សមត្ថកិច្ចឆ្មក់បង្ក្រាបរកឃើញសត្វព្រៃខុសច្បាប់ ១៣ ប្រភេទនៅភ្នំពេញ
16-March-2016 | ដោយ មែន កំសត់
ភ្នំពេញ៖ កន្លែងលក់ដូរផលនេសាទមួយដែលស្ថិតនៅម្តុំផ្សារអូឫស្សី រាជធានីភ្នំពេញត្រូវបានអាជ្ញាធរមានសមត្ថកិច្ចចម្រុះឆ្មក់បង្ក្រាប និងបានរកឃើញសត្វព្រៃល្មើសច្បាប់ចំនួន ១៣ ប្រភេទហើយម្ចាស់ទីតាំងដែលប្រព្រឹត្តល្មើសនោះត្រូវបានផាកពិន័យ ជាង ១៥ លានរៀលកាលពីថ្ងៃចន្ទ។
ការបង្ក្រាបការជួញដូរសត្វព្រៃខុសច្បាប់នេះដឹកនាំដោយ លោក កែវ សុជាតិ ព្រះរាជអាជ្ញារងនៃតុលាការសាលាដំបូងរាជធានីភ្នំពេញដោយមានការ ចូលរួមពីក្រុមប្រតិបត្តិការ និងអនុវត្តការងារវិស័យព្រៃឈើនៃសង្កាត់រដ្ឋបាលព្រៃឈើភ្នំពេញសហការ ជាមួយមន្ត្រីផ្នែករដ្ឋបាលព្រៃឈើកណ្តាលក្រុមអន្តរាគមន៍បង្ក្រាប បទល្មើសសត្វព្រៃចល័តនៃរដ្ឋបាលព្រៃឈើកងរាជអាវុធហត្ថលើផ្ទៃប្រទេស និងអាជ្ញាធរមូលដ្ឋានមូលដ្ឋានដោយបានធ្វើឡើងក្នុងផ្ទះមួយនៅជិត ផ្សារអូរឫស្សី ខណ្ឌ ៧ មករា និងបានរឹបអូសសំណាកសត្វព្រៃ សត្វព្រៃរស់ និងងាប់ចំនួន ១៣ ប្រភេទផ្សេងៗគ្នា។ នេះបើយោងតាមអង្គការសម្ព័ន្ធសត្វព្រៃ (Wildlife alliance) កាលពីម្សិលមិញ។
មន្ត្រីរដ្ឋបាលព្រៃឈើដែលចូលរួមបង្ក្រាបនេះបានឲ្យដឹងថា បន្ទាប់ពីធ្វើការស្រាវជ្រាវដឹងព័ត៌មានច្បាស់ពីបទល្មើសពីបទល្មើសនៅ ផ្ទះទិញលក់ផលនេសាទមួយនោះមកក្រុមកម្លាំងចម្រុះបានបង្ក្រាបដោយ រកឃើញសត្វព្រៃល្មើសច្បាប់មានរស់ និងងាប់សត្វទាំងនោះរួមមានទាំងប្រភេទកម្រផងដែរ ដែលក្នុងនោះរួមមានពង្រូលងាប់ ១ ក្បាល ( ៣ ខាំ ពស់វែក ១ ក្បាលងាប់ (៥ គីឡូក្រាម) ពស់ថ្លាន់រស់ ៣ ក្បាល (២៥ គីឡូក្រាម) កន្ធាយ និងអណ្តើករស់ជាច្រើនក្បាលផ្សេងទៀតផងដែរ។
លោកបានបន្តថាម្ចាស់ផ្ទះត្រូវបានពិន័យអន្តរកាលដោយតម្រូវឲ្យ បង់ប្រាក់ប្រមាណជា ១៥ លានរៀលកន្លះ (ជាង ៣ ពាន់ដុល្លាអាមេរិក)។លោកបានបញ្ជាក់ថា៖ «ម្ចាស់ផ្ទះនោះគេយល់ព្រមបង់ប្រាក់ពិន័យ ឈ្មួញហ្នឹងធំដែរ លុយគេមិនខ្វះទេ បើធ្វើមួយថ្ងៃមុនសត្វមានច្រើនជាងនេះ។ តែធ្វើមិនកើតដោយសារតែប្រមូលកម្លាំងមិនទាន់ អ៊ីចឹងគេបានលក់ដូរសត្វចេញអស់ខ្លះហើយ»៕
ចំនួនអ្នកទស្សនា
- ថ្ងៃនេះ5501
- ម្សិលមិញ15681
- សប្តាហ៍នេះ64341
- ខែនេះ86221
- ឆ្នាំនេះ86221
- សរុប20528677