ចាងហ្វាងកាសែតម្នាក់ ជួបគ្រោះចរាចរណ៍បាក់ជើង
17-May-2016 | ដោយ មែន កំសត់
បាត់ដំបង ៖ ជនរងគ្រោះម្នាក់ដែលគេបានស្គាល់យ៉ាងច្បាស់ថា ជាចាងហ្វាងកាសែតសម្លេងចៅកំសត់ បានរងរបួសយ៉ាងធ្ងន់ធ្ងរសឹងតែបាត់បង់ជីវិតទៅហើយ ខណៈដែលជនរងគ្រោះកំពុងជិះម៉ូតូដើរយកព័ត៌មាន ក៏ត្រូវរថយន្តសាំយ៉ុងមួយគ្រឿងមកបុកពីក្រោយ បណ្ដាលឲ្យជើងឆ្វេងម្ខាងត្រូវបាក់ខ្ទេចខ្ទី។
យោងតាមរបាយការណ៍របស់សមត្ថកិច្ចស្រុកកំរៀងបានឲ្យដឹងថា ករណីគ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៦និង១០នាទីល្ងាចថ្ងៃទី១៦ ខែឧសភា ឆ្នាំ២០១៦ ត្រង់ចំណុចភូមិទួលទិល ឃុំតាគ្រី ស្រុកកំរៀង ខេត្តបាត់ដំបង រវាងរថយន្តសាំយ៉ុងបុកនឹងម៉ូតូ បណ្ដាលឲ្យបុរសម្នាក់បាក់ជើងម្ខាងយ៉ាងដំណំ ព្រមទាំងរងរបួសស្ទើរតែផុតជីវិតនៅនឹងកន្លែងទៅហើយ ចំណែករថយន្តបានបើកគេចខ្លួនបាត់ស្រមោល។
សាក្សីនៅកន្លែងកើតហេតុបានឲ្យដឹងថា គ្រោះថ្នាក់ចរាចរណ៍ដែលបង្កឡើងដោយរថយន្តសាំយ៉ុងមិនស្គាល់ស្លាកលេខ នេះ បានធ្វើដំណើរច្រាសទិសគ្នាជាមួយនឹងម៉ូតូ ហើយត្រូវបានរថយន្តបង្កបុកចំពីមុខតែម្តងបណ្ដាលឲ្យម៉ូតូខ្ទេចខ្ទី ផ្នែកខាងមុខ ដោយឡែកម្ចាស់ម៉ូតូ បានរងរបួសយ៉ាងធ្ងន់ធ្ងរ បាក់ភ្លៅចេញសាច់ និងឆ្អឹងជើងមកទាំងសងខាង ដោយបានដេកសន្លប់ស្តូកស្តឹង, ចំណែករថយន្តបានបើកលឿនទៅមុខមិនឈប់ឡើយ។
សាក្សីដដែលបន្តថា ក្រោយពីប្រជាពលរដ្ឋដែលឡើងពីចម្ការមកឃើញ ក៏បានត្រួតពិនិត្យលើរាងកាយរបស់ជនរងគ្រោះ គឺមានជាប់នឹងខ្លួននូវកាតវិស៊ីតសម្គាល់ខ្លួន ដែលបានបញ្ជាក់ថា ជនរងគ្រោះ ស្ថិតក្នុងអង្គភាពកាសែតសម្លេងចៅកំសត់ និងត្រូវជាចាងហ្វាងការផ្សាយមាន ឈ្មោះ ម៉ឹង កំសត់ ភេទប្រុស អាយុជាង៤០ឆ្នាំ រស់នៅក្នុងស្រុកថ្មគោល ខេត្តបាត់ដំបង ដែលជនរងគ្រោះបានប្រើប្រាស់ម៉ូតូម៉ាកស្មាស់វ៉េវ ពាក់ស្លាកលេខ1j.1318។
បច្ចុប្បន្ន ជនរងគ្រោះ ត្រូវបានបញ្ជូនទៅកាន់មន្ទីរពេទ្យខេត្តបាត់ដំបង ចំណែកម៉ូតូជនរងគ្រោះត្រូវបានប៉ូលិសប៉ុស្តិ៍តាក្រី យកទៅរក្សាទុកនៅប៉ុស្តិ៍ជាបណ្ដោះអាសន្ន រង់ចាំធ្វើការស្រាវជ្រាវរករថយន្តដែលបង្កហេតុ៕
ចំនួនអ្នកទស្សនា
- ថ្ងៃនេះ9201
- ម្សិលមិញ20231
- សប្តាហ៍នេះ88281
- ខែនេះ110161
- ឆ្នាំនេះ110161
- សរុប20552617