ទារកអាយុទើប៣ថ្ងៃឈ្លក់រហូតស្លាប់នៅពេលបុគ្គលិកសម្ភពបំបៅទឹកដោះគោ
24-May-2016 | ដោយ មែន កំសត់
ភ្នំពេញ៖គិលានុបដ្ឋាយិកា"សម្ភពសោភា ហ្គោល"បានបំបៅទឹកដោះគោឲ្យទារកអាយុទើប៣ថ្ងៃបណ្តាឲ្យឈ្លក់រហូត ស្លាប់ពេលបញ្ជូនទៅដល់មន្ទីពេទ្យកាលម៉ែត។ស្ត្រីជាម្តាយម្នាក់បាន យំសោកសង្រេងស្តាយស្រណោះកូនរបស់ខ្លួនជាពន់ពេក បន្ទាប់ពីកូនរបស់ខ្លួនដែលទើបកើតឃើញ ពន្លឺថ្ងៃបាន៣ថ្ងៃ ត្រូវបានគិលានុបដ្ឋាយិកា "សម្ពពសោភាហ្គោល" ខ្វះការប្រុងប្រយ័ត្នបំបៅទឹកដោះគោឲ្យឈ្លក់ស្លាប់។
សាច់ញាតិ ជនរងគ្រោះ សូមឲ្យក្រសួងសុខាភិបាលពិនិត្យទៅលើការផ្តល់សេវានិងការថែទាំទារករបស់ គិលានុបដ្ឋាយិកានៅក្នុងសម្ភពមួយនេះចៀសវាងការបង្កភាពសោក សៅដល់អាណាព្យាបាលដទៃទៀត។
លោក ពៅ ពុត អាយុ ៣២ឆ្នាំឪពុកទារករងគ្រោះ បានឲ្យដឹងទាំងអារម្មណ៍ក្តុកក្តួលនៅថ្ងៃទី២៣ ខែឧសភា ឆ្នាំ២០១៦នេះថា កាលពីថ្ងៃទី១៩ ខែឧសភាឆ្នាំ២០១៦ភរិយារបស់លោកមានផ្ទៃពោះគ្រប់ខែត្រូវឆ្លងទន្លេហើយ គាត់ក៏បានដឹកទៅឆ្លងទន្លេនៅសម្ភពសោភាស្ថិតក្នុងសង្កាត់បឹងព្រលិត ខណ្ឌ៧មករា។
លោកពៅពុតដែលមានមុខរបរលក់ថ្នាំពណ៌ នៅផ្លូវលេខ២១៨ សង្កាត់ទឹកល្អក់៣ ខណ្ឌទួលគោក បានរៀបរាប់ទាំងខ្សឹកខ្សួលបន្តថា កូនរបស់ លោកបានកើតមកជាមួយសុខភាពល្អធម្មតា។ ក្រោយកើតបាន ៣ថ្ងៃ ស្រាប់តែគិលានុបដ្ឋាយិកាម្នាក់ បានបំបៅទឹកដោះគោ បណ្តាលឲ្យឈ្លក់ខ្លាំង ហើយមិនព្រមបញ្ឈប់ទៀត បណ្តាលឱ្យទារកខ្សោយសុខភាពទន់ទៅៗ រួចក៏ដឹកទៅមន្ទីរពេទ្យកាល់ម៉ែតសង្គ្រោះ។ បន្ទាប់ពីសង្គ្រោះបានបន្តិចទារក ក៏បានដាច់ខ្យល់ស្លាប់តែម្តង។
អ្នកស្រី សរចាន់វាសនាអាយុ៣១ឆ្នាំត្រូវជាម្តាយទារករងគ្រោះបានទ្រហោយំ យ៉ាងខ្លាំងនិងបានស្តីបន្ទោសខ្លួនឯងថាជាអ្នកបណ្តែតបណ្តោយឲ្យ គិលានុបដ្ឋាយិកា បំបៅទឹកដោះគោកូន ទើបនាំឲ្យកូនរបស់អ្នកស្រីស្លាប់បែបនេះ។ អ្នកស្រី បានយំត្អូញត្អែយ៉ាងដូច្នេះ "កូនខ្ញុំបានស្លាប់ហើយ នេះគឺមកពីការធ្វេសប្រហែសរបស់ខ្ញុំខ្ញុំជាម្ដាយភ្លើរបំផុតខ្ញុំ មិនចេះមើលកូនខ្ញុំឲ្យពួកមីពេទ្យឆ្កួតបំបៅទឹកដោះគោកូនដល់ឈ្លក់ ស្លាប់ហើយនេះជាមេរៀន ជីវិតដ៏ឈឺចាប់របស់ខ្ញុំ សូមបងប្អូនកុំទុកចិត្តអ្នកណាក្រៅពីខ្លូនឯងឱ្យសោះ"។
ក្រុមគ្រូពេទ្យ នៅមន្ទីរពេទ្យកាល់ម៉ែតបានអះអាង ការស្លាប់របស់ទារក គឺបណ្តាលមកពីឈ្លក់ទឹកដោះគោជ្រាបដល់សួត បុកទៅដល់បេះដូង បណ្តាលឱ្យឈាមដើរបញ្ជ្រាសហើយក៏ស្លាប់តែម្តង។លោកពៅពុតបានឲ្យ ដឹងថាការសម្រាលនៅសម្ភពសោភាហ្គោលលោកត្រូវចំណាយថ្លៃសម្រាលនិង ស្នាក់នៅ៥យប់៥ថ្ងៃចំនួន៨០០ដុល្លារ។
លោកពៅពុតបាន បញ្ជាក់ទៀតថាការធ្វេសប្រហែសរបស់គិលានុបដ្ឋាយិកានៅក្នុងសម្ភពជា កំហុសឆ្គងមួយដ៏ធ្ងន់ណាស់ទៅហើយ ដែល សម្ភពគួរតែព្យាយាមជួយសង្គ្រោះដល់កូនរបស់លោក តែសម្ភពបែរជាទារលុយ ១០០ដុល្លារ សម្រាប់ការដឹកទារកទៅសង្គ្រោះនៅមន្ទីរពេទ្យកាល់ម៉ែតថែមទៀត។ លោក ពៅ ពុត បានសម្តែងការខកចិត្តយ៉ាងខ្លាំង ចំពោះកាយវិការរបស់ "សម្ភពសោភាហ្គោល"។
ទាក់ទិនបញ្ហាស្លាប់ទារកដែលឪពុកម្តាយ បានអះអាងថាបណ្តាលមកពីគិលានុបដ្ឋាយិកា"សម្ភពសោភាហ្គោល"មានការ ធ្វេសប្រហែសក្នុងការបំបៅរហូតឲ្យទារកស្លាប់នោះគេហទំព័ររស្មី កម្ពុជាមិនទាន់មានការបំភ្លឺពីខាង"សម្ភពសោភាហ្គោល"នៅឡើយទេនា ល្ងាចថ្ងៃទី២៣ ខែឧសភា ឆ្នាំ២០១៦នេះ។
ប៉ុន្តែទោះជាយ៉ាងណា សាធារណជនដែលបានទទួលព័ត៌មាននេះបាននាំគ្នាសម្តែងការខឹងសម្បាខ្លាំង ចំពោះភាពធ្វេសប្រហែសរបស់គិលានុបដ្ឋាយិកានៅក្នុង"សម្ភពសោភា"ហើយ ពួកគេស្នើឱ្យក្រសួងសុខាភិបាលមានវិធានការចំពោះសម្ភពខាងលើចៀសវាងបង្ក ភាពសោកសង្រេងបែបនេះបន្តទៅទៀត៕
ចំនួនអ្នកទស្សនា
- ថ្ងៃនេះ12131
- ម្សិលមិញ20231
- សប្តាហ៍នេះ91211
- ខែនេះ113091
- ឆ្នាំនេះ113091
- សរុប20555547