សមត្ថកិច្ចអាវុធហត្ថបង្ក្រាបចោរលួចគោក្របីបួននាក់នៅស្រុកក្រគរ
22-April-2016 | ដោយ មែន កំសត់
ពោធិ៍សាត់៖ កម្លាំងកងរាជអាវុធហត្ថស្រុកក្រគរ ខេត្តពោធិសាត់ បានបង្ក្រាបចោរលួចគោក្របីកសិករបានបួននាក់ ដែលតែងតែធ្វើឲ្យប្រជាជន ដែលមានគោក្របីដេកមិនលក់ជារៀរាល់យប់។ ការចាប់បានក្រុមចោរលួចគោក្របីនោះ ស្ថិតនៅភូមិក្បាលដំរី ឃុំអន្សាចំបក់ ស្រុកក្រគរ ខេត្តពោធិសាត់ ព្រំប្រទល់ស្រុកបរិបូរណ៍ខេត្តកំពង់ឆ្នាំង កាលពីព្រលប់ថ្ងៃទី២១ ខែមេសា ឆ្នាំ២០១៦។
លោក នៅ សុជាតិ មេបញ្ជាការកងរាជអាវុធហត្ថស្រុកក្រគរខេត្តពោធិសាត់ បានឲ្យដឹងថា កម្លាំងរបស់លោកបានចុះបង្ក្រាបដេញចាប់ចោរលួចក្របី នៅភូមិក្បាលដំរី ឃុំអន្សាចំបក់ ស្រុកក្រគរ ខេត្តពោធិសាត់ ព្រំប្រទល់ស្រុកបរិបូរណ៍ខេត្តកំពង់ឆ្នាំង។ ក្នុងនោះ សមត្ថកិច្ចបានឃាត់ខ្លួនជនសង្ស័យចំនួនបួននាក់ដែលមានឈ្មោះប៉ែន លាន ភេទប្រុស អាយុ៥៨ឆ្នាំ ឈ្មោះ គា តូ ភេទប្រុស អាយុ៣៦ឆ្នាំឈ្មោះសេង សាលិន ភេទប្រុស អាយុ១៩ឆ្នាំ និងឈ្មោះឈឹម សុភា ភេទប្រុស អាយុ៣៥ឆ្នាំ រួមជាមួយរថយន្តមួយគ្រឿង ម៉ាកកាម៉ារីស៊េរី៩៣ ពណ៌ស ស្លាកលេខ ២A០៤៦៧ និងម៉ូតូមួយគ្រឿងសង់ការ៉េពណ៌ក្រហមស្លាកលេខ ១A ៤២០១ ក្របីបួនក្បាល។ ក្រោយពីឃាត់ខ្លួនវត្ថុតាងកងកម្លាំងបានយកទៅរក្សាទុកនៅមូលដ្ឋាន កងរាជអាវុធហត្ថស្រុកក្រគរ ដើម្បីស្រាវជ្រាវបន្តនិងបំពេញនីតិវិធីតាមផ្លូវច្បាប់៕
ចំនួនអ្នកទស្សនា
- ថ្ងៃនេះ18601
- ម្សិលមិញ15681
- សប្តាហ៍នេះ77441
- ខែនេះ99321
- ឆ្នាំនេះ99321
- សរុប20541777