ហូបនំបញ្ចុកពុលក្មេងចាស់ប្រុសស្រី១៥នាក់ នៅស្រុករលាប្អៀរ
30-April-2016 | ដោយ មែន កំសត់
កំពង់ឆ្នាំង ៖ ប្រជាពលរដ្ឋចំនួន១៥មានក្មេងចាស់ប្រុស ស្រី ត្រូវបានអ្នកស្រុកដឹកមកសង្គ្រោះនៅមន្ទីរពេទ្យបង្អែកខេត្តកំពង់ឆ្នាំង បន្ទាប់ពីពួកគាត់មានអាការៈក្អួតចង្អោរ វិលមុខ ក្រោយពីបាននាំគ្នាហូបនំបញ្ចុកដែលស្លទឹកដោយខ្លួនឯង និង ទិញនំពីផ្សារ ហេតុការណ៍ពុល នំបញ្ចុកនេះ បានកើតឡើងកាលពីវេលាល្ងាចថ្ងៃទី២៩ ខែមេសា ឆ្នាំ២០១៦ នៅភូមិព្រែកសាលា ឃុំទឹកហូត ស្រុករលាប្អៀរ ។
ប្រជាពលរដ្ឋបានអោយដឹងថា នៅមុនពេលកើតហេតុ នៅផ្ទះស្ត្រីឈ្មោះផាក់ សុជា រស់នៅភូមិឃុំខាងលើ បានទិញនំបញ្ចុក ចំនួន៥គីឡូ ពីផ្សារកំពង់ប្រាសាទ ដើម្បីស្លទឹកនំនិង មានបន្លែជាល្បើយ ចែកគ្នាហូប ។ លុះដល់ម៉ោងប្រមាណជាង៤រសៀល ក្រោយពីទឹកម្លនំបានឆ្អិន ក៍បាននាំគ្នាហូបជុំគ្នា និង បានចែកទៅអ្នកជិតខាងហូបផងដែរ រហូតមកដល់ម៉ោងប្រមាណជាង៦ល្ងាច ស្រាប់តែមានប្រជាពលរដ្ឋដែលបានហូបនំបញ្ចុកនេះ ចាប់ផ្តើមមានអាការៈក្អួតចង្អោរ និង ខ្លះទៀតមានអាការៈឈឺក្បាលវិលមុខ ថប់ដង្ហើម ដោយឃើញស្ថានភាពបែបនេះប្រជាពលរដ្ឋដែលរស់នៅក្បែរខាងគ្នានាំគ្នាដឹក អ្នកជំងឺទាំងនោះមកសង្គ្រោះបន្ទាន់នៅមន្ទីរពេទ្យបង្អែក ខេត្តកំពង់ឆ្នាំង ផងដែរ ។
ប្រធានមន្ទីរពេទ្យបង្អែកខេត្ត បានប្រាប់នៅព្រឹកថ្ងៃទី៣០នេះថា ប្រជាពលរដ្ឋដែលដឹក មកសង្គ្រោះដល់ពេទ្យមានចំនួន១២នាក់ ចំពោះមូលហេតុគឺពុំសន្និដ្ឋានបាននៅឡើយទេ ថាតើបណ្តាលមកពីនំបញ្ចុក ឬក៍បណ្តាលមកពីបន្លែ ។ ចំពោះអាការៈរបស់អ្នកជំងឺដែលមកសង្គ្រោះនៅមន្ទីរពេទ្យគឺមានអាការៈ ធូស្បើយខ្លះហើយ៕
ចំនួនអ្នកទស្សនា
- ថ្ងៃនេះ4651
- ម្សិលមិញ20231
- សប្តាហ៍នេះ83731
- ខែនេះ105611
- ឆ្នាំនេះ105611
- សរុប20548067