ភ្នំពេញ៖​ ស្រីស្អាតម្នាក់ បើករថយន្ដទំនើបមួយគ្រឿង បុករបាំងដែកចែកទ្រូងផ្លូវអស់៣ផ្ទាំង​ រួចបន្ដទៅបុករថយ​ន្ដ២គ្រឿងផ្សេងទៀត​ បណ្ដាលឱ្យរថយន្ដខ្ទេចមុខ តែមិនមានអ្នកណារងរបួសនោះទេ។

ហេតុការណ៍នេះ​ កើតឡើនៅយប់ថ្ងៃទី១៣​ ខែកក្កដា​ ឆ្នាំ២០១៦​ តាមបណ្ដោយមហាវិថីព្រះមុនីវង្ស​ ស្ថិតក្នុងសង្កាត់បឹងកេងកង១​ ខណ្ឌចំការមន​ រាជធានីភ្នំពេញ។

បើតាមសាក្សីដែលឃើញហេតុការណ៍​ បានឱ្យដឹងថា​ មុនពេលកើតហេតុ​ គេឃើញនារីស្រស់ស្អាតម្នាក់ បើករថយន្ដទំនើបមួយគ្រឿងម៉ាក Lexus GS300 ពាក់ស្លាកលេខភ្នំពេញ 2AA-9929​ ក្នុងទិសដៅពីជើងទៅត្បូង​ លុះមកដល់ចំណុចខាងលើ​ ដោយសារតែនារីនោះ រវល់តែចុចទូរស័ព្ទផងនោះ​ ក៏បានរេចង្អូតបុករបាំងដែកអស់៣ផ្ទាំង​ ក្រោយមករថយន្ដបានបន្ដទៅបុករថយន្ដមួយគ្រឿងទៀតម៉ាក Corolla ពាក់ស្លាកលេខភ្នំពេញ 2V-7338 ដែលបើកបរច្រាស់ទិសគ្នាបណ្ដាលឱ្យខ្ទេចមុន​ ខណៈពេលនោះរថយន្ដមិនបានឈប់នោះទេ​ ស្រាប់តែបន្ដទៅបុករថយន្ដមួយគ្រឿងទៀតម៉ាក Mercedes ពាក់ស្លាកលេខភ្នំពេញ2J-6966​ បណ្ដាលឱ្យកំពិតទ្វារខាងស្ដាំផងដែរ​ ទើបរថយន្ដបង្កទៅមុខលែងរួច​ ប៉ុន្ដែមិនមានអ្នកណាម្នាក់រងគ្រោះថ្នាក់នោះទេ។

ក្រោយពេលកើតហេតុសមត្ថកិច្ចជំនាញ​ បានមកធ្វើការវាស់វែង​ និងយករថយន្ដទៅរក្សាទុក ដើម្បីដោះស្រាយតាមច្បាប់៕