សមត្ថកិច្ចបង្ក្រាបកាស៊ីណូខុសច្បាប់មួយកន្លែងនៅក្នុងបុរីប្រិមប្រីយ៍
29-February-2016 | ដោយ មែន កំសត់
សៀមរាប ៖ ដើម្បីអនុវត្តឲ្យកាន់តែមានប្រសិទ្ធភាព នូវគោលនយោបាយភូមិ-ឃុំមានសុវត្ថិភាព ថែរក្សាសន្តិសុខ សុវត្ថិភាពជូនប្រជាពលរដ្ឋ ភ្ញៀវទេសចរណ៍ជាតិ អន្តរជាតិ មកស្នាក់នៅទស្សនាកម្សាន្តខេត្តសៀមរាប និងការយកចិត្តទុក ដាក់ខ្ពស់របស់ឯកឧត្តម ឃឹម ប៊ុនសុង អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តសៀមរាប បានដាក់នូវបទបញ្ជាដល់កងកម្លាំងសមត្ថកិច្ចអាវុធហត្ថខេត្ត និង ស្នងការនគរបាលខេត្ត កាលពី រាត្រីថ្ងៃទី២៨ ខែកុម្ភៈ ឆ្នាំ២០១៦ ក្នុងការបង្ក្រាប ទីតាំងកាស៊ីណូខុសច្បាប់មួយកន្លែង ជ្រោកក្រោមស្លាកភោជនីយដ្ឋាន យីហោ សាន់ស៊ាំង ស្ថិតនៅក្នុងបុរីប្រឹមប្រីយ៍ ក្នុងភូមិត្រពាំងសេះ សង្កាត់គោកចកក្រុងខេត្តសៀមរាប ។
កិច្ចប្រតិបត្តិការបង្ក្រាប់ទីតាំងកាស៊ីណូនេះ បានប្រព្រឹត្តធ្វើទៅកាលពីវេលាម៉ោង១៩ និង៣០នាទី ក្រោមការដឹកនាំបញ្ជាផ្ទាល់របស់លោកឧត្តមសេនីយ៍ត្រី អ៊ុំ អមរ៉ា ស្នងការរងនគរបាលខេត្ត, លោកវរសេនីយ៍ឯក ស្រី យូរ៉ា មេបញ្ជាការរងកងរាជអាវុធហត្ថខេត្ត និងដោយមានអាជ្ញាធរក្រុង រួមសហការគ្នាដឹកនាំកម្លាំង បានធ្វើការឃាត់ខ្លួនមនុស្សនៅនឹងទីតាំងលេងល្បែងផ្ទាល់បានចំនួន ១៤នាក់ មានស្រី៥នាក់ ដែលជាបុគ្គលិក ជាអ្នកគ្រប់គ្រង និងសន្តិសុខកាស៊ីណូ ព្រមទាំងអ្នកដែលបានចូលមកលេងល្បែងផងដែរ ។
តាមការបញ្ជាក់របស់លោកវរសេនីយ៍ទោ ថា ដាលុច ប្រធានមន្ទីរយុត្តិធម៌ កងរាជអាវុធហត្ថខេត្ត បានចុះធ្វើការបង្ក្រាបករណីនេះ បានឲ្យដឹងថា ទីតាំងកាស៊ីណូដែលជ្រកក្រោមភោជនីយដ្ឋាន យីហោ សាន់ ស៊ាំង នេះ ត្រូវបានកម្លាំងសមត្ថកិច្ចធ្វើការតាមដានជាយូរមកហើយ ។ នៅថ្ងៃទី ២៧ ខែកុម្ភៈ ឆ្នាំ២០១៦ កម្លាំងយើងបានឃើញទីតាំងនេះ ដឹកនូវសម្ភារៈចូលមកកាន់ភោជនីយដ្ឋាននេះ ដែលសុទ្ធសឹងជាឧបករណ៍ អេឡិចត្រូនិច (ទូហ្គេម) ហើយទីតាំងនេះគឺបានបើកលេងទៅដោយភាពស្ងៀមស្ងាត់ ។ លុះនៅរាត្រីថ្ងៃទី២៨ ខែកុម្ភៈ ២០១៦នេះ ដោយបានកំណត់នឹងក្តាប់បាននូវទីតាំងច្បាស់លាស់ និងទទួលបាននូវបទបញ្ជាពី គណៈ បញ្ជាការឯកភាពខេត្ត កម្លាំងអាវុធហត្ថខេត្ត បានសហការជាមួយកម្លាំងសមត្ថកិច្ចនគរបាលខេត្ត បានចុះធ្វើការបង្ក្រាប ដោយឃាត់ខ្លួនមនុស្សបាន ១៤នាក់ ។ ក្នុងនោះដែរវត្ថុតាងដែលជាឧបករណ៍ សម្រាប់បម្រើការលេងល្បែង រួមមាន ទូហ្គេមបាញ់ត្រី ០៣គ្រឿង ទូហ្គេមបញ្ឈរ ២៨គ្រឿង រ៉ូឡិច ០១គ្រឿង តាបលេងបៀ ចំនួន០៤ កុំព្យូទ័រ ០២គ្រឿង បៀរ ១០កេស កាម៉ារ៉ាសុវត្ថិភាព ០៥គ្រឿង និង សម្ភារៈ តុ កៅអី ជាច្រើន ត្រូវបានកម្លាំងសមត្ថកិច្ច ធ្វើការដកហូតជាវត្ថុតាង ដឹកជញ្ជូនយកមករក្សាទុកនៅទីបញ្ជាការដ្ឋានកងរាជអាវុធហត្ថខេត្តផងដែរ ។
ចំពោះម្ចាស់ទីតាំងនេះ សមត្ថកិច្ចនៅមិនទាន់បានបញ្ជាក់របស់បុគ្គលណាម្នាក់ឡើយ ជាជនជាតិអ្វីនៅឡើយ គឺមានតែអ្នកគ្រប់គ្រង ដែលសមត្ថកិច្ចបានកំពុងសួរនាំ ។ ក្នុងនោះដែរ ក៏មានវត្តមានរបស់លោកស្នងការនគរបាលខេត្ត និង មន្ត្រីតុលាការខេត្ត បានអញ្ជើញទៅដល់ទីតាំងកាស៊ីណូ ក្រោយពេលដែលកម្លាំងសមត្ថកិច្ច ធ្វើការចាប់បញ្ជូនក្រុមអ្នកល្បែងទៅកាន់ទីបញ្ជាការដ្ឋានកងរាជអាវុធហត្ថខេត្ត ៕
ចំនួនអ្នកទស្សនា
- ថ្ងៃនេះ14801
- ម្សិលមិញ15191
- សប្តាហ៍នេះ57951
- ខែនេះ79831
- ឆ្នាំនេះ79831
- សរុប20522287