សំណុំរឿងបង្កអំពើហិង្សាដ៏ធ្ងន់ធ្ងរបង់ជំងឺចិត្តជាប្រាក់២លានកន្លះ សមត្ថកិច្ចបិទសំណុំរឿង
21-May-2016 | ដោយ មែន កំសត់
ខេត្តបាត់ដំបង ៖ នគរបាលស្រុកភ្នំព្រឹក ត្រូវគេសង្ស័យថា ទំនងមិនបញ្ជូនសំណុំរឿងជនសង្ស័យ២នាក់ទៅកាន់សាលាដំបូងដើម្បី ផ្តន្ទាទោសទៅតាមផ្លូវច្បាប់ទេ ក្រោយពីបានជួយសម្របសម្រូលបញ្ចុះបញ្ចូលឲ្យភាគីរងគ្រោះទទូលយក សំណងជំងឺចិត្តជាង២លានរៀល ក្នុងសំណុំរឿងបង្កអំពើហិង្សាដ៏ធ្ងន់ធ្ងរមួយ ដែលបានកើតឡើងកាលពីយប់ថ្ងៃអង្គារទី១០ ខែឧសភាកន្លងទៅ ។
ប្រភពព័ត៌មានដែលកោះសន្តិភាពទទូលបាននៅព្រឹកថ្ងៃទី១២ ខែឧសភា បានឲ្យដឹងថា ជនសង្ស័យចំនួន២នាក់គឺឈ្មោះ គួយ អាយុ២៩ឆ្នាំ និងឈ្មោះ ចេក អាយុ២៩ឆ្នាំដូចគ្នា បានព្រួតគ្នាវាយជនរងគ្រោះឈ្មោះ ឡុង ណាក់ អាយុ២៨ឆ្នាំ កាលពីវេលាម៉ោង៧យប់ថ្ងៃទី១០ខែឧសភា នៅខាងមុខវិទ្យាល័យពេជ្រចិន្តា ស្ថិតក្នុងឃុំពេជ្រចិន្ដា ស្រុកភ្នំព្រឹក ពេលមានការប៉ះទង្គិចពាក្យសម្តីគ្នាក្នុងវង់ផឹកស៊ី ។ ប្រភពដដែលបញ្ជាក់ថា គ្រានោះសមត្ថកិច្ចបានចុះអន្តរាគមន៍ភ្លាមៗដែរ តែមិនបានចាត់ការទៅលើជនសង្ស័យទេ បែរជាព្យាយាមសម្របសម្រូលទៅវិញ ខណៈជនរងគ្រោះរងរបួសប៉ោងមុខមាត់សន្លប់ស្ដូកស្ដឹង និងត្រូវបានគេជួយបញ្ជូនទៅកាន់មន្ទីរពេទ្យ ។
បើតាមសាក្សីនានានិយាយថា ជនដៃដល់ និងជនរងគ្រោះបានផឹកស៊ីជុំគ្នា ហើយក៏ឈ្លោះប្រកែកគ្នានៅពេលស្រវឹងរហូតឈានដល់ការវាយតប់គ្នាទាំង កំរោលតែម្ដង ។ ជនរងគ្រោះត្រូវភាគីដៃដល់ដែលមានគ្នា២នាក់ ព្រួតវាយយ៉ាងចាស់ដៃបណ្ដាលឲ្យរងរបួសប៉ោងមុខ ប៉ោងភ្នែក ហើយត្រូវគេជួយដឹកទៅកាន់មន្ទីរពេទ្យទាំងយប់ដែលក្រុមគ្រួសារមិន បានដឹង ។ រីឯសមត្ថកិច្ចគេឃើញចុះទៅកាន់កន្លែងកើតហេតុភ្លាមៗដែរ តែមិនមានវិធានការទៅលើជនបង្កទេ ។
បើតាមប្រភពដែលស្រង់សម្តីក្រុមគ្រួសារជនរងគ្រោះឲ្យដឹងថា ពួកគាត់ត្រូវគេរាយការណ៍កុហកថា ជនរងគ្រោះឈ្មោះ ឡុង ណាក់ ជួបគ្រោះថ្នាក់ចរាចរណ៍ ។ ក្រោយមកគេឃើញជនដៃដល់ឈ្មោះ គួយ និងឈ្មោះ ចេក ដើរចូលអធិការដ្ឋាននគរបាលស្រុកភ្នំព្រឹកដោយបង្ហាញពីចរិត ក្រអឺតក្រទម ថែមទាំងបោះសម្តីថាមកបង់លុយឲ្យជនរងគ្រោះ ។
ប្រភពដដែលបញ្ជាក់ថា សមត្ថកិច្ចបានព្យាយាមបញ្ចុះបញ្ចូលឲ្យក្រុមគ្រួសារជនរងគ្រោះទទូល យកសំណងជាថ្នូរនឹងការមិនប្ដឹងប្ដល់ ។ ការសម្របសម្រូលនេះបានអូសបន្លាយអស់រយៈពេលជាង២ថ្ងៃទើប ត្រូវរ៉ូវគ្នា ដោយភាគីជនរងគ្រោះព្រមទទូលយកសំណងចំនួន២,៥លានរៀលពីជនដៃដល់ ទាំង២នាក់ដើម្បីបញ្ចប់រឿង ។ សំណុំរឿងនេះទំនងត្រូវបិទបញ្ចប់ត្រឹមអធិការដ្ឋានស្រុកតែម្ដង ដោយមិនបញ្ជូនទៅតុលាការឡើយ ព្រោះគេឃើញជនសង្ស័យទាំង២នាក់មានសេរីភាពដើរញញឹមដាក់គេឯងពេញ ស្រុកភ្នំព្រឹក ។
ជុំវិញភាពមិនប្រក្រតីក្នុងសំណុំរឿងព្រហ្មទណ្ឌខាងលើនេះ គេមិនទាន់ដឹងថាតើលោកព្រះរាជអាជ្ញាអមសាលាដំបូងខេត្ត បានដឹងដែរឬក៏អត់នោះទេ។ ប៉ុន្តែស្នងការរងនគរបាលខេត្ត លោកឧត្តមសេនីយ៍ត្រី ជេត វណ្ណនី បានប្រាប់កោះសន្តិភាពតាមទូរស័ព្ទនៅព្រឹកថ្ងៃទី១២ ខែឧសភាថា ពិតជាមានរឿងបែបនេះមែន ។ ពួកគេបានវាយគ្នាទៅវិញទៅមក ពេលផ្ទុះជម្លោះក្នុងវង់ផឹកស៊ី។ លោកស្នងការរងបានបញ្ជាក់ថា ក្រោយពេលកើតហេតុភាគីទាំង២បានធ្វើការសម្របសម្រូលគ្នា ដោយភាគីរងគ្រោះសុខចិត្តទទូលយកសំណងពីភាគីជនដៃដល់ជាទឹកប្រាក់ ចំនួន២,៥លានរៀលដើម្បីបញ្ចប់រឿងប្ដឹងប្ដល់គ្នា ទើបសមត្ថកិច្ចសម្រេចជួយសម្របសម្រូលបញ្ចប់រឿងទៅ ។
ការប្រឹងប្រែងជួយសម្របសម្រូលបញ្ចប់សំណុំរឿងព្រហ្មទណ្ឌរបស់ មន្ត្រីនគរបាលយុត្តិធម៌ខាងលើនេះ បានរងនូវការរិះគន់យ៉ាងខ្លាំងពីមជ្ឈដ្ឋាននានា ទាំងប្រជាពលរដ្ឋ ទាំងមន្ត្រីនានានៅស្រុកភ្នំព្រឹក ។ មតិនានាបានលើកឡើងថា បើតាមពិនិត្យលើស្ថានភាពរបួសជាក់ស្ដែងរបស់ជនរងគ្រោះ គឺស្ថិតក្នុងស្ថានភាពធ្ងន់ធ្ងរ ហើមមុខហើមភ្នែក ដេកព្យាបាលគ្មានទាំងលុយបង់មន្ទីរពេទ្យទៀតផង ។ រីឯជនដៃដល់ក៏បានចេញមុខយ៉ាងក្រអឺតក្រទមទៀតនៅកន្លែងសមត្ថកិច្ច បែរជាសមត្ថកិច្ចមិនចាត់ការតាមផ្លូវច្បាប់ ហើយព្យាយាមជួយសម្របសម្រូលបញ្ចប់រឿងទៀត ។
មន្ត្រីខ្លះបានលើកឡើងអំពីផ្លូវច្បាប់ដូច្នេះថា បើតាមផ្លូវច្បាប់បើទោះជាជនរងគ្រោះព្រមទទួលយកសំណងក្ដី ក៏សមត្ថកិច្ចត្រូវតែឃាត់ខ្លួនជនដៃដល់កសាងសំណុំរឿងបញ្ជូនទៅ តុលាការចាត់ការតាមនីតិវិធីដែរ ព្រោះជារឿងព្រហ្មទណ្ឌ មិនត្រូវបិទសំណុំរឿងមិនចាត់ការបែបនេះទេ ។ អ្នករិះគន់បានស្នើឲ្យលោកស្នងការនគរបាលខេត្ត និងលោកព្រះរាជអាជ្ញាអមសាលាដំបូងខេត្ត គួរតែធ្វើការសើរើសំណុំរឿងមិនប្រក្រតីនេះ ចៀសវាងកុំឲ្យមានការរិះគន់ពីមហាជនថា មានការឃុបឃិតប្រព្រឹត្តអំពើពុករលួយបិទសំណុំរឿងព្រហ្មទណ្ឌនេះ ៕
ចំនួនអ្នកទស្សនា
- ថ្ងៃនេះ12341
- ម្សិលមិញ20231
- សប្តាហ៍នេះ91421
- ខែនេះ113301
- ឆ្នាំនេះ113301
- សរុប20555757