គំរាមសម្លាប់ប្រពន្ធមួយពូជ ដេកលក់ប្រពន្ធកាប់ស្លាប់មុន
18-April-2016 | ដោយ មែន កំសត់
ព្រៃវែង ៖ បុរសប្រមឹកម្នាក់ត្រូវប្រពន្ធលបកាប់១ពូថៅចំគល់.កបណ្តាលអោយ ប្រកាច់ស្លាប់ភ្លាមៗ ដោយសារតែស្រវឹងស្រាគំរាមកាប់សម្លាប់ប្រពន្ធកូនមួយពូជ ។ ហេតុការណ៍ដ៏គួរអោយអណោចអធ័មនេះបានកើតឡើងកាលពីវេលាម៉ោង១១ យប់ ថ្ងៃទី១៦ ខែមេសា ឆ្នាំ២០១៦ នៅក្រោមផ្ទះរបស់ជនរងគ្រោះដែលស្ថិតក្នុងភូមិកញ្ចំ ឃុំកញ្ចំ ស្រុកពារាំង ខេត្តព្រៃវែង ។
ជនរងគ្រោះដែលត្រូវប្រពន្ធកាប់ស្លាប់ឈ្មោះ ហឿន ហ៊ន អាយុ៤៧ឆ្នាំ ចំណែកស្ត្រីជាប្រពន្ធឈ្មោះ យួន សុភា អាយុ៤២ឆ្នាំ អ្នកទាំង២បានរៀបការ និងរួមរស់ជាមួយគ្នារយៈពេល២០ឆ្នាំមកហើយ និងមានកូន២នាក់ កូនស្រីបងអាយុ១៨ឆ្នាំ និងប្រុសពៅអាយុ១៥ឆ្នាំ ។
ទាក់ទងទៅនឹងមូលហេតុនៃអំពើឃាតកម្មនេះត្រូវបានស្ត្រីជាប្រពន្ធ ឈ្មោះ យួន សុភា អះអាងថា ដោយសារតែជនរងគ្រោះជាប្តីផឹកស្រាស្រវឹងហើយបានគំរាមថានឹង កាប់សម្លាប់ចោលទាំងប្រពន្ធនិងកូនៗ រួចនឹងសម្លាប់ខ្លួនឯងតាមក្រោយ ទើបធ្វើអោយប្រពន្ធទ្រាំមិនបានក៏ដាច់ចិត្តលបកាប់សម្លាប់ប្តីមុន តែម្តងទៅ ។
ស្ត្រីជាប្រពន្ធបញ្ជាក់ថា រយៈពេល២០ឆ្នាំដែលរួមរស់ជាមួយគ្នានេះបុរសជាប្តីមិនដែលជួយ ធ្វើការរកស៊ីចិញ្ចឹមប្រពន្ធកូននោះទេ គឺគិតតែពីដើរផឹកស៊ីស្ទើររាល់ថ្ងៃ ហើយពេលស្រវឹងម្តងៗតែងតែជេរបញ្ចោ និងវាយធ្វើបាបប្រពន្ធកូនរហូត ហើយមួយរយៈពេលចុងក្រោយនេះអោយតែស្រវឹងគឺយកពូថៅមកអង្គុយសំលៀង រហូត និងបោះពាក្យសំដីថា អញនឹងសម្លាប់ចោល១ពូជ ធ្វើអោយរូបគាត់ជាប្រពន្ធនិងកូនៗមានការភ័យខ្លាចជាខ្លាំង ។ មកដល់យប់ថ្ងៃទី១៦មេសាដែលជាថ្ងៃចូលឆ្នាំ ពេលត្រឡប់មកពីផឹកវិញប្តីរបស់គាត់បានស្រែកជេរបញ្ចោ និងយកពូថៅមកគំរាមរកកាប់សម្លាប់គាត់និងកូនៗទៀត ទើបធ្វើអោយគាត់ទ្រាំមិនបាន ពេលប្តីដេកលក់នៅក្រោមផ្ទះក៏យកពូថៅរបស់ប្តីលបកាប់សម្លាប់ប្តី មុនតែម្តងទៅ ។
សមត្ថកិច្ចបានអោយដឹងថា ក្រោយពីកាប់សម្លាប់ប្តីរួចហើយ ស្ត្រីជាប្រពន្ធមិនបានរត់ទៅណានោះទេ គឺបាននៅអង្គុយយំក្បែរសពប្តីរហូតទាល់តែសមត្ថកិច្ចទៅដល់ធ្វើការ ឃាត់ខ្លួនតែម្តង ចំណែកកូនៗពេលដឹងថាម្តាយកាប់ឪពុកស្លាប់ក៏នាំគ្នាអង្គុយយំដែរ ប៉ុន្តែមិនបានស្តីបន្ទោសអ្វីដល់ម្តាយនោះទេ ។
ក្រោយពីឃាត់ខ្លួនស្ត្រីជាប្រពន្ធរួច សមត្ថកិច្ចក៏បានបញ្ជូនមកកាន់អធិការដ្ឋាននគរបាលស្រុកដើម្បីធ្វើការ កសាងសំណុំរឿងបញ្ជូនទៅសាលាដំបូងខេត្តចាត់ការទៅតាមច្បាប់ ៕
ចំនួនអ្នកទស្សនា
- ថ្ងៃនេះ17451
- ម្សិលមិញ15681
- សប្តាហ៍នេះ76291
- ខែនេះ98171
- ឆ្នាំនេះ98171
- សរុប20540627