ឯកឧត្តម ឧត្តមសេនីយ៍ឯក រ័ត្ន ស្រ៊ាងសំណេះសំណាលជាមួយ មន្ត្រីកងរាជអាវុធហត្ថ ក្រោមឱវាទ
27-March-2016 | ដោយ មែន កំសត់
ភ្នំពេញ៖ ឯកឧត្តម ឧត្តមសេនីយ៍ឯក រ័ត្ន ស្រ៊ាង មេបញ្ជាការកងរាជអាវុធហត្ថរាជធានីភ្នំពេញ ជួបសំណេះសំណាលនិងជូនអំណោយឆ្នាំថ្មី ដល់នាយ នាយរង និងពលអាវុធហត្ថរាជធានីភ្នំពេញទាំងមូលដោយមានការណែនាំពី ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ ជាមេបញ្ជាការកងរាជអាវុធហត្ថលើផ្ទៃប្រទេស នៅបញ្ជាការដ្ឋានកងរាជអាវុធហត្ថរាជធានីភ្នំពេញ ឯកឧត្តម ឧត្តមសេនីយ៍ឯក រ័ត្ន ស្រ៊ាង បានអញ្ជើញ នាយ នាយរង និងពលអាវុធហត្ថក្រោមឱវាទលោកទាំងអស់ មកជួបសំណេះសំណាលជាបន្តបន្ទាប់ ដើម្បីអបអរសាទរបុណ្យចូលឆ្នាំថ្មី ភ្ជាប់ជាមួយកាដូចំណងដៃ ក្នុងម្នាក់ៗទទួលបាន ទឹកក្រូចមួយកេស អាវយឺតមួយ ទឹកសុទ្ធ និងនំពា គ្រប់ៗគ្នា។
ឯកឧត្តម រ័ត្ន ស្រ៊ាង បានលើកឡើងថា ជានិច្ចជាកាល ឯកឧត្តម នាយឧត្តមសេនីយ៍ សៅ សុខា តែងតែយកចិត្តទុកដាក់ គិតគូរ ពីសុខទុក្ខ របស់អាវុធហត្ថគ្រប់ៗរូប បើទោះជាថ្ងៃនេះ ឯកឧត្តម នាយឧត្តមសេនីយ៍ មិនបានអញ្ជើញមកជួបបងប្អូនដោយផ្ទាល់ ប៉ុន្តែឯកឧត្តម បានផ្តាំផ្ញើ សួរសុខទុក្ខ និងជូនពរបងប្អូនព្រមទាំងក្រុមគ្រួសារគ្រប់ៗគ្នា ពីចម្ងាយផងដែរ។
ឯកឧត្តម រ័ត្ន ស្រ៊ាង បានបន្ថែមទៀតថា ក្នុងនាមឯកឧត្តម ជាមេបញ្ជាការ ពិតជាមានមោទនភាពខ្លាំងណាស់ ដែលបានឃើញ កម្លាំងអាវុធហត្ថទូទាំងរាជធានីភ្នំពេញ មានសាមគ្គីភាពផ្ទៃក្នុងល្អ ឯកភាពគ្នាតែមួយ បំពេញភារកិច្ចសម្រេចបាន ស្នាដៃធំៗជាច្រើន ពិសេសការបង្ក្រាបក្រុមចោរប្លន់ប្រដាប់អាវុធដ៏សកម្មនិងសាហាវឃោរឃៅ ដោយបានប្លន់និងបាញ់ជនរងគ្រោះ ឲ្យស្លាប់និងរបួសជាច្រើននាក់ក្នុងរាជធានីភ្នំពេញ បង្ក្រាបក្រុមជួញដូរគ្រឿងញៀនធំៗជាច្រើន ដែលថ្មីៗនេះ បង្ក្រាបបានគ្រឿងញៀន រហូតដល់ទៅ ជាង13គីឡូក្រាម និងបានជួយសង្គ្រោះប្រជាពលរដ្ឋ ចេញពីគ្រោះអគ្គីភ័យ ទទួលបានការគោរព និងកោតសរសើរ ពីគ្រប់មជ្ឈដ្ឋាន។ ការសម្រេចស្នាដៃទាំងអស់នេះ ជាការរួមចំណែកមួយយ៉ាងធំ ក្នុងការថែរក្សា សណ្តាប់ធ្នាប់ សុវត្ថិភាពសង្គម ក្នុងរាជធានីភ្នំពេញយើងទាំងមូល។
ឯកឧត្តម រ័ត្ន ស្រ៊ាង បន្តទៀតថា ទឹកក្រូចចំនួន ពីរពាន់កេស ដែលបានរៀបចំចែកជូនដល់បងប្អូននៅពេលនេះ សង្ឃឹមថាបានចូលរួមចំណែក ក្នុងការអបអរសាទរបុណ្យចូលឆ្នាំថ្មី ជាមួយក្រុមគ្រួសារ សាច់ញាតិ ប្រពន្ធកូនបងប្អូនផងដែរ រីឯអាវយឺតដែល ចែកជូនម្នាក់មួយ នៅពេលនេះ គឺសម្រាប់ពាក់ចូលរួម ក្នុងពិធីជប់លៀង អបអរសាទរពិធីបុណ្យចូលឆ្នាំថ្មីប្រពៃណីជាតិជាមួយគ្នា ក្នុងទីបញ្ជាការ នៅថ្ងៃទី28 ខែមីនា ខាងមុខនេះ។
ជាចុងក្រោយ ឯកឧត្តម រ័ត្ន ស្រ៊ាង បានសំណូមពរដល់ នាយ នាយរង និងពលអាវុធហត្ថទូទាំងរាជធានីក្រោមឱវាទលោកទាំងអស់ សូមបន្តវប្បធម៌ សាមគ្គីភាពផ្ទៃក្នុង ឯកភាពគ្នាតែមួយ ប្រឹងប្រែងបំពេញភារកិច្ច បំរើ ការពារ សង្គ្រោះ ប្រជាពលរដ្ឋ គោរពច្បាប់និងសិទ្ធមនុស្ស លះបង់កម្លាំងកាយចិត្តចូលរួមថែរក្សា សណ្តាប់ធ្នាប់ សុវត្ថិភាពសង្គម និងស្ថេរភាពនយោបាយកម្ពុជា ឲ្យកាន់តែល្អប្រសើរតទៅមុខទៀត កុំបីរុញរាឡើយ៕
ចំនួនអ្នកទស្សនា
- ថ្ងៃនេះ13111
- ម្សិលមិញ15681
- សប្តាហ៍នេះ71951
- ខែនេះ93831
- ឆ្នាំនេះ93831
- សរុប20536287