ព័ត៌មានលម្អិតស្តីពីការបង្ក្រាប ករណីជួញដូរ គ្រឿងញៀន ពីអាវុធហត្ថរាធានីភ្នំពេញ ម្សិលមិញ
28-April-2016 | ដោយ មែន កំសត់
ភ្នំពេញ៖ យោតាមទំព័រហ្វេសប៊ុកកងរាជអាវុធហត្ថ រាធានីភ្នំពេញ បានបង្ហោះ នៅថ្ងៃទី២៨ ខែមេសា ឆ្នាំ២០១៦ នេះបានឲ្យដឹងថា កម្លាំងអាវុធហត្ថ រាជធានីភ្នំពេញ បានបើកប្រតិបត្តិការ បង្ក្រាបក្រុមជួញដូរ គ្រឿងញៀន ដ៏ធំមួយ ធ្វើឲ្យកក្រើក រាជធានីភ្នំពេញ ដោយសារ មានការបាញ់តដៃគ្នា រាប់រយគ្រាប់ នៅល្ងាចថ្ងៃទី២៧ មេសា ឆ្នាំ២០១៦ ម្សិលមិញនេះ។
យោងតាមប្រភពខាងលើបានឲ្យដឹងថា ហេតុការណ៍នោះ ដំបូងឡើយ បានផ្តើមចេញពី កម្លាំងជំនាញ ការិយាល័យបទល្មើស គ្រឿងញៀន ដឹកនាំដោយ លោកវរសេនីយ៍ត្រី ប៉ាន់ សុភាព ជា នាយការិយាល័យ និងលោកអនុសេនីយ៍ឯក ទៀន ករុណា នាយរង ការិយាល័យបទល្មើស គ្រឿងញៀន កងរាជអាវុធហត្ថ រាជធានីភ្នំពេញ ចាប់បានជនល្មើស ជួញដូរគ្រឿងញៀន ម្នាក់ ឈ្មោះលី វីរៈ អាយុ៣៧ឆ្នាំ មុខរបរមិនពិតប្រាកដ នៅម្តុំបឹងឈូក ទល់មុខ ពេទ្យលោកសង្ឃ និងដកហូតថ្នាំញៀន បាន ២០៦គ្រាប់។
តាមចម្លើយសារភាព របស់ ជនល្មើសម្នាក់នេះ បានប្រាប់ថា «មេក្លោងធំរបស់វា នៅផ្ទះលេខ៣៧ ផ្លូវលេខ៣៥១ សង្កាត់បឹងកក់ទី១ ខណ្ឌទួលគោក ទើបកម្លាំងសមត្ថកិច្ច អាវុធហត្ថ រាជធានីភ្នំពេញ បានសុំគោលការណ៍ ពី ព្រះរាជអាជ្ញារង មាស ច័ន្ទពិសិដ្ឋ និងព្រះរាជអាជ្ញារង សៀង សុខ ចុះទៅបង្ក្រាប ក្រុមជួញដូរថ្នាំញៀន ទាំងនោះ ដោយសហការណ៍ ជាមួយ អាវុធហត្ថខណ្ឌទួលគោក»។
ប្រភពខាងលើបានបន្តសរសេរទៀតថា ពេលទៅដល់ផ្ទះជនល្មើស ដែលមានពីរជាន់(ថ្មក្រោម ឈើលាយថ្ម ខាងលើ) សមត្ថកិច្ច អាវុធហត្ថ ក៏សំរុកចូលដល់ក្នុងផ្ទះ ជាន់ខាងក្រោម ឃាត់ខ្លួនជនសង្ស័យ បាន៣នាក់ និងបន្តឡើង ទៅជាន់លើ ឃាត់ខ្លួនបាន បក្សពួកវាម្នាក់ទៀត ភ្លាមៗនោះ ជនល្មើស ដែលជាមេក្លោងធំ របស់ពួកវា បានចេញមក បាញ់ប្រហារ លើកម្លាំងសមត្ថកិច្ច បណ្តាលអោយ អាវុធហត្ថម្នាក់ ត្រូវ១គ្រាប់ ហើយសមត្ថកិច្ច អាវុធហត្ថ បានបាញ់តបត ដើម្បីរំដោះអ្នករបួស យកទៅមន្ទីរពេទ្យ តែជាអកុសល ត្រូវបានពលី ពេលបញ្ជូនដល់ មន្ទីរពេទ្យកាល់ម៉ែត។
ទំព័រហ្វេសប៊ុកកងរាជអាវុធហត្ថរាធានីភ្នំពេញ សរសេរថា បន្ទាប់មក ឯកឧត្តម រ័ត្ន ស្រ៊ាង បានដឹកនាំកម្លាំង (ខ) អន្តរាគមន៍ ទៅដល់កន្លែងកើតហេតុ ដោយផ្ទាល់ តែដោយផ្ទះ របស់ ជនល្មើស ចាប់កាមេរ៉ាសុវត្ថិភាព គ្រប់ទីកន្លែង ធ្វើឲ្យ កម្លាំងប្រតិបត្តិការ មិនអាចចូល ទៅក្នុងផ្ទះបាន ហើយជនល្មើស បានបាញ់សង្គ្រប់ មកលើសមត្ថកិច្ច ជាបន្តបន្ទាប់ មិនតិចជាង ៥០គ្រាប់ ទើប ឯកឧត្តម រ័ត្ន ស្រ៊ាង បញ្ជាឲ្យកម្លាំង របស់លោក បាញ់កំទេចកាមេរ៉ា ចោលមួយចំនួន និងសម្រុកចូលទៅ បាញ់ប្រហារតបត ជាមួយជនល្មើស ដែលជាមេក្លោងធំនោះ បណ្តាលឲ្យងាប់ នៅក្នុងបន្ទប់ដេក របស់វា ដែលមានកាមេរ៉ាតែម្តង។ក្នុងប្រតិបត្តិការសំរុកចូលនោះ ជនល្មើស ក៏បានបាញ់ប្រហារ ត្រូវកម្លាំងអាវុធហត្ថ ០២នាក់ ទៀតផងដែរ គឺម្នាក់ត្រូវដើមទ្រូង តែបានអាវក្រោះ ការពារ ដោយក្បាលគ្រាប់ បៀមជាប់អាវក្រោះ និងម្នាក់ទៀត ត្រូវចំភ្លៅឆ្វេង តែបានទូរស័ព្ទ iPhone ពីរគ្រឿង នៅក្នុងហោប៉ៅខោ ជួយទប់គ្រាប់ បណ្តាលឲ្យ កំពិតទូរស័ព្ទ ទាំងពីរគ្រឿង ពេលសមត្ថកិច្ច ចូលទៅឆែកឆេរ ក្នុងបន្ទប់ របស់ជនល្មើស រកឃើញថា ជននោះ បានចាក់គ្រឿងញៀនចោល បង្ហូរចូលទៅក្នុងបង្គន់ ទាំងអស់ ដែលធ្វើឲ្យសមត្ថកិច្ច ប្រមូលបានតែ កំទេចកំទី ថ្នាំញៀន មួយចំនួន ដែលវាធ្វើកំពប់ ក្រៅបង្គន់ប៉ុណ្ណោះ ហើយជនល្មើស បានដុតបំផ្លាញ ឯកសារពាក់ព័ន្ធ មួយចំនួនផងដែរ ដែលធ្វើឲ្យសមត្ថកិច្ច អាវុធហត្ថ មិនទាន់អាចកំណត់ អត្តសញ្ញាណ មេក្លោងធំនេះ បាននៅឡើយ។
ក្រោយប្រតិបត្តិការអស់ប្រហែលជាង២ម៉ោង សមត្ថកិច្ចអាវុធហត្ថ រាជធានីភ្នំពេញ បានគ្រប់គ្រង សភាពការណ៍ ទាំងស្រុង ដោយឃាត់ខ្លួន ជនល្មើសសរុបបាន ០៥នាក់ បាញ់ងាប់ ០១នាក់ ដកហូតអាវុធបាន ០៦ដើម (អាវុធខ្លី០៥ដើម អាវុធវែងAK ០១ដើម) រថយន្ត ០២គ្រឿង គឺ Luxus RX300 មួយគ្រឿង ស្លាកលេខ ភ្នំពេញ 2AF-1549 និងរថយន្ត AudiQ7 មួយគ្រឿង ម៉ូតូ ០៤គ្រឿង ហើយពលី កម្លាំងអាវុធហត្ថម្នាក់ គឺលោក អនុសេនីយ៍ឯក ទៀន ករុណា នាយរងការិយាល័យ បទល្មើស គ្រឿងញៀន កងរាជអាវុធហត្ថ រាជធានីភ្នំពេញ បច្ចុប្បន្នតម្កល់ធ្វើបុណ្យ នៅបញ្ជាការដ្ឋាន កងរាជអាវុធហត្ថ រាជធានីភ្នំពេញ ដែលនឹងដង្ហែរទៅបូជា ថ្ងៃសៅរ៍ ទី៣០ ខែមេសា ឆ្នាំ២០១៦ វេលាម៉ោង ០២រសៀល នៅវត្តនន្ទមុន្នី សង្កាត់ស្ទឹងមានជ័យ ខណ្ឌមានជ័យ៕
ចំនួនអ្នកទស្សនា
- ថ្ងៃនេះ2201
- ម្សិលមិញ20231
- សប្តាហ៍នេះ81281
- ខែនេះ103161
- ឆ្នាំនេះ103161
- សរុប20545617