ពេទ្យឆ្មបនៅមន្ទីរពេទ្យ ខេត្តប៉ៃលិនខ្វះសមត្ថភាពធ្វើឲ្យស្ដ្រីសម្រាលកូនស្លាប់យ៉ាងអាណោធអាធម
20-April-2016 | ដោយ មែន កំសត់
ប៉ៃលិន ៖ ស្ត្រីវ័យក្មេងម្នាក់ឈឺពោះសម្រាលកូនដំបូង នៅក្នុងមន្ទីរពេទ្យបង្អែកខេត្តប៉ៃលិន មួយសន្ទុះក្រោយមកឈឺចុកចាប់ក្នុងពោះខ្លាំងឱ្យគ្រូពេទ្យពិនិត្យ មើលឃើញថា មានឈាមកកនៅក្នុងស្បូន ក៏ប្រើឱ្យគ្រូពេទ្យឆ្មបស្រីវ័យក្មេងម្នាក់ យកដៃកកាយឈាមកកនោះចេញ ហើយក្លាយទៅជាហូរឈាមកាន់តែច្រើនឡើងៗ ដោយសភាពមិនស្រួល ក៏បញ្ជូនទៅសង្គ្រោះនៅមន្ទីរពេទ្យបង្អែកខេត្តបាត់ដំបង ។ តែជាអកុសល ឈាមហូរខ្សោះអស់ពីក្នុងខ្លួន បណ្តាលឱ្យស្លាប់តាមផ្លូវចោលកូន និងប្តីគួរឱ្យអាណោចអាធមក្រៃលែង កាលពីយប់ថ្ងៃទី១៦ មេសា ក្នុងថ្ងៃចូលឆ្នាំ ។
ប្រភពព័ត៌មានបានឱ្យដឹងថា ស្ត្រីរងគ្រោះមានឈ្មោះសេង គឹមណុង អាយុ២០ឆ្នាំ ជាកសិករ ស្លាប់បន្ទាប់ពីសម្រាលបានទារិកាម្នាក់ ប្តីឈ្មោះឡេង បារាំង អាយុ២៤ឆ្នាំ មានស្រុកកំណើតរស់នៅ ភូមិត្រឡោកភ្លុក ឃុំព្រែកស្វាយ ស្រុកមោងឫស្សី ខេត្តបាត់ដំបង បច្ចុប្បន្នរស់នៅចំណុចអូរកប់អង្ករ ក្នុងភូមិអូរឈើក្រំ ឃុំស្ទឹងកាច់ ស្រុកសាលាក្រៅ ។
សូមបញ្ជាក់ថា ហេតុការណ៍ស្ត្រីរងគ្រោះស្លាប់តាមផ្លូវជិតដល់មន្ទីរពេទ្យខេត្ត បាត់ដំបង ខណៈបញ្ជូនទៅសង្គ្រោះនៅទីនោះ បានកើតឡើង កាលពីវេលាម៉ោង១០ និង៣០នាទីយប់ថ្ងៃទី១៦ មេសា ឆ្នាំ២០១៦កន្លងទៅ ហើយត្រូវបានក្រុមគ្រួសារយកទៅរៀបចំធ្វើបុណ្យតាមប្រពៃណីរួចរាល់ កាលពីព្រឹកថ្ងៃទី១៩ ខែមេសា កន្លងទៅនេះ ។ប្រភពព័ត៌មានពីស្ត្រីម្នាក់ឈ្មោះសេង ស្រស់ អាយុ២៤ឆ្នាំ ត្រូវជាបងស្ត្រីរងគ្រោះបានឱ្យដឹងថា ប្អូនស្រីរបស់នាង កាលពីដំបូងមានសុខភាពមាំទាំធម្មតា អត់មានឈឺជំងឺរោគាអ្វីនោះឡើយ ដោយមានផ្ទៃពោះគ្រប់ខែឈឺសម្រាល ហើយក៏ឱ្យប្តីដឹកតាមម៉ូតូយកទៅមណ្ឌលសុខភាពផ្សារព្រំ ។ លុះទៅដល់គ្រូពេទ្យឆ្លុះអេកូសាស្ត្ររួចប្រាប់ថា នាងមិនទាន់គ្រប់ខែ មិនហ៊ានបង្កើតឱ្យឡើយ ។ ប្រភពបន្តទៀតថា លុះនាងឈឺពោះកាន់តែខ្លាំងៗ ទើបប្តីប្រញាប់ដឹកទៅមន្ទីរពេទ្យបង្អែកខេត្ត ដោយគ្រាន់តែទៅដល់ប្រហែល១៥នាទី នាងសម្រាលបានកូនស្រីតូចម្នាក់ មានទម្ងន់២.៤គីឡូក្រាម ។
នាងបញ្ជាក់ថា ពេលនោះប្អូនស្រីរបស់ខ្លួន អាចមើលកូនរបស់ខ្លួន និយាយលេងជាមួយម្តាយ បងប្អូនប្រុសស្រី និងប្តីជាធម្មតា ដោយប្រាប់ថា មិនអស់កម្លាំងអ្វីនោះឡើយ ។ ប្រហែលជាកន្លះម៉ោងក្រោយមក ស្រាប់តែធ្លាក់ឈាមហូរខ្លាំង ហើយម្តាយនាងក៏បានរត់ទៅហៅគ្រូពេទ្យឱ្យមើល ស្រាប់តែមានគ្រូពេទ្យឆ្មបស្រីវ័យក្មេងម្នាក់ អាយុប្រហែល២០ឆ្នាំ បានលូកកកាយឈាមចេញចំនួន២ដង ទើបបណ្តាលឱ្យឈឺចុកចាប់កាន់ខ្លាំង និងហូរឈាមច្រើនឡើងៗ ហើយស្លាប់តាមផ្លូវពេលបញ្ជូន ទៅសង្គ្រោះនៅមន្ទីរពេទ្យបង្អែកខេត្តបាត់ដំបង ។
គាត់សង្ស័យថា ការលូកកកាយរប ស់គ្រូពេទ្យធ្វើឱ្យកូនស្រីគាត់ដាច់រលាត់ស្បូន ទើបហូរឈាមមិនឈប់ស្លាប់បែបនេះ ។ រហូតមកដល់ព្រឹកថ្ងៃទី១៩ ខែមេសា កន្លងទៅនេះ ខាងមន្ទីរពេទ្យបង្អែកខេត្តបានយកថវិ កាចំនួន១លានរៀលទៅចូលបុណ្យសពកូនស្រីរបស់ខ្លួនផងដែរ ។
ពាក់ព័ន្ធទៅនឹងបញ្ហាស្ត្រីវ័យក្មេងសម្រាលកូនស្លាប់នៅក្នុង មន្ទីរពេទ្យបង្អែកនេះភ្នាក់ងារសារព័ត៌មាន មិនអាចសុំការបំភ្លឺពីលោក អាង នាង ប្រធានមន្ទីរពេទ្យបង្អែកខេត្តប៉ៃ លិន បានឡើយ ខណៈទូរស័ព្ទចូល មានបុគ្គលិកស្រី ម្នាក់ មកលើកជំនួស ហើយក៏មិនឃើ ញមានទាក់ទងមកវិញ ដើម្បីធ្វើការបកស្រាយអ្វីនោះដែរ ។
ចំណែកប្រជាពលរដ្ឋទាំងអស់រស់នៅក្នុងខេត្តប៉ៃលិន សំណូមពរឱ្យលោកគ្រូអ្នកគ្រូ ពេទ្យ មេត្តាយកចិត្តទុកដាក់ចំពោះការព្យាបាលអ្នកជំងឺ និងប្រើពាក់សម្តីសមរម្យ ជាពិសេសមិនត្រូវរើសអើងអ្នកមាន ឬអ្នកក្រនោះឡើយ ត្រូវមានក្រមសីលធម៌វិជ្ជាជីវៈផងដែរ ។សូមបញ្ជាក់ថា កាលពីប៉ុន្មានឆ្នាំថ្មីៗកន្លងទៅនេះ មន្ទីរពេទ្យបង្អែកខេត្តប៉ៃលិន ធ្លាប់ធ្វើការវះកាត់ស្ត្រីសម្រាលកូនម្នាក់ រស់នៅភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ដោ យ ខុសបច្ចេកទេស បណ្តាលឱ្យហូរឈាមមិនឈប់ស្លាប់តាមផ្លូវខណៈបញ្ជូនទៅសង្គ្រោះ នៅមន្ទីរពេទ្យខេត្តបាត់ដំបងផងដែរ ៕
ចំនួនអ្នកទស្សនា
- ថ្ងៃនេះ18151
- ម្សិលមិញ15681
- សប្តាហ៍នេះ76991
- ខែនេះ98871
- ឆ្នាំនេះ98871
- សរុប20541327