លោក អ៊ុំ សំអាន ត្រូវបានកម្លាំងសមត្ថកិច្ចខេត្តសៀមរាប ចាប់ខ្លួន
11-April-2016 | ដោយ មែន កំសត់
ភ្នំពេញ៖ លោក អ៊ុំ សំអាន តំណាងរាស្ត្រគណបក្សសង្គ្រោះជាតិ ត្រូវបានកម្លាំងសមត្ថកិច្ចខេត្តសៀមរាប ចាប់ខ្លួនហើយ នៅវេលាម៉ោងប្រមាណជាង១២យប់រំលងអាធាត្រចូលថ្ងៃទី១១ ខែមេសា ឆ្នាំ២០១៦ នេះបើយោងតាមមន្ត្រីនគរបាលជាន់ខ្ពស់ ខេត្តសៀមរាបថ្លែងប្រាប់ ឲ្យដឹងយ៉ាងដូច្នេះ។
សមត្ថកិច្ចជាន់ខ្ពស់បានបញ្ជាក់ថា លោក អ៊ុំ សំអាន ត្រូវបានចាប់ខ្លួននៅលើទឹកដីខេត្តសៀមរាប ពីបទប្រើប្រាស់ផែនទីក្លែងក្លាយ ដូចករណីលោក ហុង សុខហួរ ដែរ។ ហើយនៅពេលនេះលោក អ៊ុំ សំអាន កំពុងបញ្ជូនមកកាន់រាជធានីភ្នំពេញ។ ការបញ្ជូនខ្លួនលោក អ៊ុំ សំអាន អាចនឹងមកដល់រាជធានីភ្នំពេញ នៅម៉ោងប្រមាណជាង៧ព្រឹកថ្ងៃទី១១ ខែមេសា ឆ្នាំ២០១៦នេះ។ តាមព័ត៌មានបានឲ្យដឹងថា លោក អ៊ុំ សំអាន ត្រូវបានចាប់ខ្លួននៅម្តុំផ្សារកណ្តាល សង្កាត់ស្វាយដង្គំ ក្រុងសៀមរាប នៅពេលលោកចុះដកលុយនៅទូរ ATM របស់ធនាគារ។
លោក អ៊ុំ សំអាន បានត្រឡប់មកដល់ប្រទេសកម្ពុជាវិញ នៅថ្ងៃទី១០ ខែមេសា ឆ្នាំ២០១៦ បន្ទាប់ពីលោកបានចាកចេញទៅអាមេរិក កាលពីពាក់កណ្តាលឆ្នាំ២០១៥។
សូមជំរាបថា លោក អ៊ុំ សំអាន នាពេលកន្លងទៅបានបង្ហោះផែនទីរបស់កម្ពុជាច្រើនសន្លឹក សុទ្ធសឹងតែផែនទីក្លែងក្លាយ ក្នុងគោលបំណង ដើម្បីបង្កភាពចលាចលនៅក្នុងសង្គម ហើយកាលពីថ្ងៃទី២៤ ខែកក្កដា ឆ្នាំ២០១៥ លោក អ៊ុំ សំអាន តំណាងរាស្ត្រខេត្តសៀមរាប ត្រូវបានសម្តេច ហេង សំរិន ប្រធានរដ្ឋសភា ដាក់ទណ្ឌកម្ម វិន័យមួយចំនួន បន្ទាប់ពីសកម្មភាព ផ្សាយតាមបណ្តាញព័ត៌មានសង្គម ប៉ះពាល់ដល់កិត្យានុភាពរបស់រដ្ឋសភា និងការជេរប្រមាថមើលងាយប្រធានរដ្ឋសភា ដែលផ្ទុយនឹងបទបញ្ជាផ្ទៃក្នុងរបស់រដ្ឋសភា៕
ចំនួនអ្នកទស្សនា
- ថ្ងៃនេះ15641
- ម្សិលមិញ15681
- សប្តាហ៍នេះ74481
- ខែនេះ96361
- ឆ្នាំនេះ96361
- សរុប20538817