ខឹងចាប់ទូហ្គេម ដេញបាញ់ និងវាយសន្តិសុខខណ្ឌ២នាក់របួស
06-April-2016 | ដោយ មែន កំសត់
ភ្នំពេញ ៖ កម្លាំងសន្តិសុខរបស់សាលាខណ្ឌពោធិ៍សែនជ័យ២នាក់ បានរងរបួសយ៉ាងធ្ងន់ធ្ងរ ក្នុងខណៈពេលដែលជនរងគ្រោះទាំង២នាក់ ដឹកទូហ្គេមដែលចាប់បានចេញពីទីតាំងល្បែងហ្គេមមួយកន្លែង ដើម្បីនាំយកទៅក្សាទុកនៅសាលាខណ្ឌពោធិ៍សែនជ័យ ត្រូវបានជនអន្ធពាល១ក្រុម ដែលគេសង្ស័យថា ជាបក្សពួកផ្ទះបទល្មើសល្បែងហ្គេមមួយនោះ រួមនិង១ក្រុមទៀតចេញពី ភោជនីយដ្ឋាន «ក្រុងខ្មែរ» មានកាំភ្លើងផង មានគ្នាប្រមាណជាង១០នាក់ ស្ទាក់ដេញបាញ់ និងវាយនៅពាក់កណ្ដាលផ្លូវ ។
ហេតុការណ៍នោះបានកើតឡើង កាលពីវេលាម៉ោង១យប់ថ្ងៃទី០៥ មេសា ២០១៦ ស្ថិតនៅចំណុចមុខភោជនីយដ្ឋាន «ក្រុងខ្មែរ» ស្ថិតនៅតាមផ្លូវបេតុង ខាងក្រោយសួនកុមារពោធិ៍ចិនតុង ក្នុងភូមិតាងួន សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ ។ ជនរងគ្រោះឈ្មោះឈាន លាប អាយុ១៩ឆ្នាំ មានទីលំនៅក្នុងភូមិរំដួល សង្កាត់ស្នោរ ខណ្ឌពោធិ៍សែន ជ័យ រងរបួសធ្ងន់ធ្ងរសន្លប់ស្ដូកស្ដឹង និងម្នាក់ទៀតឈ្មោះខែម សំឡូត អាយុជាង២០ឆ្នាំ មានទីលំនៅក្នុង ខេត្តតាកែវ រងរបួសធ្ងន់បែកមុខបែកមាត់ ។
តាមប្រភពព័ត៌មានបានឱ្យដឹងថា នៅមុនពេលកើតហេតុ កម្លាំងសន្តិសុខខណ្ឌពោធិ៍សែនជ័យ ដឹកនាំដោយលោក ឃឹម ស៊ុន សូដា ដែលជាអភិបាលរងខណ្ឌ បានចុះទៅបង្ក្រាប និងចាប់ទីតាំងល្បែងហ្គេមមួយកន្លែងនោះ ស្ថិតក្នុងភូមិតាងួន ដែលជាល្បែងស៊ីសងចំតួ និងកំពុងពង្វក់ស្មារតីក្មេងៗ ជាពិសេស សិស្សសាលាឲ្យភ្លេចការរៀនសូត្រផងដែរ ។
នៅក្នុងពេលនោះ កម្លាំងក៏បានដកហូតបានទូហ្គេមមួយចំនួន ហើយបានដឹកតាមរថយន្តសាលាខណ្ឌ យកទៅរក្សាទុកដោយជនរងគ្រោះទាំង២នាក់ ជាអ្នកបើកបររថយន្ត ម្យ៉ាងទៀតនៅពេលនោះ កម្លាំងសន្តិសុខបានបែកខ្ញែកគ្នាអស់ អត់ជុំគ្នាឡើយ ។ លុះពេលទៅដល់ចំណុចកើតហេតុមុខភោជនីយដ្ឋាន «ក្រុងខ្មែរ» ស្រាប់តែមានជនអន្ធពាល១ក្រុម មានគ្នាប្រមាណជាង១០នាក់ ជិះម៉ូតូ៥ទៅ៦គ្រឿង ប្រដាប់ដោយដំបងដែលបំពង់ទីបក្នុងដៃ និងស្ថិតក្នុងស្ថានភាពស្រវឹងផង បានស្ទាក់មុខរថយន្តសន្តិសុខ។
ប្រភពដដែលបន្តថា ខណៈនោះជនរងគ្រោះបានឈប់រថយន្តហើយបានចុះទៅ ប្រុងសួរនាំប៉ុន្តែមិនទាន់បានសួរផង ក៏ត្រូវបានជនអន្ធពាលទាំងនោះ វាយបណ្ដាលឱ្យដួលសន្លប់ម្នាក់និងបែនមុខបែកមាត់ ម្នាក់យ៉ាងធ្ងន់ធ្ងរ មិនតែប៉ុណ្ណោះ ជនពាលបានស្រែកខ្លាំងៗថា ខ្លាចអីមេធំអញនៅនឹងដែរ គ្មានអាណាហ៊ានទេ ការស្រែកបែបនេះ គឺមេធំសំដៅទៅក្រុមអ្នកនៅក្នុងភោជនីយដ្ឋាន «ក្រុងខ្មែរ»ដែលមានកាំភ្លើង ។
ក្រោយពេលអ្នកខាងក្រៅមានរឿងបែបនេះ ខាងអ្នកនៅក្នុងភោជនីយដ្ឋាននោះ បានចេញទៅជួយ និងបានដកកាំភ្លើងខ្លីបាញសំដៅរថយន្តសន្តិសុខចំនួន២គ្រាប់ តែមិនបណ្តាលឲ្យត្រូវនណាម្នាក់ឡើយ បន្ទាប់មក ក្រុមខ្មាន់កាំភ្លើងបានវាយរថយន្តសាលាខណ្ឌ បណ្តាលឱ្យខូចរថយន្តចំនួន២គ្រឿង ដោយមួយគ្រឿងបែកកញ្ចក់នឹងមួយគ្រឿងទៀត ក្រពិតកាប៊ីន រួចជនពាលខាងលើ បានគេចខ្លួនបាត់ស្រមោល ។
ប្រភពដដែលបានបន្តថា នេះជាការបំពានយ៉ាងធ្ងន់ធ្ងរ លើកម្លាំងសន្តិសុខ ក្នុងពេលកំពុងបំពេញការ ងារពីសំណាក់ក្រុមជនពាល ដែលសង្ស័យថា ដៃជើងផ្ទះបើកល្បែងហ្គេម និងភោជនីយដ្ឋាន ក្រុងខ្មែរនោះ ហើយក្រុមជនពាលទាំងនោះ ទំនងត្រូវបានអាជ្ញាធរ និងសមត្ថកិច្ចស្គាល់អត្តសញ្ញាណអស់ហើយដែរ ប៉ុន្តែមិនបានតាមចាប់ខ្លួននោះទេ ព្រោះក្រោយពេលកើតហេតុភ្លាមៗ លោកអភិបាលខណ្ឌនិង លោកអធិការ ខណ្ឌពោធិ៍សែនជ័យបានចុះទៅកាន់ទីនោះភ្លាមៗ ហើយ មានតំណាងជនបង្កទាំងនោះ បានចេញមុខធ្វើការ សម្រុះសម្រួលគ្នា ដោយសុំឲ្យរង់ចាំ ដោះស្រាយគ្នានៅពេលក្រោយ ហើយមានមជ្ឈដ្ឋានជាច្រើនកំពុង រង់ចាំមើល ថាតើជនរងគ្រោះ បានទទួលនូវភាពយុត្តិធម៌ឬអត់៕
ចំនួនអ្នកទស្សនា
- ថ្ងៃនេះ17631
- ម្សិលមិញ15681
- សប្តាហ៍នេះ76471
- ខែនេះ98351
- ឆ្នាំនេះ98351
- សរុប20540807