សមត្ថកិច្ចចាប់បានឃាតកដ៏សាហាវព្រៃផ្សៃ ដែលសម្លាប់កាត់ក្បាលនារីម្នាក់ហើយ
14-February-2016 | ដោយ មែន កំសត់
សៀមរាប៖ ឈាមស្រែកស្បែកហៅ មុននេះបន្តិចសមត្ថកិច្ចចាប់បានឃាតកសម្លាប់កាត់ក្បាលនារីវ័យក្មេងដាច់ចេញពីដងខ្លួននៅផ្ទះសំណាក់ប្រាសាទកែវហើយ ពេលឃាតករយង់ឃ្នងរូបនេះកំពុងយកក្បាលនារីរងគ្រោះដុតកម្ទេចចោលបំបាត់ភស្តុតាងសមត្ថកិច្ច។ ឃាតកម្ម សាហាវ ព្រៃផ្សៃ កាត់ក្បាល ក្មេងស្រីម្នាក់ យកទៅបាត់ នៅផ្ទះសំណាក់ ១កន្លែងផ្លូវផ្សារញ៉ែ ខេត្តសៀមរាប សមត្ថកិច្ចចម្រុះ កំពុងតែត្រួតពិនិត្យ សាកសព។
សាកសពនារីរងគ្រោះ អាចឃាតកសម្លាប់នៅវេលាម៉ោង ៤ទៀបភ្លឺ ថ្ងៃទី១៣ ខែកុម្ភៈ ឆ្នាំ២០១៦នេះ ដោយឃាតកជាជនដៃដល់សម្លាប់យ៉ាងព្រៃផ្សៃ កាត់ក្បាលនារីរងគ្រោះរួចហើយយកក្បាលទៅបាត់ ខណៈដែលសមត្ថកិច្ចរកមិនឃើញក្បាលនោះឡើយ នៅគ្រប់បន្ទប់ទាំងអស់នៃផ្ទះសំណាក់។
ករណីឃាតកម្មដោយកាត់ក្បាលក្មេងស្រី នៅផ្ទះសំណាក់ប្រាសាទកែវ នាព្រឹកថ្ងៃទី១៣ខែកុម្ភៈ នេះ សមត្ថកិច្ចបានរកឃើញអត្តសញ្ញាណ ដោយជនរងគ្រោះមានឈ្មោះ ឡេន សិលា អាយុ ២៤ឆ្នាំ រស់នៅភូមិបឹងខ្នាត ឃុំខ្នាត ស្រុកពួក ខេត្តសៀមរាប។ នេះបើតាមការបំភ្លឺពីម្តាយជនរងគ្រោះ ឈ្មោះ កេង ធីតា។សូមជំរាបថា អំពើឃាតកម្មខាងលើ បានកើតឡើងកាលពីម៉ោង១២ថ្ងៃត្រង់ ទី១៣ ខែកុម្ភៈ ឆ្នាំ២០១៦នេះ ស្ថិតនៅផ្លូវផ្សារញ៉ែ សង្កាត់ស្វាយដង្គុំ ក្រុងសៀមរាប ចំណុចផ្ទះសំណាក់ យីហោប្រាសាទកែវ។លោក អ៊ូ សុផល នាយរងការិយាល័យព្រហ្មទណ្ឌកំរិតធ្ងន់ នៃស្នងការដ្ឋាននគរបាលខេត្តសៀមរាប បានប្រាប់មូលហេតុដែលនាំឲ្យជនដៃដល់សម្លាប់ជនរងគ្រោះនោះ មូលហេតុផ្តើមចេញពីរឿងស្នេហាត្រីកោណ។
លោក អ៊ូ សុផល បានបញ្ជាក់ថា ជនសង្ស័យមានប្រពន្ធរួចហើយតែក្រោយមក មានបញ្ហាជាមួយប្រពន្ធដើម រហូតសុំលែងលះតែលែងមិនទាន់ដាច់ ។
បន្ទាប់មកជនសង្ស័យក៏មានទំនាក់ទំនង ជាមួយនារីរងគ្រោះ រហូតចូលស្តីដណ្តឹង ហើយឈានទៅដល់ការរៀបចំពិធីមង្គលការ ប៉ុន្តែដំណើរការរៀបចំអពាហ៍ពិពាហ៍ទៅមិនរួច ដោយសារតែ ខាងអាជ្ញាធរភូមិសង្កាត់ មិនចេញសំបុត្រអាពាហ៍ពិពាហ៍ឲ្យដោយហេតុថា ជនសង្ស័យមិនទាន់លែងប្រពន្ធដាច់ស្រេច ។
ក្រោយមានបញ្ហានេះកើតហេតុ នារីរងគ្រោះ បានចាត់ទុកថា ជនសង្ស័យបោកប្រាស់រហូតឈ្លោះគ្នា យ៉ាងខ្លាំង ហើយជនសង្ស័យក៏រៀបចំផែនការសម្លាប់ នារីរងគ្រោះ រហូតកាត់ក្បាលតែម្តង។
លោក អ៊ូ សុផល បានបន្តថា ក្រោយធ្វើការស្រាវជ្រាវ កម្លាំងសមត្ថកិច្ចរបស់លោក ក៏បានឈានទៅដល់ការចាប់ខ្លួនជនសង្ស័យរូបនេះ ខណ:កំពុងដុតក្បាលជនរងគ្រោះ នៅខាងក្រោយផ្ទះ ស្ថិតនៅភូមិព្រៃចាស់ សង្កាត់គោកចក ក្រុងសៀមរាប ពោលជិតព្រលានយន្តហោះ។
ជនសង្ស័យរូបនេះមានឈ្មោះ ចាន់ ឆាយយ៉ា ហៅ សំ ភារ៉ាត់ អាយុ៤០ ស្រុកកំណើតនៅខេត្តបាត់ដំបង ហើយនៅពេលនេះ ស្ថិតក្រោមការសាកសួររបស់ នគរបាលជំនាញនៅឡើយ ដើម្បីយកព័ត៌មានលំអិតថែមទៀត៕
ចំនួនអ្នកទស្សនា
- ថ្ងៃនេះ10591
- ម្សិលមិញ15191
- សប្តាហ៍នេះ53741
- ខែនេះ75621
- ឆ្នាំនេះ75621
- សរុប20518077