តុ០១ កម្រាល០១ និងកៅអីមួយចំនួន។
បន្ទាប់មកនៅវេលាម៉ោង១៥និង៣០នាទី នាថ្ងៃដដែលកម្លាំងនគរបាលខណ្ឌបានធ្វើការចុះពិនិត្យរដ្ឋបាលនៅត្រង់ ម្ដុំផ្ទះជួលស្ថិតនៅភូមិត្រពាំងឈូក សង្កាត់ទឹកថ្លា ខណ្ឌសែនសុខ ក៏បានឃាត់ខ្លួនជនសង្ស័យចំនួន០២នាក់ ក្នុងករណីជួញដូរ និងផ្តល់ទីតាំងប្រើប្រាស់សារធាតុញៀន។
សមត្ថកិច្ចបានឲ្យដឹងថា ជនសង្ស័យទី១-ឈ្មោះ សេង លក្ខិណា ហៅស្រីទូច ភេទស្រី អាយុ៣០ឆ្នាំ មុខរបរមិនពិតប្រាកដ ស្នាក់នៅបន្ទប់ជួល ក្នុងកន្លែងទីតាំងឃាត់ខ្លួន និង២-ឈ្មោះ សាន វាសនា ភេទប្រុស អាយុ១៩ឆ្នាំ ស្នាក់នៅបន្ទប់ជួល ទីតាំងកន្លែងឃាត់ខ្លួនព្រមទាំងដកហូតបាន ក្រាមពណ៍សថ្លា២កញ្ចប់ថង់តូច ព្រមទាំងឧបករណ៍ប្រើប្រាស់សារធាតុញៀនមួយចំនួន។
បច្ចុប្បន្នជនសង្ស័យនិងវត្ថុតាងទាំងនោះត្រូវបានសមត្ថកិច្ចបញ្ជូនមក អធិការដ្ឋាននគរបាលខណ្ឌសែនសុខដើម្បីកសាងសំណុំរឿងទៅតាមនីតិវិធីច្បាប់៕ ដោយ មែន កំសត់
ចំនួនអ្នកទស្សនា
- ថ្ងៃនេះ761
- ម្សិលមិញ15191
- សប្តាហ៍នេះ43911
- ខែនេះ65791
- ឆ្នាំនេះ65791
- សរុប20508247