អ្នកភូមិមិនហ៊ានចូលរួម មង្គលការជនបរទេស ព្រោះអាជ្ញាធរ មិនអនុញ្ញាត
30-March-2016 | ដោយ មែន កំសត់
កំពង់ធំ ៖ មង្គលការមួយដែលកូនកំលោះជាជនបរទេសបានបង្កឱ្យមានការភ្ញាក់ផ្អើលដល់ អ្នកភូមិដែលនិយាយរិះគន់ដល់អាជ្ញាធរ និងសមត្ថកិច្ចនគរបាលថា ប្រហែលជាមានការឃុបឃឹតគ្នាហើយ បានជាបណ្តែតបណ្តោយឲ្យជនបរទេសមករៀបការជាមួយកូនក្រមុំខ្មែរផ្អើល ពេញភូមិ ហើយអាជ្ញាធរនិងសមត្ថកិច្ចឆ្លើយដាក់គ្នាថាមិនដឹង ។
ទាក់ទងទៅដល់ការរៀបអាពាហ៍ពិពាហ៍នារីខ្មែរជាមួយជនបរទេសនេះ ត្រូវបានរាជរដ្ឋាភិបាលផ្អាកម្ដងរួចមកហើយ ពីបាតុភាពអវិជ្ជមានជាច្រើន ដែលបានកើតមានឡើងកន្លងមក ។ ការរៀបអាពាហ៍ពិពាហ៍ជាមួយជនបរទេសភ្លូកទឹកភ្លូកដីកន្លងមក តាមរយៈមេអណ្តើកនាំមករៀបការយកប្រពន្ធខ្មែរ រួចនាំយកទៅធ្វើជាទាសករផ្លូវភេទ ធ្វើជាខ្ញុំបម្រើដាច់ថ្លៃ និងលក់បន្តដូចជាសត្វធាតុ ។ ហើយហេតុការណ៍ជាក់ស្ដែងដែលបានកើតឡើង គឺស្ដ្រីខ្មែរដែលរងគ្រោះត្រូវបានជួយសង្គ្រោះជាបន្ដបន្ទាប់ពី ប្រទេសចិន ។
នារសៀលថ្ងៃទី២៩ មីនា នៅក្នុងភូមិប្រាសាទ ឃុំត្រពាំងឬស្សី ស្រុកកំពង់ស្វាយ មានពិធីរៀបការកូនក្រមុំ ឈ្មោះ យឹម សៀមលី និងកូនកំលោះជាជនជាតិអង់គ្លេស ឈ្មោះ ម៉ាក ចេមបាយរ៉ុន ។ មង្គលការនេះពុំមានលិខិតយល់ព្រមពីអាជ្ញាធរភូមិ ឃុំ ស្រុកអ្វីទាំងអស់ ហើយពិធីនេះបែរជាប្រព្រឹត្តទៅដោយរលូន ពុំមានការរារាំងណាមួយនោះឡើយ ។ ទោះបីជាបែបណាភ្ញៀវពន្លឺជិតឆ្ងាយនៅក្នុងភូមិឃុំខាងលើមិនហ៊ានទៅ ចូលរួមហូបការអធិកអធមអីនោះទេ ព្រោះខ្លាចមានរឿងកើតឡើង ។
លោក លឹម ផេត មេភូមិក្រសាំងប្រាប់ថា នៅមុនថ្ងៃមង្គលការ មានគេសុំច្បាប់គាត់ដែរ តែគាត់ប្រាប់ថា រឿងរៀបការជាមួយជនបរទេសគាត់មិនហ៊ានសម្រេចទេ ទៅជួបមេឃុំទៅ ស្រាប់តែឃើញដើរហៅភ្ញៀវការ ។ លុះដល់ថ្ងៃការគាត់ស្មានថាគេបានច្បាប់ហើយ ។ លោកមេភូមិបន្ដថា លោកអនុសេនីយ៏ឯក ធៀម ឆេងគ្រីអធិការរងស្រុកកំពង់ស្វាយ បានប្រាប់គាត់ថា បើមានអ្នកកាសែត ឬទូរទស្សន៏មកសួរនាំឲ្យខលប្រាប់គាត់ ។បានកត់សម្គាល់ទៀតថា ក្នុងឱកាសពិសារភោជអាហារ មានភ្ញៀវតិចតួចជាសាច់ញាតិបានចូលរួម ចំណែកអ្នកភូមិអត់ហ៊ានចូលរួមទេ ព្រោះខ្លាចមានបញ្ហា ។
លោក អ៊ុច វណ្ណរី មេឃុំត្រពាំងឬស្សី ប្រាប់ថា មានគេទូរស័ព្ទមកគាត់សុំរៀបការកូន គាត់ប្រាប់ថា ឲ្យយកឯកសារឲ្យបានគ្រប់គ្រាន់មកជួបជាមួយស្មៀនទៅ មិនអាចធ្វើលេងៗបានទេ ព្រោះរៀបការជាមួយជនបរទេស ហើយស្មៀនបានប្រាប់គាត់ថា មិនអាចអនុញ្ញាតិឲ្យរៀបការទេ ព្រោះគ្មានឯកសារគ្រប់គ្រាន់ ។ ស្រាប់តែប៉ុន្មានថ្ងៃក្រោយមក ខាងកូនក្រមុំបានយកធៀបការមកជូនគាត់ ហើយគាត់ឆ្លើយថា ខ្ញុំមិនហ៊ានទៅចូលរួមទេ បើធ្វើយ៉ាងហ្នឹង ។ លោកមេឃុំឱ្យដឹងទៀតថា លោកអនុសេនីយ៏ឯក ធៀម ឆេងគ្រី អធិការរងស្រុកកំពង់ស្វាយ បានទូរស័ព្ទមកសួរគាត់ថា មានជនបរទេសមករៀបការមែនទេ គាត់ថាមានមែន តែគ្មានច្បាប់នោះទេ ហើយគាត់ក៏សួមលោកអធិការរងជួយមានវិធានការផង ព្រោះខាងអន្តោប្រវេសន៍គាត់បានប្រាប់ហើយ ។
លោកអនុសេនីយ៏ឯក ធៀម ឆេងគ្រី ពុំអាចសុំការបំភ្លឺបានទេតាមទូរស័ព្ទនៅល្ងាចថ្ងៃទី២៩មីនា ដោយសារខលចូលជាង១០លើក តែគ្មានអ្នកទទួល ។
ចំណែកខាងសាច់ញាតិកូនក្រមុំនៅល្ងាចថ្ងៃដដែលនេះ បានប្រាប់ថាបញ្ហារត់ការកូននេះពួកគាត់បានឲ្យមេធាវី ឈ្មោះ ប៉ូ កាហ្សែន ជាអ្នករត់ការក្នុងរឿងនេះ ។ យើងបានព្យាយាមសុំការបំភ្លឺតាមរយៈទូរស័ព្ទដៃរបស់លោក ប៉ូ កាហ្សែន ដែរតែមិនអាចទំនាក់ទំនងបានទេ ។
លោកវរសេនីយ៏ត្រី ខេន ឈុនគ័រ អធិការនគរបាលស្រុកកំពង់ស្វាយ ប្រាប់ថា លោកពុំបានដឹងទេរឿងនេះ ដោយលោកជាប់ទៅបំពេញការងារជាមួយលោកអភិបាលស្រុក ។ លោកថា ចាំលោកសួរនាំលោកអនុសេនីយ៏ឯក ធៀម ឆេងគ្រី សិន លោកនឹងឆ្លើយតបវិញ ហើយក៏ស្ងាត់ទៅ ។
គួរកត់សម្គាល់ថា ក្នុងពិធីមង្គលការប្លែកមួយនេះ មិនដឹងថា តើពួកគេមានសម្ព័ន្ធមេត្រីភាពបែបណាទេ ទើបឈានដល់រៀបការនេះ ។ ទំនងគឺស្មោះស្មគ្រនិងគ្នាពីទីណាមួយមកហើយមើលទៅ ។
លោកប្រធានភូមិបាននិយាយថា ខាងកូនក្រមុំបានទៅធ្វើការនៅភ្នំពេញ ខាងបកប្រែ ។ ដូច្នេះទំនងពួកគេបានរិតចំណងមេត្រីភាពរួចហើយ ទំនងអង្ករក្លាយជាបាយហើយ ។ ចាត់ទុកថាត្រឹមត្រូវហើយ ដែលនាងបាននាំកូនកម្លោះមកសំពះផ្ទឹម បំពេញមុខឪពុកម្ដាយ និងសាច់ញាតិ ។ ពេលវេលាមកដល់ហើយ... ទូកចូលដល់កំពង់ហើយ រឿងអីមិនចូលចត ។ បើរង់ចាំច្បាប់ តើចាំពេលណា? ឬមួយអន្ទង់វែង ចាំរកឆ្នាំងវែងបានសិន... តើពេលណាទៅ?
យ៉ាងណាក៏ដោយចុះ ពិធីមង្គលការបានបញ្ជប់ដោយរលូន គ្មានផលរមាស់អ្វីឡើយ ហើយពួកគេទៅផ្សំដំណេកនៅសណ្ឋាគារខេត្តយ៉ាងត្រជាក់ល្ហិម ដែលចាត់ទុកថា កូនក្រមុំខ្មែរ ទោះខកបែបណាក៏ដោយ បានទាញកមកជួបសំពះម៉ែឪបានតាមប្រពៃណីដែរគួរឱ្យសរសើរនាងទៅ ៕
ចំនួនអ្នកទស្សនា
- ថ្ងៃនេះ14441
- ម្សិលមិញ15681
- សប្តាហ៍នេះ73281
- ខែនេះ95161
- ឆ្នាំនេះ95161
- សរុប20537617