ឆ្លងទន្លេកូនដំបូងបាន២៨ថ្ងៃគាំងបេះដូងស្លាប់ចោលកូន
18-May-2016 | ដោយ មែន កំសត់
ខេត្តត្បូងឃ្មុំ ៖ ពិតជាគួរឱ្យអាណិតអាសូរណាស់ បន្ទាប់ពីស្ត្រីម្នាក់ឈ្មោះឈន់ គន្ធា អាយុ២៦ឆ្នាំ រស់នៅភូមិត្រពាំងស្មោរ ឃុំមង់រៀវ ស្រុកត្បូងឃ្មុំ ទើបតែឆ្លងទន្លេកូនដំបូងបាន២៨ថ្ងៃ ក៏ជួបអកុសលគាំងបេះដូងស្លាប់ចោលកូនង៉ែតឱ្យកណ្តោចកណ្តែង ដោយត្រូវបុរសជាឪពុកខំធ្វើការរកលុយ ដើម្បីទិញទឹកដោះគោឱ្យកូនបៅ ។
លោកទួន សំអាត ជាមេភូមិត្រពាំងស្នោរបានឱ្យដឹងកាលពីព្រឹកថ្ងៃទី១៨ ឧសភាថា ស្ត្រីឈ្មោះគន្ធា បានរៀបការជាមួយបុរស ឈ្មោះស៊ាង សុវណ្ណ អាយុ៣១ឆ្នាំ កាលពីឆ្នាំ២០១៥ ដោយប្តីបានទៅប្រកបររបរធ្វើជាងសំណង់ ដើម្បីបានថវិកាមកផ្គត់ផ្គង់ក្រុមគ្រួសារ បាន១ថ្ងៃរស់១ថ្ងៃ គឺរស់នៅជាមួយឪពុកម្តាយតែប៉ុណ្ណោះ ។
លោកបន្តថា ក្នុងពេលស្ត្រីរងគ្រោះមានផ្ទៃពោះគ្រប់ខែ ក៏បានមកឆ្លងទន្លេនៅមន្ទីរពេទ្យខេត្តកំពង់ចាម ព្រមទាំងមានជំងឺបេះដូងទៀត ដោយគ្រូពេទ្យបានធ្វើការវះកាត់យកទារកតូចចេញដោយសុវត្ថិភាព ។ ក្រោយពីចាកចេញត្រឡប់ទៅផ្ទះវិញ ស្ត្រីរងគ្រោះដេកចេះថប់ដង្ហើម ក៏ត្រូវគ្រូពេទ្យប្រាប់ឱ្យទៅសម្រាកនៅពេទ្យម្តងទៀត ដើម្បីតាមដានជំងឺបេះដូង តែដោយសារក្រីក្រគ្មានលុយ ចេះតែដេកនៅលើផ្ទះទៅ ។
លុះនៅវេលាម៉ោង១២ និង៣០នាទីយប់ថ្ងៃទី២២ មេសា ២០១៦ ស្ត្រីរងគ្រោះបានស្លាប់ចោលកូនដែលទើបតែមានអាយុ២៨ថ្ងៃប៉ុណ្ណោះ ។ ក្រោយពីដឹងហេតុការណ៏នេះ រូបលោកបានសរសេរលិខិតមួយច្បាប់បញ្ជូនទៅលោកកេង ប៊ុណ្ណា អភិបាលស្រុកត្បូងឃ្មុំ ដើម្បីសុំកិច្ចអន្តរាគមន៍ ជួយដល់គ្រួសារខាងលើ ។
ជាការឆ្លើយតបនោះ នៅថ្ងៃទី១៣ ឧសភា ២០១៦ លោក កេង ប៊ុណ្ណា អភិបាលស្រុក ក៏បាននាំយកថវិកាចំនួន២០០ដុល្លារ មកឧបត្ថម្ភដល់បុរសជាឪពុកទារកតូចនោះ សំរាប់ទិញទឹកដោះគោឱ្យកូនបៅ ។ ជាមួយនោះ លោកអភិបាលស្រុក បានណែនាំដល់ឪពុករបស់ទារក ត្រូវតែប្រឹងប្រែងធ្វើយ៉ាងណា ចិញ្ចឹមកូនឱ្យបានរស់ធំធាត់ និងមានសុខភាពល្អផង ។
លោកទួន សំអាត មេភូមិត្រពាំងស្នោរក៏បានបញ្ជាក់ទៀតថា គ្រូពេទ្យធ្លាប់ប្រាប់ស្ត្រីរងគ្រោះឱ្យទៅព្យាបាលជំងឺបេះដូងនេះ នៅរាជធានីភ្នំពេញដែរ តែដោយសារជីវភាពក្រីក្រ គ្មានលុយនោះ ទើបស្ត្រីឈ្មោះឈន់ គន្ធា មិនព្រមទៅ សុខចិត្តសំងំនៅផ្ទះ រហូតដល់ដល់ជំងឺបានយាយីលើរាងកាយរហូតដល់ស្លាប់ចោលកូន និងប្តី ។ បច្ចុប្បន្ន ឪពុករបស់ទារកនោះបានប្រឹងធ្វើការសំណង់យកប្រាក់មកទិញទឹកដោះគោឱ្យ កូនបៅ ហើយការថែទាំទារកតូចនេះ ត្រូវបានរ៉ាប់រងដោយជីដូនផ្ទាល់តែម្តង ៕
ចំនួនអ្នកទស្សនា
- ថ្ងៃនេះ10191
- ម្សិលមិញ20231
- សប្តាហ៍នេះ89271
- ខែនេះ111151
- ឆ្នាំនេះ111151
- សរុប20553607