បីនាក់ជីតានិងចៅ រើសបានគ្រាប់អាចមិនស្គាល់វី បានយកទៅដំធ្វើស្នឹងគោ ផ្ទុះស្លាប់
24-May-2016 | ដោយ មែន កំសត់
ខេត្តព្រៃវែង ៖យុទ្ធភណ្ឌមិនទាន់ផ្ទុះជាគ្រាប់កាំភ្លើង ត្បាល់ប្រភេទ១០៥មីលីម៉ែត្រ សល់ពីសម័យសង្គ្រាម បានប្រល័យជីវិតជីតា និងចៅប្រុសស្រីបីនាក់ គួរឲ្យអាណោចអាធម៌។ ក្រោយពីរើសបានជនរងគ្រោះអាចមិនស្គាល់ជាវត្ថុអ្វី ឬចាត់ទុកគ្រាប់នោះ អស់ឥទ្ធិពលក៏បានយកទៅដំធ្វើស្នឹងគោ បណ្តាលឲ្យផ្ទុះស្លាប់ភ្លាមៗបង្កភា្ញក់ផ្អើលនៅភូមិជង្រុះ ឃុំរំចេក ស្រុកព្រះស្ដេច ខេត្តព្រៃវែង កាលពីព្រឹកថ្ងៃទី២៤ ខែឧសភា ឆ្នាំ២០១៦នេះ។
សំឡេងលាន់គគ្រើកដោយកម្លាំងផ្ទុះ និងផ្តាច់ជីវិតមនុស្សនោះ លោកឧត្តមសេនីយ៍ត្រី ម៉ែន ស៊ីនប៊ន មេបញ្ជាការអាវុធហត្ថខេត្តព្រៃវែង លោកបានឲ្យដឹងថា "មុនពេលកើតហេតុជនរងគ្រោះរើសបានគ្រាប់ប្រភេទ១០៥មីលីម៉ែត្រ យកទៅដំធ្វើស្នឹងគោហើយក៏ស្រាប់តែផ្ទុះបណ្ដាលឲ្យស្លាប់ទាំងបីនាក់ តែម្ដង"។ ជនរងគ្រោះបីនាក់ឈ្មោះ ទេព ផល អាយុជាង៧០ឆ្នាំជីតា និងចៅពីរនាក់ឈ្មោះផល ណារី ភេទស្រី អាយុ១២ឆ្នាំ និងឈ្មោះ ផល ដារ៉ា ភេទប្រុស អាយុ១៩ឆ្នាំអ្នកទាំងបីនាក់ រស់នៅក្នុងភូមិឃុំកើតហេតុខាងលើ។
ក្រោយការពិនិត្យរួចពី សមត្ថកិច្ចសពជនរងគ្រោះទាំងបីនាក់ សមត្ថកិច្ចជូនក្រុមគ្រួសារយកទៅធ្វើបុណ្យតាមប្រពៃណី។ ជាមួយគ្នានេះ លោកមេបញ្ជាការកងរាជអាវុធហត្ថបានអំពាវនាវដល់ប្រជាពលរដ្ឋទាំងអស់ ត្រូវមានការប្រុងប្រយ័ត្ននៅពេលប្រទះឃើញគ្រាប់ ដែលបន្សល់ពីសម័យសង្គ្រាម សូមកុំទៅប៉ះពាល់ គឺត្រូវរាយការណ៍មកសមត្ថកិច្ច ដើម្បីចុះទៅពិនិត្យ និងយកទៅរក្សាទុកឬត្រូវកម្ទេចចោល៕
ចំនួនអ្នកទស្សនា
- ថ្ងៃនេះ13161
- ម្សិលមិញ20231
- សប្តាហ៍នេះ92241
- ខែនេះ114121
- ឆ្នាំនេះ114121
- សរុប20556577