មន្ត្រីរដ្ឋបាលព្រៃឈើ បង្ក្រាបរថយន្តយោធា នៅកងពលតូចលេខ៤១ ដឹកឈើក្រញូង ដកហូតឈើបានជិត៣០០គីឡូក្រាម
25-May-2016 | ដោយ មែន កំសត់
ឧត្តរមានជ័យ៖ រថយន្តពណ៌ត្រេអ៊ី ពាក់ស្លាកលេខខេមរភូមិន្ទ ដោយមានផ្ទុកឈើក្រញូងជិត៣០០គីឡូក្រាម ត្រូវបានកម្លាំងរដ្ឋបាលព្រៃឈើខេត្តឧត្តរមានជ័យ សហការជាមួយមន្ត្រីរដ្ឋបាលព្រៃឈើមូលដ្ឋាន ដេញស្ទាក់ចាប់បាន ពេលកំពុងដឹកជញ្ជូនឈើនាំយកទៅលក់ ឲ្យឈ្មួញធំ។
ប្រតិបត្តិការដេញបង្ក្រាបរថយន្តយោធា ដឹកឈើក្រញូងនេះ បានធ្វើឡើងនៅយប់ ថ្ងៃ២៣ខែឧសភា ឆ្នាំ២០១៦ ស្ថិតនៅលើកំណាត់ផ្លូវជាតិលេខ៦៧B ក្នុងភូមិស្រះឈូក ឃុំត្រពាំងប្រិយ ស្រុកអន្លង់វែង ខេត្តឧត្តរមានជ័យ។
មន្ត្រីខណ្ឌរដ្ឋបាលព្រៃឈើខេត្ត លោក គួន រ៉ាឌី បានឲ្យដឹងថា រថយន្តពណ៌ត្រេអ៊ីនេះ ពាក់ស្លាកលេខខេមរភូមិន្ទ០៦-២-០៤២២ ជារបស់អង្គភាពកងពលតូចលេខ៤១ មានបិទ Logo អង្គភាព និងមានផ្ទុកឈើក្រញូង ត្រូវបានបង្ក្រាប និងរឹបអូសបាន ក្រោមការចុះពួនស្ទាក់ ដោយធ្វើឡើងអស់រយៈពេលជាច្រើនថ្ងៃ រហូតឈានមកដល់ការបង្ក្រាបបានសម្រេចតែម្តង។
លោក គួន រ៉ាឌី បានបន្តឲ្យដឹងទៀតថា គ្រាចុះបង្ក្រាបជំនួញឈើក្រញូងនេះ សមត្ថកិច្ចដកហូតបានឈើក្រញូង មានចំនួន១២ដុំធំៗ មានទម្ងន់ស្មើនឹង២៣៥គីឡូក្រាម។មន្ត្រីរដ្ឋបាលព្រៃឈើរូបនេះ បានបង្ហើបថា ម្ចាស់រថយន្តនេះ ត្រូវគេស្គាល់ឈ្មោះ ម៉ាត់ លី ជាមេបញ្ជាការគ៤ ចំណុះវរៈការពារព្រំដែនលេខ៤១៥ និងរថយន្តដឹកឈើនេះដឹកជញ្ជូនឈើក្រញូង ចេញពីតាមខ្សែបន្ទាត់ព្រំដែន ត្រង់ចំណុចគ៥ គ្រប់គ្រងដោយលោស័ក្តិ៣ឈ្មោះ ឆើត កប៕
ចំនួនអ្នកទស្សនា
- ថ្ងៃនេះ12681
- ម្សិលមិញ20231
- សប្តាហ៍នេះ91761
- ខែនេះ113641
- ឆ្នាំនេះ113641
- សរុប20556097