នារីរូបស្រស់ ជួញដូរម៉ាទឹកកក ត្រូវសមត្ថកិច្ចចាប់ខ្លួន ដកហូតបាន ១កញ្ចប់ធំ
02-May-2016 | ដោយ មែន កំសត់
ភ្នំពេញ៖ នារីរូបស្រស់ម្នាក់ត្រូវសមត្ថកិច្ច ធ្វើការឃាត់ខ្លួនដោយចោទពីបទករណីជួញដូរគ្រឿងញៀន។ ការឃាត់ខ្លួននារីខាងលើនេះបានធ្វើឡើងកាលពីព្រឹកថ្ងៃទី០១ ខែឧសភា ឆ្នាំ២០១៦ នៅតំបន់ភូមិត្រពាំងឈូកមុខពេទ្យលោកសង្ឃក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។
ក្នុងប្រតិបត្តិការនេះដឹកនាំដោយលោក វរសេនីយ៍ទោ អ៊ីវ ភារិទ្ធ នាយការិយាល័យប្រឆាំងបទល្មើសគ្រឿងញៀនរាជធានីភ្នំពេញ និងកំលាំងសមត្ថកិច្ចជាច្រើនទៀត។ជនសង្ស័យមានឈ្មោះ ស្រី ពេជ្រ ភេទស្រីអាយុ២៣ឆ្នាំ មុខរបរមិនពិតស្នាក់នៅចំណុចខាងលើ។
លោកវរសេនីយ៍ទោ អ៊ីវ ភារិទ្ធ នាយការិយាល័យប្រឆាំងបទល្មើសគ្រឿងញៀន នៃស្នងការដ្ឋាននគរបាលរាជធានីភ្នំពេញបានអោយដឹងថា ករណីឃាត់ខ្លួនជនសង្ស័យខាងលើនេះគឺកំលាំងជំនាញរបស់លោកបានធ្វើការស្រាវជ្រាវតាមរយៈកំលាំងសម្ងាត់ ទើបឈានដល់ការឃាត់ខ្លួន ខណៈដែលជនសង្ស័យរូបនេះកំពុងប្រព្រឹត្តបទល្មើសជាក់ស្តែង (កំពុងជួញដូរ)។ ក្នងនោះដែរសមត្ថកិច្ចបានចាប់យកវត្ថុតាង ថ្នាំញៀនប្រភេទម៉ាទឹកកកចំនួន ១កញ្ចប់និង ជញ្ជីងថ្លឹងថ្នាំញៀន ១។
បច្ចុប្បន្នកំពុងឃាត់ខ្លួន នៅការិយាល័យប្រឆាំងបទល្មើសគ្រឿងញៀនរាជធានីភ្នំពេញដើម្បីកសាងសំណុំរឿង បញ្ចូនទៅតុលាការចាត់ការបន្តតាមនិតិវិធី៕
ចំនួនអ្នកទស្សនា
- ថ្ងៃនេះ4321
- ម្សិលមិញ20231
- សប្តាហ៍នេះ83401
- ខែនេះ105281
- ឆ្នាំនេះ105281
- សរុប20547737