រៀបការថ្មោងថ្មី ឃាតករមិនប្រណីកាប់សម្លាប់កូន កម្លោះកូនក្រមុំ យ៉ាងអាណោចអាធម
27-February-2016 | ដោយ មែន កំសត់
ក្រចេះ៖ ករណីឃាតកម្មមួយបានកើតឡើង បណ្ដាលឲ្យស្ត្រី ម្នាក់ ស្លាប់បាត់ជីវិត យ៉ាងអណោចអធម ទាំងកាយអាក្រាត និងបុរសម្នាក់រងរបួស។ ហេតុការណ៍នេះកើតឡើងវេលាម៉ោង ១១និង ២០នាទីយប់ថ្ងៃ ទី២៦ ខែកុម្ភៈ ឆ្នាំ២០១៦ ស្ថិតនៅភូមិ មាក់កណ្ដាល ឃុំ ស្រែចារ ស្រុកស្នួល ខេត្ត ក្រចេះ។
តាមរបាយការណ៍ នគរបាលប៉ុស្តិ៍រដ្ឋបាល ឃុំ ស្រែចារ បានឲ្យដឹងថា៖ ជនរងគ្រោះទី១ ឈ្មោះ ម៉ុន ស្រីញឹប ភេទ ស្រី អាយុ ១៨ឆ្នាំ មានទីលំនៅភូមិ-ឃុំ កើតហេតុខាងលើ បានស្លាប់នៅកន្លែងកើតហេតុ (ត្រូវជាកូនក្រមុំ) ទី ២ ឈ្មោះ ឡើក ឡើត ភេទ ប្រុស អាយុ ២១ឆ្នាំ មានទីលំនៅ ភូមិ-ឃុំ ជាមួយគ្នា បានរងរបួសធ្ងន់ បញ្ជូនមកសង្គ្រោះនៅមន្ទីរពេទ្យបង្អែកស្រុកស្នួល (ត្រូវជាកូនកម្លោះ)។
មុនពេលកើតហេតុ ជាថ្ងៃចូលរោង រៀបអាពាហ៍ពិពាហ៍ លុះល្ងាចឡើងកម្មវិធីចូលរោង ចប់សព្វគ្រប់ នៅវេលាម៉ោងប្រហែល៩យប់ ពីរនាក់កូនក្រមុំ និងកូនកម្លោះ បានបណ្តើគ្នាទៅងូតទឹក នៅឯអណ្តូងនៅវាលស្រែ នៅខាងក្រោយផ្ទះ ក៏ត្រូវបានជនមិនស្គាល់អត្តសញ្ញាណ ធ្វើសកម្មភាពកាប់ជនរងគ្រោះ ទាំងពីរនាក់ខាងលើតែម្តង លុះដល់វេលាម៉ោងប្រមាណជាង ១១យប់ទើបក្រុមគ្រួសារបានដឹង។
លោក វរសេនីយ៍ទោ ចាន់ សុខគីម អធិការនគរបាល ស្រុក ស្នួល បានបញ្ជាក់ឲ្យដឹងថា ៖បច្ចុប្បន្នជនសង្ស័យ មានតម្រុយមិនទាន់ស្គាល់ អត្តសញ្ញាណនៅឡើយទេ សមត្ថកិច្ចនគរបាល ជំនាញកំពុងធ្វើការស្រាវជ្រាវ និងកំពុងកសាងសំណុំរឿងតាមនីតិវិធី ៕
ចំនួនអ្នកទស្សនា
- ថ្ងៃនេះ1491
- ម្សិលមិញ15681
- សប្តាហ៍នេះ60331
- ខែនេះ82211
- ឆ្នាំនេះ82211
- សរុប20524667