បុរសម្នាក់ស្លាប់ដោយការបាញ់ប្រហារ ទាំងមិនដឹងមូលហេតុ នៅស្រុកភ្នំស្រួច
28-January-2016 | ដោយ ម៉ែន កំសត់
កំពង់ស្ពឺ៖ សេចក្តីរាយការណ៍ពីសមត្ថកិច្ចបានឲ្យដឹងថា នៅវេលាម៉ោង ជាង៩យប់ថ្ងៃទី២៧ ខែមករា ឆ្នាំ២០១៦ មានករណីបាញ់ប្រហារបណ្តាលឲ្យស្លាប់ម្នាក់ស្ថិតនៅដីរបស់ឧកញ៉ា អ៊ុក ឃុន តាមផ្លូវជាតិលេខ៤ គីឡូម៉ែត្រលេខ៨៣ ភូមិទី៦ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ប៉ុន្តែមិនទាន់ដឹងមូលហេតុនៅឡើយទេ។
លោក សោម បូរ៉ា ស្នងការរងនគរបាលខេត្តកំពង់ស្ពឺបានឲ្យដឹងនៅមុននេះបន្តិចថា លោកក៏ទើបបានទទួលព័ត៌មាននេះដែរ ប៉ុន្តែមិនទាន់អាចនិយាយបានទេ ដោយរង់ចាំកម្លាំងនគរបាលរបស់លោក ចុះទៅកាន់ទីនោះសិនដើម្បីសួរនាំនិងស្រាវជ្រាវ។
មន្ត្រីអាវុធហត្ថខេត្តកំពង់ស្ពឺបានឲ្យដឹងថា ជនរងគ្រោះមានឈ្មោះ ស៊ុន ដាវីត អាយុ១៨ឆ្នាំ ជាកម្មករចាំដីឲ្យក្រុមហ៊ុនរបស់ឧកញ៉ា អ៊ុក ឃុន មានស្រុកកំណើតនៅខេត្តកំពង់ចាម ត្រូវបានជនល្មើសបាញ់ចំនួន៣គ្រាប់ចំភ្នែក មាត់ និងច្រមុះ បណ្តាលឲ្យស្លាប់ភ្លាមៗតែម្តង នៅខាងក្រោយក្រុមហ៊ុនឧកញ៉ា អ៊ុក ឃុន។
សម្រាប់មូលហេតុវិញ ត្រូវបានមន្ត្រីអាវុធហត្ថសន្និដ្ឋានថាអាចបណ្តាលមកពីជម្លោះដីធ្លី។ នៅពេលនេះកម្លាំងសមត្ថកិច្ចជាច្រើននាក់បាននឹងកំពុងធ្វើការស្រាវជ្រាវដើម្បីតាមចាប់ជនល្មើស៕ ដោយ មែន កំសត់
ចំនួនអ្នកទស្សនា
- ថ្ងៃនេះ9721
- ម្សិលមិញ15191
- សប្តាហ៍នេះ52871
- ខែនេះ74751
- ឆ្នាំនេះ74751
- សរុប20517207