ចោទសមត្ថកិច្ចថាចាប់រថយន្តកូនលោកផ្កាយមួយម្នាក់បើកបុកមនុស្សស្លាប់រួចដោះលែងវិញ
16-July-2016 | ដោយ មែន កំសត់
ក្រចេះ៖គ្រោះថ្នាក់ចរាចរណ៍មួយមានការ ចោទមន្ត្រីសមត្ថកិច្ចថាចាប់រថយន្តមួយគ្រឿងដែលគេស្គាល់ជារបស់ កូនប្រុសលោកនគរបាលផ្កាយមួយម្នាក់ដែលបានបើកបុកស្ត្រីកំពុងជិះ ម៉ូតូក្នុងដំណើរស្របទិសដៅគ្នាពេញទំហឹងបណ្តាលឲ្យស្លាប់ហើយបាន ដោះលែងរថយន្តនោះវិញភ្លាមៗដែរ។ប៉ុន្តែអធិការនគរបាលស្រុកស្នួលបាន បដិសេធនិងបានប្រាប់ថាមិនដូច្នោះទេគឺសមត្ថកិច្ចចាប់បានរថយន្តនិង អ្នករួមដំណើរ។រីឯអ្នកបើកបរបានរត់គេចខ្លួនបាត់កម្លាំងកំពុងតាម ស្រាវជ្រាវ។
ហេតុការណ៍គ្រោះថ្នាក់ចរាចរណ៍នោះបានកើតឡើងនៅតាម បណ្តោយផ្លូវជាតិលេខ៧៦ចំណុចបង្គោលគីឡូម៉ែតលេខ១៧និង១៨ស្ថិតក្នុង ភូមិជើងឃ្លេឃុំ២ធ្នូស្រុកស្នួលខេត្តក្រចេះកាលពីយប់ថ្ងៃ១៥ កក្កដា២០១៦។សាក្សីបានឲ្យដឹងថាមុនកើតហេតុមានរថយន្តនិងម៉ូតូដែល បានធ្វើដំណើរស្របទិសគ្នាពីត្បូងទៅជើង។លុះមកដល់ចំណុចកើតហេតុ ស្រាប់តែរថយន្តនោះបានបុកអ្នកជិះម៉ូតូពីក្រោយពេញទំហឹងបណ្តាលឲ្យ ស្ត្រីម្នាក់បានស្លាប់នៅនឹងកន្លែង។
ប្រភពបានឲ្យដឹងទៀតថា រថយន្តបង្កនោះម៉ាកហាយឡិនឌ័រពណ៍ទឹកប្រាក់ពាក់ស្លាកលេខភ្នំពេញ 2T5996ត្រូវគេស្គាល់ជារថយន្តរបស់កូនប្រុសលោកនគរបាលផ្កាយមួយម្នាក់ ទទូលបន្ទុកព្រំដែនចំនួន៧ខេត្ត។រីឯស្ត្រីរងគ្រោះបាត់បង់ជីវិត ឈ្មោះសុទ្ធស្រីមុំអាយុ៣៦ឆ្នាំមានលំនៅភូមិកាបីឃុំជើងឃ្លេស្រុក ស្នួលខេត្តក្រចេះជិះម៉ូតូម៉ាកដេហាសពណ៍ក្រហមគ្មានស្លាកលេខ។ ក្រោយពីបង្កឲ្យមនុស្សស្លាប់រថយន្តបានព្យាយាមបើករត់គេចខ្លួនតែ ត្រូវសមត្ថកិច្ចតាមស្ទាក់ចាប់បានរហូតមកដល់ចំណុចគីឡូម៉ែត្រលេខ១២៣ ដោយឃាត់ខ្លួនទាំងអ្នកបើកបរទៀតផង។
ប្រភពដដែលបានបន្តថា ការឃាត់រថយន្តនោះគេក៏ឃើញមានវត្តមានកូនប្រុសរបស់លោកដារ៉ាញិល ដែលគេស្គាល់ថាជាឧត្តមសេនីយ៍ត្រីផ្កាយ ១ទទូលបន្ទុកអន្តរាគមន៍តាមខ្សែរបន្ទាត់ ព្រំដែនចំនួន៧ខេត្ត នៅទីនោះ។តែមិនបានប៉ុន្មាននាទីផងកូនប្រុសឧត្តមសេនីយ៍ខាងលើ ក៍ត្រូវនាយប៉ុស្តិ៍រដ្ឋបាលឃុំគ្រញូងសែនជ័យដោះលែងឲ្យរួចខ្លួនវិញ និងគ្រាន់តែរឹបអូសរថយន្តបង្ករទៅរក្សាទុកតែប៉ុណ្ណោះ។សកម្មភាពនេះ ត្រូវបានគេដាក់ការសង្ស័យថាប្រហែលជាត្រូវរ៉ូវគ្នាក្នុងរង្វង់ ទឹកប្រាក់មួយចំនួនធំជាថ្នូរមិនចាប់ខ្លួនយកជនបង្ករដែលបើករថយន្តបុក មនុស្សស្លាប់ទៅផ្តន្ទាទោស។
ទាក់ទិនបញ្ហានេះលោកចាន់សុគីម អធិការនគរបាលស្រុកស្នួលខេត្តក្រចេះបានបញ្ជាក់ថាមានគ្រោះថ្នាក់ ចរាចរណ៍បណ្តាលឲ្យស្ត្រីម្នាក់ស្លាប់ដោយក្នុងហេតុការណ៍នោះគឺ រថយន្តបង្កពិតជារបស់កូនលោកឧត្តមសេនីយ៍ខាងលើមែន។ប៉ុន្តែ អ្នកបើកបរមិនមែនជាកូនប្រុសលោកឧត្តមសេនីយ៍ខាងលើនោះទេគឺគាត់ជា អ្នករួមដំណើរប៉ុណ្ណោះ។
ចំណែកអ្នកបើកបរបានរត់គេចខ្លួនបាត់ ដែលពេលនេះសមត្ថកិច្ចកំពុងតាមស្រាវជ្រាវនាំខ្លួនយកមកទទួលខុសត្រូវ ក្នុងករណីនេះ។លោកអធិការបានបន្តថាចំពោះអ្នករួមដំណើរសមត្ថកិច្ចបាន ឲ្យទៅផ្ទះវិញរីឯរថយន្តបង្កនិងម៉ូតូរងគ្រោះត្រូវកម្លាំងនគរបាល យកទៅរក្សាទុកនៅអធិការដ្ឋាននគរបាលស្រុកស្នួលជាបណ្តោះអាសន្នដើម្បី រង់ចាំធ្វើការដោះស្រាយបន្តនាពេលក្រោយ៕
ចំនួនអ្នកទស្សនា
- ថ្ងៃនេះ1271
- ម្សិលមិញ6261
- សប្តាហ៍នេះ19651
- ខែនេះ134801
- ឆ្នាំនេះ134801
- សរុប20577257