កម្លាំងនគរបាលវាយខ្នោះបុរសម្នាក់ ក្រោយចាក់គូជម្លោះម្នាក់ នៅខណ្ឌឫស្សីកែវ
19-May-2016 | ដោយ មែន កំសត់
ភ្នំពេញ៖ កម្លាំងនគរបាលខណ្ឌឬស្សីកែវ បានចាប់វាយខ្នោះបុរសម្នាក់ បន្ទាប់ពីធ្វើសកម្មភាពចាក់ទៅលើជនរងគ្រោះម្នាក់ បណ្ដាលឱ្យរងរបួសដេរអស់ជាច្រើនថ្នេរ នៅព្រឹកថ្ងៃទី១៨ ខែឧសភា ឆ្នាំ២០១៦នេះ ក្នុងក្រុមទី១០ ភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ។
លោក ម៉ៅ ចាន់ថុន នាយរងផ្នែក នគរបាលព្រហ្មទណ្ឌខណ្ឌឫស្សីកែវ បានប្រាប់ថា បន្ទាប់ពីទទួលបានពាក្យបណ្ដឹងពីជនរងគ្រោះឈ្មោះ សុខ សម្បត្តិ ភេទប្រុស អាយុ២៩ឆ្នាំ មានមុខរបរត់ម៉ូតូឌុប ស្នាក់នៅផ្ទះលេខ១៨H ក្រោយមកកម្លាំងនគរបាល នៃអធិការដ្ឋាននគរបាលខណ្ឌឫស្សីកែវ បានស្រាវជ្រាវរហូតឈានដល់ការឃាត់ខ្លួនបុរសត្រូវសង្ស័យម្នាក់ឈ្មោះ ពេជ្រ បញ្ញារ៉ាត់ ភេទប្រុស អាយុ២៦ឆ្នាំ មានមុខរបរជាជាងម៉ាស៊ីនត្រជាក់ ស្នាក់នៅផ្ទះលេខ៧៨០ អ្នកទាំង២ មានទីលំនៅកន្លែងកើតហេតុខាងលើ។
លោកនាយរងបានបន្ដថា គ្រាន់តែទទួលបានពាក្យបណ្ដឹងពីជនរងគ្រោះ ថាមានករណីប្រើអំពើហិង្សា ដោយយកកាំបិតប៉័ងតោ កាប់បណ្ដាលឲ្យមានមនុស្សរងរបួស ក្រោយមកកម្លាំងដ្ឋានបានបន្ត ស្រាវជ្រាវស្វែងរក ឈានដល់ការឃាត់ខ្លួនបុរសត្រូវសង្ស័យម្នាក់ខាងលើភ្លាមៗ រួមទាំងដកហូតវត្ថុតាងមានកាំប៉័ងតោ១ ដើម្បីយកមកធ្វើការសាកសួរ នៅអធិការដ្ឋាននគរបាលខណ្ឌឫស្សីកែវតែម្ដង។
បើតាមចម្លើយសារភាពរបស់ជនសង្ស័យ បានសារភាពថា ខ្លួនពិតជាបានយកកាំបិត ទៅកាប់លើជនរងគ្រោះ បណ្ដាលឲ្យរងរបួសដេរជាច្រើនថ្នេរពិតប្រាកដមែន។ បច្ចុប្បន្ន ជនសង្ស័យរួមជាមួយវត្ថុតាង ត្រូវបានឃុំខ្លួនបណ្ដោះអាសន្ននៅអធិការដ្ឋាននគរបាលខណ្ឌឫស្សីកែវ ដើម្បីចាត់កសាងសំណុំរឿងចាត់ការតាមនីតិវិធី៕
ចំនួនអ្នកទស្សនា
- ថ្ងៃនេះ10481
- ម្សិលមិញ20231
- សប្តាហ៍នេះ89561
- ខែនេះ111441
- ឆ្នាំនេះ111441
- សរុប20553897