ជួលរថយន្តទំនើបគេជិះដើរមើលដី រួចយកទៅបញ្ចាំ ម្ចាស់ប្តឹងសមត្ថកិច្ច
29-July-2016 | ដោយ មែន កំសត់
ភ្នំពេញ៖ ស្ត្រីម្នាក់ជួលរថយន្តទំនើបគេជិះជាង១០ថ្ងៃ មកហើយសម្រាប់ដើរមើលដី តែបានយកទៅបញ្ចាំនៅយាន្តដ្ឋានលាងរថយន្តមួយកន្លែង យីហោ "ស្អាតពេញចិត្ត" ត្រូវបងប្អូនម្ចាស់រថយន្តប្រទះឃើញ កាលពីល្ងាច ថ្ងៃទី២៨ ខែកក្កដាឆ្នាំ២០១៦ ក៍ប្តឹងសមត្ថកិច្ចមូលដ្ឋានឲ្យចុះមកត្រួតពិនិត្យ ។ ទីតាំងយាន្តដ្ឋានត្រូវគេយករថយន្តបញ្ចាំនោះស្ថិតនៅផ្លូវ១៩៨៦ភូមិ ភ្នំពេញថ្មីសង្កាត់ភ្នំពេញថ្មីខណ្ឌសែនសុខ។
ប្រភពព័ត៌មានបានឲ្យដឹងថាមានបុរសម្នាក់បានយករថយន្តរបស់ខ្លួន មកលាងនៅយាន្តដ្ឋាន យីហោ "ស្អាតពេញចិត្ត" ។ ពេលនោះស្រាប់តែបានឃើញរថយន្តបងប្អូនរបស់គាត់ ម៉ាកឡិចស៊ីស ៤៧០ ពណ៌ខ្មៅ ពាក់ស្លាកលេខ ភ្នំពេញ 2D9090 នៅក្នុងយានដ្ឋានលាងរថយន្តខាងលើ ។ ដោយមានការឆ្ងល់បុរសនោះបានសួរទៅម្ចាស់យានដ្ឋាន ហើយម្ចាស់យានដ្ឋានប្រាប់គាត់វិញថាមានគេយកមកផ្ញើ ។
ប្រភពដដែលបានប្រាប់ឲ្យដឹងទៀតថា ក្រោយពីម្ចាស់យាន្តដ្ឋាន ប្រាប់បុរសនោះបានទំនាក់ទំនងទៅបងប្អូន ដែលជាម្ចាស់រថយន្ត ត្រូវបានម្ចាស់រថយន្តប្រាប់មកវិញថា បានជួលរថយន្ត ម៉ាកឡិចស៊ីស ៤៧០ ពណ៌ខ្មៅ ពាក់ស្លាកលេខ ភ្នំពេញ 2D9090 ឲ្យគេ ។ ប៉ុន្តែសង្ស័យអ្នកជួលយករថយន្តរបស់គាត់ទៅបញ្ចាំហើយឲ្យបុរសជា បងប្អូនប្តឹងសមត្ថកិច្ចមូលដ្ឋានជួយអន្តរាគមន៍ផង ។
តាមការបំភ្លឺពីឈ្មោះ គឹម ទ្រីអាយុ៦៤ឆ្នាំ ម្ចាស់យានដ្ឋានលាងរថយន្តយីហោ "ស្អាតពេញចិត្ត" បានប្រាប់សមត្ថកិច្ចថាកាលពីព្រឹក ថ្ងៃទី២៥ ខែកក្កដាឆ្នាំ ២០១៦ មានបុរស២នាក់បានយករថយន្តមួយគ្រឿង ម៉ាកឡិចស៊ីស ៤៧០ ពណ៌ខ្មៅ ពាក់ស្លាកលេខ ភ្នំពេញ 2D9090 នេះ មកលាងនៅយានដ្ឋានរបស់គាត់។ក្រោយពីលាងហើយបានសួរគាត់ថា នៅទីនេះទទួលផ្ញើរថយន្តអត់?គាត់បានប្រាប់វិញថាទទួលផ្ញើក្នុង មួយថ្ងៃ ៤.០០០រៀល។បុរសខាងលើបានប្រាប់ថាផ្ញើរួចក៏ឡើងជិះរថយន្តមិនចាំ ម៉ាកផ្សេងទៀតទាំងពីរនាក់ចេញទៅបាត់រហូតដល់ល្ងាចថ្ងៃទី២៨ ខែកក្កដា ឆ្នាំ២០១៦ ឃើញមានសមត្ថកិច្ចមកសាកសួរគាត់តែម្តង។
តាមការឲ្យដឹងពីម្ចាស់រថយន្តខាងលើ ឈ្មោះសុខ ភារម្យ អាយុ៣៣ឆ្នាំ មុខរបរយោធា ស្នាក់នៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យបានប្រាប់សមត្ថកិច្ចថារថយន្តនេះគាត់បានជួលទៅ ឲ្យស្ត្រីម្នាក់ឈ្មោះ កែវស្រី វ៉ាង អាយុ២៩ឆ្នាំ ស្នាក់នៅ ផ្ទះលេខ៤អាសេ ផ្លូវលំ ភូមិត្នោតជ្រុំ៤ សង្កាត់បឹងទំពុនខ ណ្ឌមានជ័យតាំងពីថ្ងៃទី១៨ ខែកក្កដា ឆ្នាំ២០១៦ មកម្លេះ ។ស្ត្រីនោះបានប្រាប់គាត់ថាជួលរថយន្ត ខាងលើនេះ ដឹកភ្ញៀវទៅមើលដី ។ ស្រាប់តែនៅល្ងាចថ្ងៃកើតហេតុឮបងប្អូនប្រាប់ថាឃើញរថយន្តរបស់គាត់ នៅក្នុងយានដ្ឋានខាងលើ ទៅវិញ ទើបគាត់ឆ្ងល់បានមក មើលឃើញរថយន្តរបស់គាត់មែន ។
តាមការបំភ្លឺពីបុរសម្នាក់ឈ្មោះ វង្ស សេងហួត អាយុ២៧ឆ្នាំ មុខរបរលក់ដូរ ស្នាក់នៅផ្ទះលេខ៧២អឺ ផ្លូវ២០២ ភូមិ១០ សង្កាត់ទឹកល្អក់១ ខណ្ឌទួលគោក បានប្រាប់សមត្ថកិច្ចថា រថយន្តខាងលើមានស្ត្រីម្នាក់ឈ្មោះ ឈ្មោះ កែវ ស្រីវ៉ាង អាយុ២៩ឆ្នាំ ស្នាក់នៅផ្ទះលេខ៤អាសេ ផ្លូវលំភូមិត្នោតជ្រុំ៤ សង្កាត់បឹងទំពុន ខណ្ឌមានជ័យ បានយកមកបញ្ចាំគាត់កាលពីព្រឹកថ្ងៃ២០ខែកក្កដាឆ្នាំ២០១៦ក្នុងតម្លៃ ៩.០០០ដុល្លារ។ពាក់ព័ន្ធករណីខាងលើនេះភាគីម្ចាស់រថយន្តនិងភាគីទទួល បញ្ចាំបានព្រមព្រៀងគ្នាបណ្តោះអាសន្ន ហើយរក្សាទុករថយន្តនៅក្នុងយានដ្ឋានខាងលើសិន រង់ចាំដោះស្រាយនាពេលក្រោយ ៕
ចំនួនអ្នកទស្សនា
- ថ្ងៃនេះ10161
- ម្សិលមិញ6261
- សប្តាហ៍នេះ28541
- ខែនេះ143691
- ឆ្នាំនេះ143691
- សរុប20586147