អភិបាល ខេត្តមណ្ឌលគិរីបញ្ជាឲ្យសមត្ថកិច្ចតាមចាប់ខ្លួនចោរលួចក្របី គោ នៅស្រុកកោះញែក
17-May-2016 | ដោយ មែន កំសត់
មណ្ឌលគិរី ៖ ក្រុមចោរលួច កំពុងសម្រុកចូលលួច ក្របី គោ របស់ប្រជាពលរដ្ឋនៅស្រុកកោះញែកបង្កឲ្យកើតមានភាពវឹកវរជាច្រើនលើក ច្រើនសារ ធ្វើឲ្យកម្លាំងអូសទាញរបស់អ្នកស្រុកបាត់ជាច្រើនក្បាលស្ទើរពេញ ស្រុក។ ករណីនេះត្រូវបានអ្នកស្រុក អ្នកភូមិ សម្ដែងនូវការព្រួយបារម្ភយ៉ាងខ្លាំង។ដោយឡែកខាងក្រុមអាជ្ញាធរស្រុក នេះ ហាក់បីដូចជាមិនមានសមត្ថភាពគ្រប់គ្រាន់ក្នុងការជួយទប់ស្កាត់ បញ្ហាដ៏រសើបនេះឲ្យបានតឹងរ៉ឹងនោះឡើយ។
អ្នកស្រុក អ្នកភូមិ នៅស្រុកកោះញែកបានរាយការណ៍ប្រាប់ឲ្យដឹងថា កាលពីមុនៗ ក្រុមចោរជាច្រើនបានចូលមកលួច ក្របី គោ នៅស្រុកកោះញែកជាច្រើនលើកច្រើនសា ហើយក៏ត្រូវបានកម្លាំងនគរបាលនៅស្រុកនោះ ធ្វើការឃាត់ខ្លួនជនសង្ស័យជាបន្តបន្ទាប់ផងដែរ ធ្វើឲ្យប្រជាពលរដ្ឋមានការសាទរយ៉ាងខ្លាំង។ ប៉ុន្តែជនសង្ស័យ ដែលកម្លាំងសមត្ថកិច្ចឃាត់ខ្លួននោះ ត្រូវបានដោះលែងវិញ មិនដឹងថាអង្គភាពមានសមត្ថកិច្ចមួយណាឡើយនៃខេត្តមណ្ឌលគិរី ជាអ្នកដោះលែង ព្រោះជនសង្ស័យត្រូវបានបញ្ជូនផុតដៃពីស្រុកហើយ។
ប្រជាពលរដ្ឋឈ្មោះទិច ជីង, ឈ្មោះក្រូច ក្រួច សាមួន ហៅប្រុស រស់នៅភូមិជីមាត ឃុំណងឃីលឹក ស្រុកកោះញែក ខេត្តមណ្ឌលគិរី បានឲ្យដឹងថា កាលពីពេលថ្មីៗកន្លងមក គឺចាប់ពីពាក់កណ្ដាលខែឧសភា ឆ្នាំ២០១៦នេះ រូបគាត់ពីរនាក់បងប្អូននេះ បានបាត់ក្របីចំនួន១៤ក្បាល ហើយបានតាមរកឃើញក្របីនោះចំនួន៤ក្បាលនៅកន្លែងសត្តឃាតមួយ កន្លែងក្នុងខេត្តរតនគិរី គឺគេកំពុងរៀបចំសម្លាប់។ ឃើញដូច្នេះពួកគាត់ ក៏បានរាយការណ៍មកសមត្ថកិច្ចស្រុកកោះញែក ធ្វើការរំដោះបានក្របីចំនួន៤ក្បាលពីខេត្តរតនគិរីនោះមកវិញ។ តែនៅបាត់ក្របីចំនួន១០ក្បាលទៀត ត្រូវបានគេសង្ស័យថា ម្ចាស់សត្តឃាតសម្លាប់យកសាច់។ ក្នុងករណីនេះម្ចាស់ក្របីទាំងពីរនាក់ប្រាប់ថា ម្ចាស់សត្តឃាតនៅខេត្តរតនគិរីបានប្រាប់ថា គាត់ស្គាល់អត្តសញ្ញាណច្បាស់ អ្នកយកក្របីមកលក់ឲ្យគាត់ តែពេលនេះសមត្ថកិច្ចខេត្តមណ្ឌលគិរី មិនទាន់បានធ្វើការឃាត់ខ្លួនជនសង្ស័យនៅឡើយទេ។
ពួកគាត់សំណូមពរឲ្យសមត្ថកិច្ចឃាត់ខ្លួនជន ដែលបានប្រព្រឹត្តមកផ្ដន្ទាទោសតាមច្បាប់ និងប្រគល់សំណងដល់គាត់នូវតម្លៃក្របីចំនួន១០ក្បាលផង។
លោកស្រីអ៊ុច ចន្ធី ជំទប់ទីមួយឃុំណងឃីលឹក ស្រុកកោះញែក នៅព្រឹកថ្ងៃទី១៧ ខែឧសភានេះ បានលើកឡើងថា គាត់សំណូមពរ និងស្នើឲ្យខាងអាជ្ញាធរមានសមត្ថកិច្ចស្រុកកោះញែកជួយចាត់ចែងរឹត បន្តឹងខាងអសន្តិសុខនៅស្រុកនេះឲ្យបានល្អប្រសើរផងដើម្បីធ្វើឲ្យ ប្រជាជនមានភាពកក់ក្ដៅ។
លោកកាន់ ពេញ អធិការ ស្រុកកោះញែកបានប្រាប់ថា ជនសង្ស័យជាប់ពាក់ព័ន្ធលួចក្របី១៤ក្បាលនៅស្រុកកោះញែកនេះ សមត្ថកិច្ចបានធ្វើការកំណត់មុខសញ្ញាច្បាស់ហើយ បន្តិចទៀតនេះសមត្ថកិច្ចនឹងចាប់ខ្លួន ព្រោះពេលនេះជន ដែលជាប់ពាក់ព័ន្ធនេះកំពុងមើលថែប្រពន្ធរបស់ខ្លួនវះកាត់ជំងឺ។ លោកតូច យ៉ុន ស្នងការខេត្តមណ្ឌលគិរីជំរុញឲ្យសមត្ថកិច្ចចាត់វិធានការរឿងនេះហើយ។
ឯកឧត្តមស្វាយ សំអ៊ាង អភិបាលខេត្តមណ្ឌលគិរី បានថ្លែងប្រាប់អ្នកយកព័ត៌មានយើងនៅព្រឹកថ្ងៃទី១៧ ខែឧសភានេះថា លោកកំពុងធ្វើការជំរុញឲ្យខាងមន្ត្រីមានសមត្ថកិច្ចខេត្ត និងស្រុកកោះញែក ត្រូវតែចាត់វិធានការលើករណីនេះឲ្យមានប្រសិទ្ធភាព ស្រាវជ្រាវរកភស្តុតាងឲ្យបានជាក់លាក់ឈានទៅរកការឃាត់ខ្លួនប្រគល់ ឲ្យមន្ត្រីអនុវត្តច្បាប់ ចាត់ការតាមនីតិវិធីច្បាប់។
ឯកឧត្តមអភិបាលខេត្តបានស្នើឲ្យខាងមន្ត្រីសមត្ថកិច្ចខេត្ត ក្រុង ស្រុក ឃុំ ប៉ុស្តិ៍នៅតាមមូលដ្ឋានមេត្តាជួយ ទប់ស្កាត់ឲ្យខាងតែបាននូវអំពើចោរលួច ប្លន់ផ្សេងៗ ដែលកើតឡើងនៅតំបន់របស់ខ្លួន ឈានទៅរកការលុបបំបាត់រាល់ករណីអសន្តិសុខនេះ ធានាសន្តិសុខល្អជូនបងប្អូនប្រជាពលរដ្ឋរស់នៅដោយភាពសុខសាន្ត៕
ចំនួនអ្នកទស្សនា
- ថ្ងៃនេះ9181
- ម្សិលមិញ20231
- សប្តាហ៍នេះ88261
- ខែនេះ110141
- ឆ្នាំនេះ110141
- សរុប20552597