ស្ត្រីម្នាក់បោកប្រាស់ប្រាក់ដុល្លាពិត ជាងមួយម៉ឺនដុល្លា យកលុយសែនចិន ៥០ម៉ឺនដុល្លាប្រគល់សង ជនរងគ្រោះ
17-March-2016 | ដោយ មែន កំសត់
កណ្ដាល ៖ ស្ត្រីម្នាក់ត្រូវសមត្ថកិច្ចនគរបាល ស្រុកស្អាងឃាត់ខ្លួនជាមួយនឹងប្រាក់ដុល្លរក្លែងក្លាយ(លុយសែនចិន) ប្រភេទក្រដាស់ប្រាក់ ១០០ដុល្លារ មួយកេស មានទម្ងន់ជាង ២គីឡូក្រាម ដែលមានចំនួន៥០ម៉ឺនដុល្លា។
ការឃាត់ខ្លួនស្ត្រីរូបនេះ សមត្ថកិច្ចធ្វើឡើងកាលពីរសៀល ថ្ងៃទី១៥ ខែមីនា ឆ្នាំ២០១៦ ក្រោយពេលជនរងគ្រោះចាញ់បោកជនសង្ស័យ ហើយបានប្តឹងសមត្ថកិច្ចឱ្យជួយពិនិត្យលុយក្លែងក្លាយ ដែលស្ត្រីនោះ ប្រគល់ឱ្យនៅចំណុចភូមិកោះខែល ឃុំកោះខែល ស្រុកស្អាង ខេត្តកណ្តាល។
លោក សេង សុជាតិ អធិការនគរបាល ស្រុកស្អាងបានឱ្យដឹងថា ជនសង្ស័យដែលត្រូវសមត្ថកិច្ចឃាត់ខ្លួន មានឈ្មោះ ស៊ុន ណារី ភេទស្រី អាយុ៣៨ឆ្នាំ ជនជាតិខ្មែរ មុខរបរកម្មការិនីរោងចក្រកាត់ដេរ មានទីលំនៅភូមិត្រពាំងរាំង ឃុំស្នោរ ស្រុកព្រៃកប្បាស់ ខេត្តតាកែវ។ រីឯជនរងគ្រោះមានឈ្មោះ ទូច ផាន់ ភេទប្រុស អាយុ ៥៥ឆ្នាំជនជាតិខ្មែរ មុខរបរជាងជួសជុលទូរទស្សន៍ មានទីលំនៅឃុំលើកដែក ស្រុកកោះធំ ខេត្តកណ្ដាល។
លោកអធិការ ស្រុកស្អាង បានឱ្យដឹងបន្ថែមថា ក្រោយឃាត់ខ្លួនជនសង្ស័យ ស៊ុន ណារី សមត្ថកិច្ចដកហូតបានកេសឡាំងដែកស័ង្កីចំនួន១ ដែលគេប្រើប្រាស់ដាក់ប្រាក់ដុល្លារក្លែងក្លាយ (លុយសែនចិន)មានទម្ងន់២,៨គីឡូក្រាម ក្នុងនោះ មានលុយក្លែងក្លាយប្រភេទក្រដាស់មួយរយដុល្លារចំនួន ៥.០០០សន្លឹក ស្មើនឹង ៥០ម៉ឺនដុល្លា។
តាមរបាយការណ៍នគរបាលស្រុកស្អាង បានឱ្យដឹងថា នៅថ្ងៃទី១៥ ខែមីនា ឆ្នាំ២០១៦វេលាម៉ោងជាង៨ព្រឹក ជនរងគ្រោះ ទូច ផាន់ បានមកប្ដឹងសមត្ថកិច្ចនគរបាលប៉ុស្ដិ៍កោះខែល ឱ្យជួយត្រួតពិនិត្យប្រាក់ដុល្លា ដែលឈ្មោះ ស៊ុន ណារី យកមកប្រគល់ឱ្យខ្លួន មួយកេះ មានចំនួន៥០ម៉ឺនដុល្លា ប៉ុន្តែជនសង្ស័យស៊ុន ណារី បានប្រាប់ឱ្យជនរងគ្រោះទូចផាន់ ប្រគល់ឱ្យខ្លួនចំនួន ២០០០ដុល្លា (លុយសុទ្ធ) ទើបគេព្រមឱ្យកេះសលុយដែលមានចំនួន ៥០ម៉ឺនដុល្លារនេះ ដោយប្រាប់ថា រកស៊ីជាមួយគ្នា និងទុកចែកគ្នាស្មើក្រោយពេលជនរងគ្រោះ ពិនិត្យលុយក្នុងកេះនេះរួចរាល់៕
របាយការណ៍នគរបាលប៉ុស្តិ៍បន្ថែមថា ចំពោះជនសង្ស័យឈ្មោះ ស៊ុន ណារី នេះកន្លងមក ធ្លាប់បោកលុយជនរងគ្រោះ ទូច ផាន់ សរុបចំនួន ១០.៥០០ដុល្លាររួចមកហើយ។ លុះដល់ថ្ងៃទី១៥ ខែមីនា ឆ្នាំ២០១៦ ទើបជនសង្ស័យណាត់យកលុយចំណេញមកឱ្យជនរងគ្រោះ ដោយដាក់ក្នុងឡាំងស័ង្កសីចាក់សោជិត យកទៅប្រគល់ឱ្យនៅចំណុចភូមិកោះខែល ឃុំកោះខែល ស្រុកស្អាង។
ប៉ូលិសបានឱ្យដឹងបន្តថា បើតាមចម្លើយសារភាពរបស់ជនសង្ស័យ ស៊ុន ណារី ថានៅថ្ងៃទី១៤ ខែមីនា ឆ្នាំ២០១៦ វេលាម៉ោងជាង៩ព្រឹក រូបគេបានទទួលកេះដាក់លុយពីឈ្មោះផល ភេទប្រុសអាយុប្រហែល៤០ឆ្នាំ បានទូរស័ព្ទឱ្យខ្លួនយកលុយក្នុងកេះនោះ (លុយក្លែងក្លាយ) នៅមុខធនារគា ANZ ក្រុងតាខ្មៅ ហើយបានប្រាប់ខ្លួនថា យកទៅឱ្យជនរងគ្រោះ ទូច ផាន់ និងឈ្មោះមឿន ប៉ុន្តែត្រូវយកលុយពីជនរងគ្រោះ(ឈ្មោះ ផាន់ និងមឿន ) ចំនួន៤.០០០ដុល្លារ ទើបឱ្យកេះលុយ (ក្លែងក្លាយ) នោះទៅ។
ជនសង្ស័យ ស៊ុន ណារី បានសារភាពប្រាប់បន្ថែមថា៖ ក្រោយពេលទទួលកេះលុយ (ក្លែងក្លាយ) ពីឈ្មោះ ផល នៅមុខធនាគារ ANZ ក្រុងតាខ្មៅ ខ្លួនគេក៏បានជួលរថយន្តជិះយកលុយមកកន្លែងណាត់ជួបនៅភូមិកោះខែល ឃុំកោះខែល ស្រុកស្អាង ហើយបានប្រាប់ឈ្មោះ ផាន់ និងឈ្មោះ មឿន ថា លុយក្នុងកេសនោះ ជាលុយចំណេញពេលដែលរកស៊ីជាមួយគ្នាកន្លងមក។
លោកសេង សុជាតិ អធិការស្រុកស្អាង បញ្ជាក់ឱ្យដឹងដែរថា ក្រោយប្រទះឃើញស្ត្រីជាជនសង្ស័យ ស៊ុន ណារី សមត្ថកិច្ចប៉ូលិស ក៏បានសុំគោលការណ៍ទៅព្រះរាជអាជ្ញារង ឯក ស៊ុនរស្មី ធ្វើការឃាត់ខ្លួនជាមួយនឹងប្រាក់ដុល្លារក្លែងក្លាយ ជាក្រដាស់ប្រាក១០០ដុល្លា (លុយសែនចិន) មួយកេស មានចំនួន ៥០ម៉ឺនដុល្លារ។ រីឯឈ្មោះ ផល ជាអ្នកផ្តល់កេះលុយឱ្យស្ត្រីស៊ុនណារីនៅមុខធនាគារ ANZ ក្រុងតាខ្មៅ សមត្ថកិច្ចកំពុងស្វែងរកឃាត់ខ្លួនដើម្បីយកមកសួរចម្លើយ និងស្រាវជ្រាវរកប្រភពឆរបោកករណីនេះ ឱ្យកាន់តែច្បាស់បន្ថែមទៀត៕
ចំនួនអ្នកទស្សនា
- ថ្ងៃនេះ4791
- ម្សិលមិញ15681
- សប្តាហ៍នេះ63631
- ខែនេះ85511
- ឆ្នាំនេះ85511
- សរុប20527967