ស្ត្រី៣នាក់ចាញ់បោកប្រុសព្រានតែម្នាក់
27-May-2016 | ដោយ មែន កំសត់
រាជធានីភ្នំពេញ ៖ ពីរនាក់ម្តាយមីងនិងក្មួយបានចាញ់បោកប្រុសព្រានតែម្នាក់ ពេលប្រទះឃើញក៏នាំគ្នាដេញចាប់ តែប្រុសព្រាននោះបានរត់គេចខ្លួនបាត់ បន្សល់ទុកនារីវ័យក្មេងម្នាក់ទៀតដែលបម្រុងនឹងចាញ់បោកប្រុសព្រាន នោះដែរ ។ ហេតុការណ៍ដេញចាប់ប្រុសព្រាននេះបង្កឲ្យមានការភ្ញាក់ផ្អើលកាលពីវេលា ម៉ោង៨យប់ ថ្ងៃទី២៦ ខែឧសភា ឆ្នាំ២០១៦ នៅក្នុងខារ៉ាអូខេយីហោតន្ត្រីបុប្ផាជាយក្រុងថ្មី ដែលស្ថិតនៅជាប់ផ្លូវជាតិលេខ៣ ស្ថិតក្នុងភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ ។
ស្ត្រីរងគ្រោះទាំង៣នាក់មិនបានប្រាប់អត្តសញ្ញាណឡើយ គ្រាន់តែដឹងថា ស្ត្រីរងគ្រោះ២នាក់ជាម្តាយមីង និងក្មួយ ចំណែកនារីរងគ្រោះម្នាក់ទៀតវ័យក្មេងទើបនឹងស្គាល់គ្នាតាមរយៈហ្វេស ប៊ុក ហើយក៏ទើបនឹងបានជួបគ្នា២-៣ម៉ោងមុនកើតហេតុប៉ុណ្ណោះ ។
ស្ត្រីរងគ្រោះ២នាក់ម្តាយមីងនិងក្មួយស្រីបាននិយាយថា កាលពីខែធ្នូ ឆ្នាំ២០១៥កន្លងទៅនេះ ពួកគាត់បានធ្វើការនៅក្នុងហាងខារ៉ាអូខេមួយកន្លែងនៅម្តុំជ្រៃកោង ហើយបានស្គាល់ប្រុសព្រានម្នាក់ជាជនឆបោកនោះ ដោយបានចូលមកផឹកស៊ីនៅហាងដែលគាត់ធ្វើការ និងបានហៅស្ត្រីជាក្មួយដែលជាស្ត្រីមេម៉ាយរយៈពេល៣ឆ្នាំមកហើយទៅ អង្គុយតុ ជាមួយ ហើយនិយាយសាងសងលួងសោមសុំស្នេហ៍ និងសន្យាថានឹងចូលស្តីដណ្តឹងដល់ឪពុក-ម្តាយ លុះដល់ថ្ងៃបុណ្យសមុទ្រកាលពីចុងឆ្នាំ២០១៥ ប្រុសព្រានឆបោកនេះបានបបួលក្មួយស្រីទៅដើរលេងបុណ្យសមុទ្រនៅ កំពង់សោម ពេលនោះនាងមិនហ៊ានទៅតែម្នាក់ឯងក៏បានហៅម្តាយមីង ដែលធ្វើការជាមួយគ្នាឲ្យទៅជាមួយដែរ ។
ប្រភពដដែលបន្តទៀតថា ខណៈពេលដែលចេញដំណើរទៅបុណ្យសមុទ្រនោះ គឺជិះរថយន្ត១គ្រឿង មានគ្នា៦នាក់ក្នុងនោះស្រី២នាក់មីងនិងក្មួយ និងប្រុស៤នាក់ ដោយបានទៅសម្រាកនៅកំពង់សោម ហើយជនឆបោកជាអ្នកជួលបន្ទប់ផ្ទះសំណាក់ឲ្យស្នាក់នៅ ប៉ុន្តែមិនទាន់ទាំងបានដើរលេងសប្បាយផង ស្រាប់តែជនឆបោកដែលអួតអាងថា ខ្លួនជាអ្នករកស៊ីលក់ឈើបានធ្វើជាទូរស័ព្ទថា ម៉េចហើយឈើរបស់យើងមកដល់ណាហើយ ឥឡូវត្រូវមេព្រៃចាប់ហើយ បើអ៊ីចឹងត្រូវការលុយយកទៅលោះអស់ប៉ុន្មាន រួចហើយក៏បានប្រើល្បិចខ្ចីចិញ្ចៀន ខ្សែក របស់មីងនិងក្មួយដែលគិតជាប្រាក់ចំនួន៩៥០ដុល្លារយកទៅបញ្ចាំ រយៈពេល១ម៉ោងសិនដើម្បីយកទៅលោះឈើ បានហើយនឹងយកប្រាក់មកសងឲ្យវិញ ។ ប៉ុន្តែបន្ទាប់ពីបានខ្សែកនិងចិញ្ចៀនរួចហើយ ជនឆបោកបានគេចខ្លួនបាត់រហូត តែជនរងគ្រោះទាំង២នាក់មីងនិងក្មួយមិនបានដាក់ពាក្យបណ្តឹងទេ ។
ជនរងគ្រោះបានបន្តទៀតថា បច្ចុប្បន្នស្ត្រីជាក្មួយបានទៅធ្វើការខារ៉ាអូខេ តន្ត្រីបុប្ផាជាយក្រុងថ្មី ដោយធ្វើជាអ្នកចំរៀង ចំណែកម្តាយមីងឈប់ធ្វើការហើយ ។ ស្រាប់តែមុនពេលកើតហេតុនៅយប់ថ្ងៃទី២៦ ខែឧសភា ស្ត្រីរងគ្រោះកំពុងតែច្រៀងបានក្រឡេកឃើញជនឆបោក និងបក្សពួកម្នាក់ទៀត ព្រមទាំងមានស្រីម្នាក់ដែរកំពុងតែអង្គុយផឹកស៊ីនៅក្នុងហាង ក៏បានទូរស័ព្ទទៅម្តាយមីងឲ្យមកជួយចាប់ជនឆបោក លុះពេលម្តាយមីងមកដល់ដើម្បីចាប់ជនបោក តែចាប់អត់បានទេ រត់គេចខ្លួនបាត់ នៅសល់តែនារីវ័យក្មេងម្នាក់ក៏នាំនៅប៉ុស្តិ៍នគរបាលចោមចៅដើម្បី សួរនាំ ទើបនារីរងគ្រោះរូបនោះបានប្រាប់ថា គាត់អត់ដឹងអីទេ ព្រោះអីពួកគេទើបនឹងស្គាល់ជនឆបោកតាមរយៈហ្វេសប៊ុក និងឆាតរកគ្នាទៅវិញទៅមក ហើយរូបនាងរស់នៅឯកំពង់សោមឯណោះ ត្រូវបានជនឆបោកលួងលោមឲ្យមកភ្នំពេញដើម្បីបានជួបមុខគ្នា ហើយជនឆបោកជាអ្នកជួលផ្ទះសំណាក់ឲ្យស្នាក់នៅ ហើយរូបនាងទើបនឹងមកដល់ភ្នំពេញកាលពីវេលាម៉ោង៤ល្ងាចថ្ងៃទី២៦ ឧសភានេះ ក៏ត្រូវជនឆបោកនាំទៅរកផ្ទះសំណាក់ រួចហើយបាននាំទៅផឹកស៊ីនៅហាងខាងលើ ក៏មានរឿងបែបនេះតែម្តង ។
បន្ទាប់ពីសួរនាំរួចហើយ មីងនិងក្មួយដែលជាជនរងគ្រោះមុនគេមិនបានដាក់ពាក្យបណ្តឹងទេ រង់ចាំឃើញនៅកន្លែងណាចាប់កន្លែងហ្នឹងតែម្តង ចំណែកនារីរងគ្រោះដែលពាក់អាវខ្មៅដែលបម្រុងនឹងចាញ់បោកប្រុសព្រាន ដែរនោះ តែសំណាងល្អបែកការណ៍ទាន់ ទាំងនៅជាប់នឹងខ្លួនប្រាណមានគ្រឿងអលង្កាសរុបទាំងអស់ជាង១០០០ ដុល្លារមិនទាន់បានបាត់បង់នៅឡើយទេ ត្រូវបានសមត្ថកិច្ចធ្វើការណែនាំថ្ងៃក្រោយកុំឲ្យឆាប់ជឿគេពេក រួចហើយអ្នកទាំង៣នាក់បានបែកផ្លូវគ្នារៀងខ្លួន ៕
ចំនួនអ្នកទស្សនា
- ថ្ងៃនេះ2151
- ម្សិលមិញ14181
- សប្តាហ៍នេះ2151
- ខែនេះ117301
- ឆ្នាំនេះ117301
- សរុប20559757