គូស្នេហ៍ក្មេងវ័យខ្មែរឥស្លាម ណាត់គ្នាផឹកថ្នាំពុលសម្លាប់ខ្លួន
11-March-2016 | ដោយ មែន កំសត់
ពោធិ៍សាត់៖ សេចក្ដីស្នេហាពិតជាមានទំហំធំធេងខ្លាំង គ្មានអ្វីប្រៀបស្មើបានឡើយ មិនថាជាតិសាសន៍ណា ឬជាតិសាសន៍ណាទេ ឲ្យតែងប់ងល់នឹងស្នេហាហើយ ពិបាកនឹងដកខ្លួនចេញណាស់ ហើយបើមានអ្នកមករារាំង ឬភាគីណាមួយ ប្រុងដោះដៃនោះ ភាគីម្ខាងទៀត ប្រាកដជាហ៊ានធ្វើអ្វីៗ ទាំងអស់ ដោយមិនស្ដាយស្រណោះ ជិវិតរបស់ខ្លួននោះទេ។ ជាក់ស្ដែងគូស្នេហ៍ខ្មែរឥស្លាម ក្មេងខ្ចីមួយគូ បានផឹកថ្នាំពុលសម្លាប់ខ្លួនទាំងពីរនាក់ ក្នុងវិហារឥស្លាម ស្ថិតក្នុងភូមិទួលទទឹង ឃុំកញ្ជរ ស្រុកកណ្ដៀង ខេត្តពោធិ៍សាត់ ដោយមិនដឹងពីមូលហេតុច្បាស់លាស់ លុះព្រឹកឡើងម៉ោង០៦៖៣០នាទី ថ្ងៃទី ១០ ខែ មីនា ឆ្នាំ ២០១៦ ទើបមានការភ្ញាក់ផ្អើលតែម្ដង ។
លោកវរសេនីយ៍ត្រី លីវ សេងហ៊ីម អធិការនគរបាលស្រុកកណ្ដៀង បានប្រាប់ ឲ្យដឹងថា តួឯកប្រុសឈ្មោះ សុះ សល់លី អាយុ ២០ឆ្នាំ រស់នៅភូមិកំពង់ឡ ឃុំកំពង់ពោធិ៍ ស្រុកក្រគរ ចំណែកតួឯកស្រីឈ្មោះ ស្មាន តីណូ អាយុ ១៦ឆ្នាំ រស់នៅភូមិឃុំកើតហេតុខាងលើ ។
ប្រភពព័ត៌មានបានឲ្យដឹងថា ពុំមាននរណាដឹងរឿងស្នេហា របស់គូស្នហ៍ទាំងពីរស៊ីជម្រៅដល់កម្រិតណាទេ ប៉ុន្តែគេគ្រាន់តែដឹងថា ពួកគេទាំងពីរនាក់ ស្គាល់គ្នាតាមរយៈទូរស័ព្ទ ហើយក៏មានទំនាក់ទំនងស្នេហា ផ្អែមល្ហែមជាមួយគ្នារហូតមក ។ ផ្ទះរបស់គូរស្នេហ៍ទាំងពីរ មានឃុំនៅជាប់គ្នា ប៉ុន្តែម្ខាងស្រុកកណ្ដៀង ម្ខាងស្រុកក្រគរ ។ ពួកគេបានរឹតចំណងស្នេហ៍ ជាមួយគ្នាជាច្រើនខែមកហើយ និងមិនដឹងថា គេធ្លាប់ជួបមុខគ្នាផ្ទាល់ដែរឬអត់ ឬមួយក៏មានឧបសគ្គ ឪពុកម្ដាយខាងណារារាំងនោះទេ ។
នៅយប់ថ្ងៃទី០៩តួប្រុសបានស្កាត់មក ជួបតួស្រីនៅវិហារឥស្លាម ដោយមិនដឹងថា គេបបួលគ្នាស្បថស្បែ ឬមួយក៏គេសារសងភាសាស្នេហា ដោយរបៀបណានោះទេ លុះព្រឹកឡើងថ្ងៃទី១០ម៉ោង០៦៖៣០នាទីព្រឹក អ្នកស្រុកដើរទៅវិហារ ឃើញដេកស្លាប់ទាំងពីរនាក់ ក៏មានការភ្ញាក់ផ្អើលតែម្ដង។
លោកអធិការបានបញ្ជាក់ថា នៅព្រឹកថ្ងៃទី១០នេះ សមត្ថកិច្ច និង មន្ត្រីជំនាញ បានចុះទៅពិនិត្យនៅកន្លែងកើតហេតុ ឃើញសាកសពជនរងគ្រោះទាំងពីរនាក់ ដេកស្លាប់ក្បែរគ្នា ដោយខាងប្រុសផ្ងា ឯខាងស្រីផ្កាប់មុខ និង មានថ្នាំបំពុលសត្វកុក នៅក្បែរនោះផងដែរ ទើបសន្និដ្ឋានថា ពួកគេទាំងពីរផឹកថ្នាំពុលសម្លាប់ខ្លួន ។ សមត្ថកិច្ចកំពុងស្រាវជ្រាវបន្ត លើករណីនេះដើម្បីរកការពិត ៕
ចំនួនអ្នកទស្សនា
- ថ្ងៃនេះ2551
- ម្សិលមិញ15681
- សប្តាហ៍នេះ61391
- ខែនេះ83271
- ឆ្នាំនេះ83271
- សរុប20525727