ទៅដូរថ្មសាកទូរស័ព្ទ និយាយគងទាស់សម្ដី ម្ចាស់ហាងបាញ់១គ្រាប់រត់បាតជើងសព្រាត
25-May-2016 | ដោយ មែន កំសត់
ភ្នំពេញ៖ ម្ចាស់ហាងលក់ទូរស័ព្ទយីហោ លីហ្សា ស្ថិតនៅក្បែររោងចក្រ QMI ភូមិព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ ដែលសមត្ថកិច្ចអះអាងថា ជាមន្ត្រីយោធាផងនោះ បានដកកាំភ្លើងបាញ់មួយគ្រាប់ សំដៅភ្ញៀវ៣នាក់ ពេលកំពុងយកទូរស័ព្ទទៅដូរថ្ម។
ហេតុការណ៍បាញ់ប្រហារខាងលើនេះ បានកើតឡើងនៅវេលាម៉ោងប្រមាណ៧និង៤០នាទី យប់ថ្ងៃទី២៤ ខែឧសភា ឆ្នាំ២០១៦នេះ តែសំណាងល្អ ជនរងគ្រោះបានរួចផុតពីគ្រោះថ្នាក់ដោយសារតែគ្រាប់កាំភ្លើងបាញ់ខុស។
ភ្នាក់ងារ សមត្ថកិច្ចបានរាយការណ៍មកថា មុនពេលកើតហេតុ ជនរងគ្រោះ៣នាក់ បានយកទូរស័ព្ទរបស់ខ្លួន ទៅដូរថ្មចេញ ក្រោយពេលទិញនៅហាងមួយនេះ តែមិនសូវកាន់ថ្ម តែពេលយកទៅដូរនោះ ស្រាប់តែឈ្លោះជាមួយម្ចាស់ហាងខាងលើ រហូតកើតជាជម្លោះ ស្រាប់តែម្ចាស់ហាងដកកាំភ្លើងបាញ់តែម្តង ធ្វើឲ្យជនរងគ្រោះទាំង៣នាក់ រត់បាតជើងសព្រាត ប៉ុន្តែបានរួចផុតពីគ្រោះថ្នាក់។ជនរងគ្រោះ ដែលម្ចាស់ហាង បាញ់គំរាម មានគ្នា ៣នាក់ ទី១ឈ្មោះ សុខ ចៀន ភេទប្រុស អាយុ២០ឆ្នាំ មុខកម្មកររោងចក្រ កាណាឌីយា ស្នាក់នៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ មានស្រុកកំណើត នៅខេត្តព្រៃវែង។ ទី២ឈ្មោះ ភីរៈ ភេទប្រុស អាយុ២៣ឆ្នាំ មុខរបរ កម្មកររោងចក្រ ស្នាក់នៅជាមួយគ្នា មានស្រុកកំណើត នៅខេត្តកំពង់ចាម និងទី៣ ឈ្មោះ ដែន ភេទប្រុស អាយុ២៣ឆ្នាំ មុខរបរ កម្មកររោងចក្រ ស្នាក់នៅជាមួយគ្នា មានស្រុកកំណើត នៅ ស្រុកកោះសូទិន ខេត្តកំពង់ចាម។
តាមសម្តី ជនរងគ្រោះ សុខ ចៀន ជាអតិថិជន ទិញទូរស័ព្ទ នៅហាង លីហ្សា ខាងលើ បានឲ្យដឹងថា មុនកើតហេតុ ខ្លួនបានមកទិញទូរស័ព្ទ ណូគៀ អិនចុចពិល មួយគ្រឿង តម្លៃ២០ដុល្លា កាលពីថ្ងៃទី២២ ឧសភា យកទៅប្រើ តែដោយសារទូរស័ព្ទ ទិញយកទៅនោះ អត់កាន់ថ្ម ទើបខ្លួន រួមជាមួយ មិត្តភ័ក្រ គ្នា៣នាក់ បានយកទូរស័ព្ទ នោះ មកដូរ ថែមលុយ យកទូរស័ព្ទមួយគ្រឿង ផ្សេងទៀត។ តែនៅពេល មកបំណងធ្វើការដោះដូរ និយាយមិនត្រូវគ្នា ដោយម្ចាស់ហាងខាងលើ មិនទទួលខុសត្រូវ នូវរបស់ខ្លួនឯង ដែលលក់ទៅឲ្យភ្ញៀវ ទើបតឹងមាត់តឹងកដាក់គ្នា ឈានទៅដល់ ម្ចាស់ហាងលក់ទូរស័ព្ទ ដែលអាងខ្លួនជាមន្ត្រីយោធា អ្នកភូមិ ខ្សឹបប្រាប់ថា នៅអង្គភាពយ័ត្រយោង៩១១ បែជាដកកាំភ្លើងខ្លី បាញ់សំដៅ ទៅលើអតិថិជន មួយគ្រាប់ តែសំណាងល្អ គ្រាប់កាំភ្លើងមិនត្រូវចំមនុស្ស បង្កឲ្យផ្អើលអ្នកភូមិ ស្មានតែមានក្រុមចោរប្លន់បាញ់ប្រហារ ម្នាក់ៗព្រលឹងចុងសក់ រត់ចែកជើងគ្នាព្រាត។ក្រោយកើតហេតុ កម្លាំងនគរបាល និងកម្លាំងអាវុធហត្ថ បានចុះទៅសួរនាំ និងជួយអន្តរាគមន៍ ប៉ុន្តែជនដៃដល់បានរត់គេចខ្លួនបាត់៕
ចំនួនអ្នកទស្សនា
- ថ្ងៃនេះ13271
- ម្សិលមិញ20231
- សប្តាហ៍នេះ92351
- ខែនេះ114231
- ឆ្នាំនេះ114231
- សរុប20556687