សិស្សវិទ្យាល័យព្រះស៊ីសុវត្ថិ រាប់រយនាក់ឈរព័ទ្ធ រថយន្តស្ត្រីម្នាក់ ខឹងបុកម៉ូតូមិនព្រមដោះស្រាយ យកឈ្មោះថ្នាក់ដឹកនាំមកគំរាម
23-March-2016 | ដោយ មែន កំសត់
ភ្នំពេញ ៖ ក្រុមសិស្សានុសិស្សរាប់រយនាក់បាននាំគ្នាឈរព័ទ្ធជុំវិញរថយន្តម៉ែរសឺដេស ពណ៌ខ្មៅមួយគ្រឿងបើកបរដោយ ស្ត្រីវ័យចំណាស់ម្នាក់បុកម៉ូតូម៉ាកស្គូបពីរបស់យុវសិស្សម្នាក់ ហើយមិនព្រមចុះដោះស្រាយ បែរជាយកឈ្មោះថ្នាក់ដឹកនាំមកគំរាមបង្កឱ្យមាន ការភ្ញាក់ផ្អើលកាលពីវេលា ម៉ោង១រសៀលថ្ងៃទី២២ មីនា នៅច្រកទ្វារខាងត្បូងនៃសាលា វិទ្យាល័យព្រះស៊ីសុវត្ថិ ស្ថិតផ្លូវលេខ១៨៤ ក្នុងសង្កាត់ផ្សារថ្មីទី៣ ខណ្ឌដូនពេញ ។
យុវសិស្សរងគ្រោះឈ្មោះ គៀត សុភៈធារិទ្ធ អាយុ១៧ឆ្នាំ រៀនថ្នាក់ទី១១ «J» នៃសាលាវិទ្យាល័យព្រះស៊ីសុវត្ថិ រងរបួសស្រាល រលាត់ដៃជើង ខណៈពេលជិះម៉ូតូម៉ាកស្គូបពី ពណ៌សពាក់ស្លាកលេខភ្នំពេញ១DC០៦៩១មួយគ្រឿង។តាមសាក្សីនៅកន្លែងកើតហេតុបានឱ្យដឹងថា មុនពេលកើតហេតុគេឃើញយុវសិស្សរងគ្រោះជិះម៉ូតូពីលិចទៅកើត លុះមកដល់កន្លែងកើតហេតុ បើកឆ្លងផ្លូវសំដៅចូល ទៅសាលាជិតផុតទៅហើយ ស្រាប់តែមានរថយន្ត ម៉ាកម៉ែរសឺដេសS320 ពណ៌ខ្មៅ ពាក់ស្លាកលេខភ្នំពេញ២F-៤១៨៩ មួយគ្រឿង បើកបរដោយស្ត្រីវ័យចំណាស់ម្នាក់ ពីលិច ទៅកើតស្របទិសគ្នាបុកម៉ូតូដួលតែម្តង ។
ក្រោយកើតហេតុយុវសិស្សរងគ្រោះងើបដើរសំដៅទៅរថយន្តបង្កនោះដើម្បីធ្វើការដោះស្រាយគ្នា ប៉ុន្តែស្ត្រីរូបនោះ មិនព្រមចុះដោះស្រាយបែរជា អង្គុយនៅក្នុងរថយន្ត។ឃើញដូច្នេះ ក្រុមសិស្សានុសិស្សរាប់រយនាក់បាននាំគ្នាមកចោម រោមព័ទ្ធជុំវិញរថយន្ត ដើម្បីសុំឱ្យស្ត្រីរូបនោះ ចុះមកដោះស្រាយគ្នា ។ ក្នុងករណីគ្រោះថ្នាក់ចរាចរណ៍នេះដែរ បង្កឱ្យមានការភ្ញាក់ផ្អើល កាន់តែខ្លាំងឡើងៗ ដោយសារតែស្ត្រីរូបនោះមិនព្រមចុះដោះស្រាយ ជាមួយនឹងជនរងគ្រោះ ព្រមទាំងនិយាយយកតែឈ្មោះ ថ្នាក់ដឹកនាំប្រទេស និងមន្ត្រីធំៗមួយចំនួនមកគំរាម ធ្វើឱ្យក្រុមសិស្សានុសិស្សទាំងអស់នោះ មានកំហឹងយ៉ាងខ្លាំង ។
ក្រោយពេលកើតហេតុ សមត្ថកិច្ចចរាចរណ៍ខណ្ឌដូនពេញ ចុះមកដល់កន្លែងកើតហេតុ ហើយស្ត្រីវ័យចំណាស់រូបនោះនៅ តែមិនចុះពីលើរថយន្តមក និយាយជាមួយសមត្ថកិច្ចទៀត ដោយគ្រាន់តែបើកកញ្ចក់និយាយថា សុខចិត្តយកម៉ូតូរបស់យុវសិស្សរងគ្រោះ ទៅជួសជុលឱ្យ ដើម្បីបញ្ចប់រឿងនៅនឹង កន្លែងកើតហេតុ ទើបធ្វើឱ្យក្រុមសិស្សរាប់រយនាក់រំសាយចិត្ត និងព្រមចូលរៀនវិញ៕
ដោយ៖សៀម ហ៊ុន
ចំនួនអ្នកទស្សនា
- ថ្ងៃនេះ8881
- ម្សិលមិញ15681
- សប្តាហ៍នេះ67721
- ខែនេះ89601
- ឆ្នាំនេះ89601
- សរុប20532057