ឧត្តមសេនីយ៍ រ័ត្ន ស្រ៊ាង៖ ជនល្មើសសរុបទាំងអស់ ចាប់បាន៥នាក់, បាញ់ស្លាប់ម្នាក់ ដកហូតកាំភ្លើងវែងខ្លី៥ដើម និងអាវុធហត្ថម្នាក់ ស្លាប់ក្នុងប្រតិបត្តិការការបង្ក្រាប
28-April-2016 | ដោយ មែន កំសត់
ភ្នំពេញ៖ មេបញ្ជាការអាវុធហត្ថរាជធានីភ្នំពេញ លោកឧត្តមសេនីយ៍ រ័ត្ន ស្រ៊ាង បានបញ្ជាក់ប្រាប់ ថា ប្រតិបត្តិការបង្ក្រាបក្រុមជួញដូរគ្រឿងញៀន បានបញ្ចប់ទាំងស្រុងនៅល្ងាចថ្ងៃទី២៧ ខែមេសា ឆ្នាំ២០១៦ហើយ ក្នុងនោះមេក្លោងគ្រឿងញៀនម្នាក់ត្រូវបានសមត្ថកិច្ចរបស់លោកបាញ់ស្លាប់ និងបក្ខពួក៥នាក់ទៀតត្រូវបានចាប់ខ្លួន។ លោកឧត្តមសេនីយ៍ មេបញ្ជាការក៏បានបញ្ជាក់ផងដែរ មន្ត្រីរបស់លោកម្នាក់ត្រូវបានក្រុមគ្រឿងញៀន បាញ់បណ្តាលឲ្យស្លាប់ពេលបញ្ជូនទៅដល់មន្ទីរពេទ្យ។
លោកឧត្តមសេនីយ៍ រ័ត្ន ស្រ៊ាង ដែលបានដឹកនាំកម្លាំងចុះទៅបង្ក្រាបករណីជួញដូរគ្រឿងញៀននៅកន្លែងកើតហេតុ បានបន្តទៀតថា សម្រាប់ប្រតិបត្តិការនេះ កម្លាំងសមត្ថកិច្ចបានដកហូតកាំភ្លើងវែងខ្លីចំនួន៥ដើម និងរថយន្តមួយគ្រឿងម៉ាកអូឌី។
ម្ចាស់ផ្ទះឈ្មោះ លី កុកហ៊ុយ ជាមន្ត្រីអធិការកិច្ចក្រសួងមហាផ្ទៃ និងជាថៅកែជ្រូកខ្វៃ ស្ថិតនៅផ្លូវលេខ៣៥១ សង្កាត់បឹងកក់១ ខណ្ឌទួលគោក។
សូមបញ្ជាក់ថា នៅរសៀលថ្ងៃនេះកម្លាំងសមត្ថកិច្ចជាច្រើននាក់ទាំងអាវុធហត្ថ និងនគរបាលបានចុះទៅបង្ក្រាបមេក្លោងជួញដូរគ្រឿងញៀន ស្ថិតនៅផ្ទះលក់សាច់ជ្រូកតាមផ្លូវលេខ៣៥១ សង្កាត់បឹងកក់ទី១ ខណ្ឌទួលគោក ដែលក្រុមគ្រឿងញៀនបានលាក់ខ្លួននៅទីនោះ ស្រាប់តែបាញ់មកលើក្រុមសមត្ថកិច្ចជាច្រើនគ្រាប់បណ្តាលឲ្យត្រូវមន្ត្រីអាវុធហត្ថម្នាក់រហូតស្លាប់ រួចហើយបានបន្តបាញ់រះជាច្រើនគ្រាប់ រហូតបង្ក្រាបក្រុមជនល្មើសជាបន្តបន្ទាប់ចំនួន៥នាក់។ ប្រតិបត្តិបង្ក្រាបជនជួញដូរគ្រឿងត្រូវបានបញ្ចប់នៅម៉ោងប្រមាណ ៥និង៤៥នាទី ថ្ងៃទី២៧ ខែមេសានេះ។លោកឧត្តមសេនីយ៍ រ័ត្ន ស្រ៊ាង បានបញ្ជាក់ថា សម្រាប់សពមន្ត្រីអាវុធហត្ថដែលត្រូវក្រុមជនល្មើសគ្រឿងញៀនបាញ់ស្លាប់ នោះត្រូវបានយកមកធ្វើបុណ្យនៅទីបញ្ជាការដ្ឋានអាវុធហត្ថរាជធានីភ្នំពេញ ខណៈជនល្មើសទាំង៥នាក់ត្រូវបាននាំខ្លួនទៅសួរនាំបន្តទៀត៕
ចំនួនអ្នកទស្សនា
- ថ្ងៃនេះ2451
- ម្សិលមិញ20231
- សប្តាហ៍នេះ81531
- ខែនេះ103411
- ឆ្នាំនេះ103411
- សរុប20545867